Costumbrenku jawa fariseokunata anyasqan qhepatan Jesusqa discipulonkunapiwan riran Tiro, Sidón llaqtakuna ladoman. Chayqa Fenicia ladopin kasharan.

Chaypin Jesusqa juj wasipi alojakuran. Payqa manaña piwanpas rikuchikuyta munaranchu chaypas, runakunaqa yacharurankun chaypi kashasqanta. Chaymi griego runakunaq familianmanta kaq warmi jamuspa Jesusta rogakuran: “Davidpa Churin Señor, khuyapayaykuway. Ususiymi supaypa sinchi ñak’arichisqan kashan”, nispa (Mateo 15:22; Marcos 7:26).

Unaytaña rogakuqtintaq Jesuspa discipulonkunaqa niranku: “Chay warmita kachapuy, qhepanchistan wajakuspa jamushan”, nispa. Jinan Jesusqa niran: “Noqaqa Israel runakunallamanmi kachamusqa karani, paykunaqa chinkasqa ovejakuna jinan kanku”, nispa. Chay warmitaq Jesusman achhuykuspa k’umuykuran: “Señor, yanapaykuway”, nispa (Mateo 15:23-25).

Jinan Jesusqa iñiyninta probananpaq niran: “Manan allinchu wawakunaq t’antanta uña alqochakunaman qoyqa”, nispa (Mateo 15:26). Chhaynatan judiokunaqa niqku waj llaqtayoq runakunata mana yanapanankupaq, “alqokuna” nisparaqmi niqkupas. Jesusmi ichaqa “uña alqochakuna” nispalla niran, chhaynapin rikuchiran paykunata khuyapayasqanta.

Chhaynataña niqtinpas chay warmiqa manan phiñakuranchu, aswanmi niran: “Chhaynan Señor, ichaqa uña alqochakunapas dueñonkuq mesanmanta usuq t’antataqa mijunkun”, nispa. Chaymi Jesusqa allin sonqoyoq kasqanta reparaspa niran: “Jatunmá iñiyniykiqa kasqa, munasqaykiman jina ruwasqa kachun”, nispa (Mateo 15:27, 28). Jinan warmiqa wasinman ripuspa ususinta puñunapi tariran, “supaytaq paymanta lloqsipusqaña” (Marcos 7:30).

Chay Fenicia ladomantan Jesusqa discipulonkunapiwan “Decápolis” nisqa ladoman riranku. Chayman chayanankupaqqa Galilea qochaq wichay ladontan rinkuman karan. Runakunaqa juj orqopi Jesús kashasqanta yachaspan payman apamuranku wist’ukunata, ñuk’ukunata, ñausakunata, upakunata, imaymana onqoyniyoqkunatawan; Jesustaq llapanta qhaliyachiran. Chaymi runakunaqa Israelpa Diosninta jatuncharanku.

Chay kutipin Jesusman pusamuranku sasachakuspa rimaq roqt’u runata. Chay runa sinchi manchasqa kashasqanta reparaspan Jesusqa juj ladoman aparan, chaypin dedonkunata ninrinman winaykuran, chaymantataq dedonman thoqaykuspa chay runaq qallunta tupaykuran. Cielota qhawarispataq niran “Efata” nispa. Chayqa “kichakuy” ninantan nin. Jinan chay runaqa kaq rato qhaliyapuran. Chaymantan Jesusqa runakunata kamachiran ama pimanpas chayta willanankupaq. Payqa munaran lliu runapas paykuna kikinkupuni imachus yachachisqanta uyarispa, imachus ruwasqanta rikuspa ima paypi iñinankuta (Marcos 7:32-36).

Chay milagrokuna ruwasqanta rikuspan runakunaqa ‘anchata admirakuranku’, jinaspa ninakuranku: “Tukuy imatapas allintapunin ruwan. Roqt’ukunatapas uyarichinmi, mana rimay atiqkunatapas rimarichinmi”, nispa (Marcos 7:37).