Diosmi niran: “Chayta mijunki chayqa, wañunkipunin”, nispa (Génesis 2:17). Sichus Dios Adanta wañunanpaq kamanman karan chayqa, manañachá chay kamachikuytaqa qonmanchu karan. Adanqa yacharanmi chay sach’amanta mana mijuqtinqa mana wañunanta.

Adanwan Evawanqa kausanankupaqqa manan chay sach’allamantachu mijunan karan, huertapiqa askha fruta sach’akunan karan mijunankupaqqa (Génesis 2:9). Chay sach’aq rurullanta ama mijunkumanchu karan chayqa, kausay qoqninku Diostan kasukunkuman karan, chaywanmi rikuchinkuman karan Dioslla imata kamachinanpaqpas derechoyuq kasqanta.

Imarayku Adanwan Evawan wañusqankuta yachananchispaqqa, ñaupaqtaqa ima pasasqantan yachananchis, chaypi pasasqanmi ichaqa kay tiemponchiskamaraq afectashan. Satanasmi mach’aqwayta utilizaran llullakuspa engañananpaq. Biblian nin: “Mach’aqwayqa Señor Diospa ruwasqan llapan salqa animalkunamantapas aswan yuyaysapan karan. Jinan warmita niran: ‘¡Ajá! ¿Dioschu nirasunkichis: Aman mijunkichischu huertapi llapa sach’a ruruta, nispa?’”, nispa (Génesis 3:1).

Evataq kutichiran: “Huertapi sach’akunaq ruruntaqa atiykun mijuyta, huerta chaupipi kaq sach’a rurullatan manaqa, Diosmi niwaranku: Aman chaytaqa mijunkichischu, amallataq llamiykunkichispaschu, mana chayqa wañunkichismi”, nispa. Mach’aqwaytaq niran: “Manapunin wañunkichischu. Diosqa yachanmi chayta mijuqtiykichis jina ñawiykichis kicharikunanta, jinaspa Dios jina allinkaqta mana allinkaqta reqsiq kanaykichista”, nispa. Chaykunata nispan Satanasqa Jehová Diosta “llulla, allin kanankutan jark’an” nispa tumpasharan (Génesis 3:2-5).

Evaqa Satanaspa trampanmanmi urmaran. Sach’a ruruta qhawarispan munapayaran. Ñawinpaqqa ancha sumaqllañan rikukusharan... chaymi makinwan p’itispa mijuran. Bibliaqa willanmi chaymanta ima pasasqanta, ninmi: “P’itispataq mijuykuran, jinaspa qosanman jaywariran, jinan paypas mijuykullarantaq”, nispa (Génesis 3:6).

¡Diosqa may llakisqachá sientekuran munakusqan wawankuna mana kasukusqankumantaqa! ¿Imatan Jehová Dios Adanta niran? Kaytan niran: “Jump’iykita jich’arispan mijunata tarinki ruwasqa kasqayki allpaman tukunaykikama, ñut’u allpan kanki, ñut’u allpamantaqmi tukupunki”, nispa (Génesis 3:17-19). Chhaynapunin karan, “Adanmi kausaran isqon pachaj kinsa chunka watakama, jinaspan wañukapuran” (Génesis 5:5). Adanqa wañuspaqa manan cielomanchu riran nitaqmi  juj lugarmanpaschu. Jehová Dios Adanta manaraq allpamanta kamashaqtinqa manan maypipas kausaranchu, wañupuspataq allpaman tukupuran, chaypin kausayninqa tukukapuran.

Adanwan Evawanmi Diosta mana kasukuspa juchallikuranku, chhaynapitaq wiñay kausayta chinkachipuranku. Chaymantapachan manaña ch’uyachu kapuranku aswanpas juchayoq. Juchallikusqankuqa manan paykunallatachu afectaran, aswanpas mirayninkunatawanmi. Romanos 5:12 texton nin: “Chhaynaqa, juj runallawanmi juchaqa kay pachapi rijuriran, wañuytaq jucharayku rijuriran; chhaynapin wañuyqa llapa runaman chayaran llapallanku juchallikusqankurayku”, nispa.

Biblian willan wañuyqa qatana jinas llaqtakunaq uyanta qataykun otaq llapa nacionkunata (Isaías 25:7). Wañuyqa venenoyoq q’osñi jinan runakunata wañuchishan, chaymantaqa manan pipas ayqeyta atinmanchu. Arí, ‘Adanpa causanpin lliu runa wañushanku’ (1 Corintios 15:22). Noqanchispas apóstol Pablo jinan tapukunchis, paymi tapukuran: “¿Pitaq kay wañuyman aysaqniy cuerpomantari librawanqa?”, nispa. ¿Pin librawasunman? (Romanos 7:24.)