1. ¿Imakunapi tarikuspan mayninpi nishutapuni manchakusunman?

 YACHASUN Néstor hermanonchismanta María esposanmantawan. * Paykunaqa Diosmanta willanapaq necesitakusqan llaqtamansi astakuyta munasqaku, chaypaqmi ichaqa imachus kaqnillankuwan kausayta yachananku karqan, chaymantas paykunaqa manchasqa llakisqa ima kasharqanku. Paykunaqa piensarqankus pisillawan kausaspaqa mana kusisqachu kanankuta. Kunanqa Biniam hermanonchismantañataq yachasun. Paypa tiyasqan llaqtapiqa manan munankuchu Diosmanta willananchista. Chaysi iñiqmasinchisqa bautizakusqan qhepaman reparasqa qatiykachasqa kananta, chayraykus payqa manchasqa kasharqan. Ichaqa astawanraqsi manchakusqa Jehová Diospa testigon kapusqanta familianman willayta. Yachallasuntaq Valeria hermananchismanta. Paypiqa cáncer onqoytas tarisqaku, chaysi payqa jampichikunanpaq imaymana sasachakuykunapi tarikusqa. Ichaqa Jehová Diosta kasukuyta munasqanraykus mana yawarllawan jampichikuyta munasqa. Ichaqa manas juj doctorta tarisqachu mana yawarllawan operanankupaq. Chhaynapi tarikuspas payqa sinchi manchasqa kasharqan wañuyta manchakusqanrayku.

2. ¿Imaraykun kallpachakunanchis sasachakuykunapi tarikuspa ama nishuta manchakunanchispaq?

² Wakinninchisqa yaqapaschá chhayna sasachakuykunapi tarikuspa nishutapuni manchakurqanchis. Ichaqa sichus chay manchakuyninchista mana atipasunchu chayqa manan allinchu kanman. Nishutapuni imatapas manchakuspaqa manan allintachu imatapas ruwasunman, Jehová Diosmantapas karunchakusunmanmi. Satanasqa munanmi sasachakuykunapi tarikuspa nishutapuni manchakunanchista,  chhaynapi Jehová Diospa kamachikuyninkunata ama kasukunanchispaq, Diospa gobiernonmanta allin willakuykunatapas ama willananchispaq (Apo. 12:17). Satanasqa sinchi millay angelmi, payqa munanmi sasachakuykunapi tarikuspa nishuta manchakunanchista. Ichaqa, ¿iman yanapawasunman ama nishuta manchakunanchispaq?

3. ¿Imapi piensaymi yanapawasun ama nishuta manchakunanchispaq?

³ Saqra ama nishuta imawanpas manchachiwananchispaqqa Jehová Diospa munakuwasqanchispin piensananchis. Jehová Diosqa noqanchiswanmi kashan, manan jayk’aqpas saqerpariwasunchu (Sal. 118:6). Yachasun Salmos 118 capitulota qelqaq runamanta. Payqa imaymana sasachakuykunapin tarikurqan. Paytaqa askha runakunan cheqnikurqanku, paykunamanta wakinqa autoridadniyoq runakunan karqanku (Sal. 118:9, 10). Jinaspapas paytaqa mana chanintan ruwarqanku (Sal. 118:13). Chaymantapas Jehová Diosmi paytaqa wanachirqan (Sal. 118:18). Chhayna sasachakuykunapiña tarikurqan chaypas nirqanmi: “Manan manchakunichu”, nispa. ¿Imaraykun chhaynata nirqan? Wanachisqaña karqan chaypas payqa allintan yacharqan Jehová Diospa munakusqanta, sasachakuykunapi tarikuqtinpas yanapashanallanta (Sal. 118:29).

4. ¿Ima sasachakuykunata atipananchispaqmi yanapawasun Jehová Diospa munakuwasqanchispi piensay?

⁴ Jehová Diosqa sapankanchistan anchatapuni munakuwanchis. Chhayna munakuwasqanchismantaqa manapunin iskayananchischu. ¿Imakunapin Jehová Diospa munakuwasqanchispi piensay yanapawasunman? Juj) Familianchis uywaymanta ama nishuta llakikunanchispaq. Iskay) Runakunata ama nishuta manchakunanchispaq. Kinsa) Wañuyta ama nishuta manchakunanchispaq. Ñaupaq kaq parrafopi yachamusqanchis iñiqmasinchiskunaqa sasachakuykunapi tarikuspan nishutapuni manchakurqanku, ichaqa Jehová Diospa munakusqanpi piensaymi paykunataqa yanaparqan.

5. ¿Imakunamantan familiankuta umalliq iñiqmasinchiskuna nishuta llakikunkuman? (Qhaway tapanpi kaq fotota).

⁵ Iñiq t’aqapi familiankuta umalliq hermanonchiskunaqa tukuy atisqankutan kallpachakunku familiankuman necesitasqankuta qonankupaq, cuidanankupaq ima (1 Tim. 5:8). Ichaqa yaqapaschá kay coronavirus onqoy rijurimusqanrayku nishuta llank’anankumanta llakikurqanku. Yaqapaschá nirqanku: “Kay llank’anayta chinkarachispari, ¿imaywantaq familiayta uywasaq? ¿Imawantaq wasimantapas luzmantapas unumantapas pagasaq? Kay llank’anata saqeruspaqa manapaschá juj llank’anataqa tarikusaqchu”, nispa. Chaymantapas wakinninchisqa yaqapaschá Néstor, María iñiqmasinchiskuna jina manchakurqanchis pisi qolqellawan familianchista uywayta. Satanasqa chaykunamanta nishuta llakikunanchistan munan, chhaynapi Jehová Diosta pisi-pisimanta amaña servinanchispaq. Wakin iñiqmasinchiskunaqa chaykunamanta nishuta llakikuspan pisi-pisimanta Jehová Diosmanta t’aqakapurqanku.

6. ¿Imayna piensananchistan Satanás munan?

⁶ Wakinninchisqa yaqapaschá juchasapa kasqanchisrayku nisunman: “Jehová Diosqa manan noqamantaqa llakikunchu. Payqa manapaschá familiayta uywanaypaqqa yanapawanqachu”, nispa. Chhaynata piensayqa manapunin allinchu. Satanasqa chhayna piensananchistan munan, chhaynapi Jehová Diosta saqesparaq tukuy tiempo llank’anaman qokunanchista, kamachikuyninkunatapas mana kasukunanchista.

7. ¿Imanirqanmi Jesús taytan Jehová Diosmanta?

⁷ Jesusqa Jehová Diosta allinta reqsisqanraykun nirqan: “Yayaykichisqa manaraq mañakushaqtiykichismi yachanña imakunatachus necesitasqaykichista”, nispa (Mat. 6:8). Jesuspa nisqan jina Jehová Diosqa liston kashan llapa necesitasqanchista qowananchispaq. Noqanchisqa Jehová Diospa familianmi kanchis, paymi  llapanchistapas umalliwanchis. Chhaynaqa, ¿manachu umalliwaqninchis Jehová Dios llapa necesitasqanchista qowasunman? Arí, Jehová Diosqa llapa necesitasqanchistan noqanchismanpas familianchismanpas qowasunchis (1 Timoteo 5:8).

8. a) ¿Imapi piensaymi yanapawasun familianchista uywaymanta ama nishuta llakikunanchispaq? (Mateo 6:31-33). b) Fotopi rikusqanchis jina, ¿imatan noqanchispas chay casarasqa iñiqmasinchiskuna jina ruwasunman?

⁸ Sichus Jehová Diospa munakuwasqanchispi piensasunchis chayqa manan nishutachu familianchista uywaymantaqa llakikusunchis, aswanpas Jehová Diospa yanapayninpin confiasunchis (leey Mateo 6:31-33). Jehová Diosqa munakuwasqanchisraykun askhanpi necesitasqanchista qowasunchis. Chaytan kay pachata kamashaspapas ruwarqan. Payqa necesitasqanchismantapas mastaraqmi imaymanata kausananchispaq kamapuwarqanchis (Gén. 2:9). Pisillaña kausananchispaq kanman chaypas chaykunamantan Jehová Diosta “gracias” ninanchis. Jehová Diosqa manan imanchistapas faltachiwanchischu, sapa p’unchaymi mijunanchista qowanchis (Mat. 6:11). Pisichikusunmanña kay tiempopi chaypas manan necesitasqanchistaqa faltachiwasunchu, jamuq tiempopipas junt’asqatan llapa necesitasqanchista qowasunchis. Chaytan Néstor hermanonchispas María esposanwan repararqanku (Isa. 65:21, 22).

9. ¿Imatan Néstor iñiqmasinchismanta María esposanmantawan yachasunman?

⁹ Kunanqa astawan yachasun Néstor iñiqmasinchismanta María esposanmantawan. Paykunaqa Colombia nacionpis tiyarqanku, allin wasiyoq allin llank’anayoq imas karqanku. Paykunan ninku: “Noqaykuqa Diosmanta willanapaq necesitakusqan llaqtamanmi astakuyta munarqayku, chhaynapi Jehová Diosta astawan servinaykupaq. Ichaqa manchakusharqaykun pisillawan kausayta”, nispa. ¿Iman paykunata yanaparqan chaykunamanta ama nishuta llakikunankupaq? Paykunataqa yanaparqan Jehová Dios tukuy tiempo yanapasqanta yuyariymi. Chaysi paykunaqa wasinkutapas allin llank’anankutapas saqespa Diosmanta willanapaq necesitakusqan ladoman astakusqaku. Néstor iñiqmasinchismi nin: “Jehová Diosqa Mateo 6:33 textopi nisqanman jinan tukuy imaymana necesitasqaykuta qowarqanku, chaymi kusisqa Jehová Diosta servishayku”, nispa.

10. ¿Imaraykun wakin runakuna runamasinkuta manchakunku?

¹⁰ Runakunaqa ñaupa tiempomantapachan runamasinkuta mana chaninta ruwanku (Ecl. 8:9). Wakin runakunaqa autoridadniyoq kasqankuraykun runamasinkuta k’aminku, pisichanku, wañuchinku ima. Familia ukhupipas millaytan k’aminakunku  maqanakunku ima. Chaymi runakunaqa runamasinkuta manchakunku.

11, 12. ¿Pikunata manchakunanchistan Satanás munan?

¹¹ Satanasqa munanmi runamasinchista manchakunanchista, chhaynapi Jehová Diospa kamachikuyninkunata ama kasukunanchispaq, Diospa gobiernonmanta allin willakuykunatapas ama willananchispaq. Chaymi Satanasqa gobiernokunata tanqan qatiykachawananchispaq (Luc. 21:12; Apo. 2:10). Chaymantapas wakin runakunatan tanqan Diospa llaqtanmanta mana chaninta rimanankupaq. Chayraykun wakin runakunaqa cheqnikuwanchis, k’amiwanchis, maqawanchis ima. Satanasqa ñaupa tiempomantapachan Jehová Dios serviqkunata chhaynata manchachishan (Mat. 10:36). Ñaupa tiempopi cristianokunapas chhayna qatiykachasqan karqanku (Hech. 5:27, 28, 40).

¹² Ichaqa manan gobiernokunallawanchu Satanasqa manchachiwanchis. Chaymantapas Satanasqa munanmi familianchista manchakunanchista. Wakin iñiqmasinchiskunaqa manchakunkun Jehová Diospa testigon kapusqankuta familiankuman willayta. ¿Imarayku? Familiankuta munakusqankurayku, phiñachiyta mana munasqankurayku. Paykunaqa munankun familianku Jehová Diosta servinankuta, ichaqa Jehová Diosmantapas llaqtanmantapas mana allinta rimasqankuta uyarispan llakikunku. Chhaynaña kaqtinpas wakin iñiqmasinchiskunaq familianqa pisi-pisimantan Jehová Diosmanta yachayta munarqanku, kunanqa hermanonchiskunañan kapunku. Ichaqa, ¿imatan ruwasunman mayqen familianchispas cheqnikapuwaqtinchis?

13. ¿Imaraykun mana nishutachu llakikunanchis Jehová Diosta servisqanchisrayku familianchis cheqnikuwaqtinchis? (Salmos 27:10).

¹³ Salmos 27:10 textoq nisqanqa anchatapunin kallpachawanchis (leey Salmos 27:10). Sichus Jehová Diospa munakuwasqanchispi piensasunchis chayqa manan nishutachu llakikusunchis familianchisña cheqnikuwasunman chaypas. Jehová Diosqa tukuy chaykuna aguantasqanchismantan bendeciwasun. Payqa llapa necesitasqanchistan qowasunchis, kallpachawasunchis, iñiyninchispipas yanapawasunchis. Manapunin pay jina munakuq Diosqa kanchu. Chhayna kasqantan Biniam hermanonchispas repararqan.

14. ¿Imatan yachasunman Biniam hermanonchismanta?

¹⁴ Biniam hermanonchisqa yacharqanmi bautizakusqan qhepamanqa gobiernokuna payta qatiykachananta. Chhaynaña kaqtinpas bautizakapurqanmi, jinaspa Jehová Diospa testigon kapurqan. Paymi nin: “Gobiernokunaqa sinchitan qatiykachawarqanku, chaymi mayninpiqa nishuta manchakurqani. Chhaynaña kaqtinpas familiaytan astawanqa manchakurqani. Noqaqa  manchakurqanin Jehová Diospa testigon kapusqayta familiaymanpas papaymanpas willayta. Noqaqa manan munarqanichu papayta llakichiyta”, nispa. ¿Iman Biniam iñiqmasinchista yanaparqan ama nishuta manchakunanpaq? Payqa yacharqanmi Jehová Dios munakusqanta yanapanantapas. Chaymi nillantaq: “Noqaqa piensarqanin imaynatas Jehová Dios pisichikuypi tarikuq hermanokunatapas, k’amisqa, pisichasqa hermanokunatapas yanaparqan chayta. Chaymi yanapawarqan Jehová Diosman jap’ipakunaypaq. Noqataqa carcelmanmi wisq’awarqanku maqawarqanku ima. Ichaqa chhayna sasachakuykunapi tarikushaspan repararqani Jehová Diospa munakuwasqanta. Jehová Diosqa yanapanmi payta kasukuq runakunataqa”, nispa. Biniam hermanonchisqa papanta jinan Jehová Diosta qhawarin, hermanokunatapas familianta jinan munakun.

15. ¿Imaraykun mayninpi wañuyta manchakunchis?

¹⁵ Bibliaq nisqan jina wañuyqa juj jatun enemigonchismi (1 Cor. 15:25, 26). Ichaqa nishuta wañuyta manchakuspaqa pisikallpayasunmanmi, astawanqa mayqen familianchispas onqopuqtin. ¿Imaraykun wañuyta manchakunchis? Wiñayta kausananchispaq kamasqa kasqanchisrayku. Jehová Diosqa manan wañunanchispaqchu kamawarqanchis (Ecl. 3:11). Pisillata wañuyta manchakuyqa allinmi mayninpiqa kanman. ¿Imarayku? Pisillata manchakuymi yanapawanchis allinta cuidakuspa imatapas ruwananchispaq, allinta mijunanchispaq, ejerciciota ruwananchispaq, doctorwan saludninchista qhawachikunanchispaq ima.

16. ¿Imakunatan Satanás ruwan wañuyta manchakusqanchirayku?

¹⁶ Runakunaqa munanchismi wiñaypaq kausayta, chayraykun imaymanata ruwanchis astawan kausananchispaq. Satanasmi ichaqa munan vidanchista salvananchisrayku Jehová Diosta saqerparinanchista, kamachikuyninkunatapas mana kasukunanchista (Job 2:4, 5). Satanasqa atiyniyoqmi runakunata wañuchinanpaq. Chaymi payqa munan wañuyta manchakunanchista (Heb. 2:14, 15). Chaymantapas Satanasqa runakunatan tanqan k’amiwananchispaq otaq mana allintapas ruwawananchispaq, chhaynapi Jehová Diosta amaña servinanchispaq. Chaymantapas Satanasqa munanmi sinchita onqospa Jehová Diospa kamachikuyninkunata mana kasukunanchista. Onqosqa kaqtinchisqa yaqapaschá familianchiskunapas doctorkunapas mat’ipayawasunman yawarwan jampichikunanchispaq, chhaynapi Jehová Diospa kamachikuyninkunata ama kasukunanchispaq.

17. Romanos 8:37-39 nisqan jina, ¿imaraykun mana nishutachu wañuyta manchakunanchis?

¹⁷ Manan pipas wañuytaqa munanchischu, ichaqa wañusunmanña chaypas Jehová Diosqa munakuwashallasunpunin (leey Romanos 8:37-39). Jehová Diosqa yuyashallanmi wañupusqan amigonkunataqa, wañupurqankuña chaypas Jehová Diospaqqa kausashankumanpas jinan yuyayninpi kashanku (Luc. 20:37, 38). Jehová Diosqa anchatapunin munashan wañupuq amigonkunata jujmanta kausarichimpuyta (Job 14:15). Chayraykun Jehová Diosqa wawan Jesustapas kachamurqan noqanchisrayku wañunanpaq, chhaynapi wiñay kausayniyoq kananchispaq (Juan 3:16). Jehová Diosqa anchatan munakuwanchis, cuidawasuntaqmi kanpas. Runakunaña cheqnikuwasunman, wañuchiytaña munawasunman chaypas manan Jehová Diosmantaqa t’aqakunanchischu. Aswanpas allin yachayta kallpanta iman mañakunanchis payta kasukushanallanchispaq. Chaytan Valeria hermananchispas qosanpiwan ruwarqanku (Sal. 41:3).

18. ¿Imatan yachasunman Valeria hermananchismanta?

¹⁸ Astawan yachasun Valeria hermananchismanta. Paytaqa 35 watanpi kashaqtinsi cáncer onqoyta tarisqaku. Ichaqa Jehová Diospa munakusqanta yuyariysi yanapasqa ama nishuta wañuyta manchakunanpaq. Paymi nin: “Noqaqa manan piensarqanichu chay onqoyniyoq kanaypaqqa. Ichaqa doctorkunan niwarqanku usqhaylla operachikunaypaq. Chayraykun doctorkunata maskharqani ama yawarllawan operawanankupaq, ichaqa  manan munarqankuchu, chaymi sinchi manchasqa kasharqani. Chhaynaña kaqtinpas Jehová Diostan kasukuyta munarqani mana yawarllawan operachikuspa. Noqaqa tukuy tiempon Jehová Diospa munakuwasqanta repararqani, chaymi kallpachakurqani noqapas payta munakusqayta rikuchinaypaq. Manaña wakin doctorkuna mana yawarllawan operayta munawarqankuchu chaypas kallpachasqan kasharqani. Noqaqa Jehová Diostan kusichiyta munarqani, manan Saqratachu. Tiempowanqa mana yawarllawanmi operawarqanku, mana yawarllawan operawasqankuqa ancha allinpunin karqan. Mayninpiqa manan allinchu kani, chhaynaña kaqtinpas manapunin Jehová Diosqa saqerpariwanchu. Payqa anchatapunin munakuwan. Chaymi manaraq cáncer onqoyniyoq kasqayta yachashaspapas juñunakuypi yachamurqayku “Tukuy kallpawan sasachaykunata atipasun” nisqa yachachikuymanta. * Chaymanta yachasqaykuqa anchatapunin yanapawarqanku, chaytaqa sapa kutillanmi qosaywan kuska estudiaq kayku. Chhayna yachachikuykunawanmi Jehová Diosqa yanapawarqanku wañuyta ama nishuta manchakunaykupaq, aswanpas payta kasukunaykupaq”, nispa.

19. ¿Iman pisi tiempollamanta pasanqa?

¹⁹ Kay tiempopi wakin hermanonchiskunaqa pachantinpin imaymana sasachakuykunata atipaspa Satanaspa contranpi churakushanku, jinaspa Jehová Diosta kusichishanku kamachikuyninkunata kasukuspa (1 Ped. 5:8, 9). Chhaynaqa noqanchispas atisunmanmi Satanaspa contranpi churakuytaqa. Pisi tiempollamantan Jehová Diosqa wawan Jesusta paywan kuska kamachikuqkunatawan ninqa “Saqraq imachus ruwasqankunata ch’usaqman tukuchinankupaq” (1 Juan 3:8). Chay qhepamanqa manañan imatapas manchakusunchisñachu (Isa. 54:14; Miq. 4:4). Chay p’unchay chayamunankamaqa manapunin ima sasachakuykunapiña tarikuspapas nishutaqa llakikunanchischu.

20. ¿Imakunapi piensaymi yanapawasun manchakuyta atipananchispaq?

²⁰ ¿Iman yanapawasun sasachakuykunapi tarikuspa ama nishuta manchakunanchispaq? Jehová Diospa munakuwasqanchispi piensaymi yanapawasun. Payqa manan jayk’aqpas saqerpariwasunchu, aswanpas tukuy tiempon cuidawasunchis. Chaymantapas piensananchismi imaynatas Jehová Dios sasachakuypi tarikuq iñiqmasinchiskunata yanaparqan chayta, imaynatas noqanchistapas yanapawarqanchis chaytapas. Jehová Diospa yanapayninwanqa atipasunmi ima manchakuyninchistapas (Sal. 34:4).