Juan 12:1-50
12 Pascua Fiestapaq soqta p’unchayraq kashaqtinmi Jesusqa Lazaroq+ tiyasqan Betania llaqtachaman chayarqan, paytan Jesusqa kausarichirqan wañusqanmanta.
2 Chaypin payman cenata jaywarqanku. Martan paykunataqa atiendesharqan,+ Lazarotaq Jesuswan kuska mijusharqan.
3 Mariataq sinchi valorniyoq mana imawan tupachisqa sumaq q’apaq nardo jawinata orqomurqan, chay jawinaqa kuskan litro jinan* karqan, chaywanmi Jesuspa chakinman jich’aykurqan, jinaspa chujchanwan ch’akichirqan. Chay aceiteq sumaq q’apayninqa wasimanraqmi junt’aykurqan.+
4 Jinan Jesusta jap’ichinanpaqña kashaq jujnin discipulon Judas Iscarioteqa+ nirqan:
5 “¿Manachu aswanpas chay sumaq q’apaq jawinataqa kinsa pachaj denario qolqeman* vendespa wajchakunaman qokunman karqan?”, nispa.
6 Chaytaqa nirqan manan wajchakunata khuyapayaspachu, aswanmi suwa kasqanrayku; paymi qolqe churana cajata jap’irqan, chaymantan suwakullaqpuni qolqe churasqankuta.
7 Jinan Jesusqa nirqan: “Jinalla kachun, ruwallachun kay costumbreta p’ampasqa kanay p’unchaypaq.+
8 Wajchakunaqa tukuy tiempon qankunawan kashan,+ noqan ichaqa mana tukuy tiempochu qankunawan kasaq”,+ nispa.
9 Askha judío runakunan yacharurqanku Jesusqa Betaniapi kashasqanta, chaymi chayman rirqanku Jesusta rikuq, ichaqa manan payllatachu rikuyta munasharqanku aswanpas kausarichisqan Lazarotawanmi.+
10 Chaymi umalli sacerdotekunaqa rimanakuyta qallarirqanku Lazarotawan wañuchinankupaq.
11 Payraykun askha judiokuna Betaniaman risharqanku, jinaspa Jesuspi iñiyta qallarirqanku.+
12 Qhepantin p’unchaytaq Jerusalenpi fiestaman jamuq runakuna yacharurqanku Jesús jamushasqanta.
13 Jinan paykunaqa palmera sach’a k’allmakuna apariykusqa payman ayparqanku, jinaspa qaparirqanku: “¡Salvasqa kachun! ¡Sumaq qhawarisqa kachun Jehová* Diospa sutinpi jamuq+ Israelpa reyninqa!”,+ nispa.
14 Jesustaq juj malta asnota tarispa chaypi sillaykukurqan,+ imaynan Diospa simin qelqapipas nishan jinata, chaypin nin:
15 “Sion llaqta,* ama manchakuychu. ¡Qhawariy! Reyniykin juj malta orqo asnopi sillaykusqa jamushan”,+ nispa.
16 Discipulonkunaqa manan qallariypiqa entienderqankuchu imachus chaykuna karqan chayta. Jesús jatunchasqa kaqtinmi+ ichaqa yuyarirqanku chaykunaqa paymanta qelqasqaña kasqanta, imaynatachus chaykunaqa payta pasarqan chaytawan.+
17 Lazaroq kausarimpusqanta rikuqkunaqa, sepulturamanta Jesuspa wajasqanta rikuq runakunaqa+ willashallarqankun chay rikusqankuta.+
18 Chayraykupiwanmi runakunaqa lloqsimurqanku Jesuswan tupaq, chay milagro ruwasqanmanta uyarisqankurayku.
19 Jinan fariseokunaqa paykunapura ninakurqanku: “Qhawariychis, manan kunankama imatapas ruwayta atishanchischu, lliu runataqmi paypa qhepanta ripushanku”,+ nispa.
20 Fiestapi adoranankupaq Jerusalenman jamuqkunamanta wakinmi karqan griego runakuna.
21 Paykunan Galileapi Bejsaida llaqtayoq Felipeman+ qayllaykuspa nirqanku: “Wiraqocha, Jesustan rikuyta munashayku”, nispa.
22 Jinan Felipeqa Andresman rispa chayta willarqan, Andrestaq Felipewan kuska rispa Jesusman chayta willarqanku.
23 Jesusmi ichaqa paykunata nirqan: “Tiempon chayamunña runaq Churin jatunchasqa kananpaq.+
24 Cheqaqtapunin niykichis: Manachus trigo pampaman chayanman, manataqchus wañunmanpas chayqa, mujullan qhepanman; wañuspanmi+ ichaqa askhata rurunqa.
25 Pipas vidanta* munakuqqa chinkachinqan, kay pachapi vidanta cheqnikuqmi+ ichaqa wiñay kausaypaq waqaychanqa.+
26 Pipas serviqniy kayta munaqqa qhepayta jamuchun, maypichus kasaq chaypin serviqniypas kashanqa.+ Pipas serviwaqtaqa Taytaymi allinpaq qhawarinqa.
27 Kunanqa sinchi llakikuymi jap’ishawan.+ ¿Imanisaqtaq? Taytáy, kay horamanta salvaway.+ Ichaqa kay horapaqpunin noqaqa jamurqani.
28 Taytáy, sutiykita jatunchay”, nispa. Chayllamanmi cielomanta juj kunka+ nimurqan: “Jatunchaniñan, wajmantataqmi jatunchasaqpas”,+ nispa.
29 Chaypi sayashaq runakunataq chayta uyarispa nirqanku: “Rayo t’ojaramun”, nispa. Wakintaq nirqanku: “Juj angelmi rimapayamun”, nispa.
30 Jinan Jesusqa nirqan: “Chay kunkaqa manan noqaraykuchu uyarikun, aswanmi qankunarayku.
31 Kunanmi kay pachaqa juzgasqa kashan, kunanmi kay pacha kamachiqpas+ qarqosqa kanqa.+
32 Noqan ichaqa warkusqa kaspay+ imaymana clase runakunata noqaman jamuchisaq”, nispa.
33 Chaytaqa nisharqan imaynatachus wañunan karqan chayta rikuchinanpaqmi.+
34 Chaymi runakunaqa payta nirqanku: “Kamachikuy simipi yachasqaykuman jinaqa, Cristoqa wiñaypaqmi qhepakunan karqan;+ chhaynaqa, ¿imaynapitaq qanri nishanki: Runaq Churinqa warkusqan kanan, nispa?+ ¿Pitaq chay runaq Churin nisqaykiri?”, nispa.
35 Jinan Jesusqa paykunata nirqan: “Juj chhikantawanmi k’anchayqa qankunawan kanqa. Chayrayku, k’anchay qankunawanraq kashaqtin puriychis, chhaynapi tutayaq mana atipanasuykichispaq; pipas tutayaqpi puriqqa manan yachanchu maymanchus rishan chayta.+
36 K’anchay qankunawanraq kashaqtinqa chay k’anchaypi iñiychis, chhaynapi k’anchaypa wawankuna kanaykichispaq”,+ nispa.
Chaykunata nispan Jesusqa ripurqan, jinaspa paykunamanta pakakurqan.
37 Imaymana señalkunataña paykunaq ñaupanpi ruwarqan chaypas, manapunin paypiqa iñirqankuchu.
38 Chhaynapin junt’akurqan profeta Isaiaspa nisqan, paymi nirqan: “Jehová* Diosníy, ¿pitaq iñirqan imachus willasqaykupi?+ ¿Pimanmi Jehová Diospa atiyninta* rikuchikurqan?”,+ nispa.
39 Imaraykuchus mana creesqankumantan Isaiasqa nillarqantaq:
40 “Paymi ñawinkuta ñausayachin, sonqonkutapas rumiyachin, chhaynapi ñawinkuwan ama rikunankupaq, sonqonkupi ama entiendenankupaq, paymanpas ama kutirikunankupaq, ama paypa qhaliyachisqan kanankupaqwan”,+ nispa.
41 Chaykunataqa nirqan Cristoq qhapaq atiyninta rikusqanraykun; arí, chayraykun Isaiasqa paymanta rimarqan.+
42 Judío umallikunamantapas askhan paypiqa iñirqanku,+ ichaqa fariseokuna jawan mana sut’itachu rikuchirqanku paypi iñisqankuta, chhaynapi sinagogamanta ama qarqosqa kanankupaq.+
43 Paykunaqa runakunaq allinpaq qhawarinantan astawanqa munaqku Diospa allinpaq qhawarinanmantaqa.+
44 Chaymantataq Jesusqa alto kunkawan nirqan: “Pipas noqapi iñiqqa manan noqallapichu iñishan, kachamuwaqniypi iman iñishan;+
45 noqata rikuwaqpas kachamuwaqniytawanmi rikushan.+
46 Noqaqa kay pachapaq k’anchay jinan jamuni,+ chhaynapi pipas noqapi iñiqqa ama tutayaqllapichu kananpaq.+
47 Pipas simiyta uyarispa mana waqaychaqtaqa manan juchachanichu; noqaqa manan kay pacha runakunata juchachaqchu jamuni, aswanmi paykunata salvaq.+
48 Pipas mana uyariwanchu nitaq simiytapas chaskikunchu chayqa, ñan paypaqqa kanña juchachaqnin. Paytaqa rimasqay simin tukukuy p’unchaypi juchachanqa.
49 Noqaqa manan munasqayman jinachu rimani, aswanmi kachamuwaqniy janaq pacha Tayta kamachimuwarqan imatachus ninayta, imatachus rimanaytapas.+
50 Chaymantapas yachanin paypa kamachikusqanqa wiñay kausayman apaq kasqanta.+ Chaymi imatapas rimaspayqa Taytaypa niwasqanman jinapuni rimani”,+ nispa.
Uraypi willakuykuna
^ Griego rimaypiqa “juj libran” ninmi. Chaypiqa Roma runakunaq juj libra nisqankumantan rimashan, juj libraqa 327 gramos jinan karqan. Qhaway “Astawan yachanapaq B14” nisqata.
^ Juj denario qolqeqa juj p’unchay llank’asqamanta pagon karqan. Qhaway “Astawan yachanapaq B14” nisqata.
^ Qhaway “Astawan yachanapaq A5” nisqata.
^ Griego rimaypiqa “Sionpa ususin” ninmi.
^ Qhaway “Astawan yachanapaq A5” nisqata.
^ Griego rimaypiqa “makinta” ninmi.
