Leeqkunaq tapukuynin

¿Pikunatan apóstol Pablo 2 Corintios 6:14 textopi “mana iñiqkuna” nispa nisharqan?

2 Corintios 6:14 textopin nishan: “Amapuni mana iñiqkunawanqa yugomanpas watasqa kashawaqchis jinataqa jujllachakuychischu”, nispa. Chayta nispaqa apóstol Pabloqa rimasharqan Diospa llaqtanpi mana kashaqkunamantan. Juj versiculokunapipas paykunamantaqa rimallarqantaqmi.

1 Corintios 6:6 textopin apóstol Pablo wakin cristianokunata anyasharan iñiqmasinkunata mana iñiq juezkunaq ñaupaqenpi juzgasqa kanankupaq apasqankumanta. Chay juezkunaqa Corinto llaqtapin juzgarqanku, paykunaqa manan iñiq t’aqamantachu karqanku. Chaymantapas iskay kaq carta qelqasqanpin apóstol Pablo nirqan: “Satanasmi mana iñiqkunaq yuyayninta tutayachin”, nispa. Paykunaq ñawintapas Satanás juj telawan taparunman jinan kasharqanku, chaymi paykunaqa mana munarqankuchu Jehová Dios serviyta. “Jehová Diosman kutirikuqmi ichaqa chay tapaq telamanta llat’asqa kapun” (2 Corintios 3:16; 4:4).

Chaymantapas wakin mana iñiq runakunaqa millaykunatan ruwanku, idolokunatataqmi yupaychankupas (2 Corintios 6:15, 16). Ichaqa manan llapankuchu Jehová Dios serviqkunaq contranpiqa kanku. Wakinqa uyarikunkun Diospa siminta, jujkunataq casarasqa kashanku Jehová Diosta serviq iñiqmasikunawan, manataqmi munankuchu paykunamanta t’aqakuyta (1 Corintios 7:12-14; 10:27; 14:22-25; 1 Pedro 3:1, 2). Chay jinaqa mana iñiqkuna nispaqa nisunman pikunachus Diospa llaqtanpi mana kashankuchu paykunatan. Diospa llaqtanpiqa “Señorpi iñiqkunallan” kashanku (Hechos 2:41; 5:14; 8:12, 13).

2 Corintios 6:14 textopi yachachikuyqa llapa cristianokunatan allinta yanapan, astawanqa casarakuy munaqkunatan yanapan (Mateo 19:4-6). Jehová Diosta serviq bautizasqa cristianoqa allinta yuyaykuspan imatapas ruwanan, chaymi mana casarakunanchu Diosta mana serviq runawanqa. Yachasqanchis jina Jehová Diospi mana iñiqkunaqa manan kasukunkuchu Diospa kamachikuyninkunata, manataqmi Dios serviytapas ñaupaqman churankuchu.

Ichaqa, ¿imanisunmantaq Bibliata estudiaspa juñunakuyman jamuqkunamanta, noqanchiswan kuska Diosmanta willaqkunamantapas? ¿Paykunapas mana iñiqkunachu kanku? Manan. Pikunachus allin willakuykunata uyarispanku kallpachakushanku bautizakunankupaq chayqa, manan paykunataqa mana iñiqkuna nispaqa nisunmanchu (Romanos 10:10; 2 Corintios 4:13). Ñaupaq tiempopipas Cornelio sutiyoq runatan manaraq bautizakushaqtin Dios sonqo runata jinaña reqsikuran (Hechos 10:2).

Chhaynaqa wakinqa ninmanpaschá: “Ñataq juj runa noqanchiswan kuska Diosmanta willaq lloqsishanña chayqa, allillanmi kanman paywan casarakuyqa”, nispa. Manaña 2 Corintios 6:14 textoq contranpichu ruwashanman chaypas, chay ruwasqanqa manan allinchu kanman. Chayta reparanapaq yuyarisun imatachus apóstol Pablo viuda cristianakunata nisqanta, paymi nirqan: “Libre kashan pi munasqanwanpas casarakunanpaq, ichaqa Señorpi iñiqllawanmi kanan”, nispa (1 Corintios 7:39). Chaymi cristianokunata kallpachakun Señorpi iñiqllawan casarakunankupaq.

¿Imatan apóstol Pablo nisharan “Señorpi iñiqllawan” nispa nisqanwan? Romanos 16:8-10; Colosenses 4:7, textokunapin Pabloqa Señorpi iñiqkunamanta rimaran. Chay textokunata leespan reparanchis paykunaqa Pabloq llank’aqmasin kasqankuta, paypa allin qhawarisqa kasqankuta, iñiqmasinkuna kasqankuta, Señorpa kamachinkuna kasqankuta, allin iñiyniyoq kasqankutapas.

¿Jayk’aqmi juj runa Señorpa kamachinman tukupun? Chayqa pasan payllamanta Jesuspa kamachinman tukuspanmi, chaypaqqa pay kikintan negakapun. Jesusmi nirqan: “Pipas qhepayta jamuyta munaqqa pay kikinta negakuchun, jinaspa ñak’arina k’aspinta apaspa qhepayta jamushallachun”, nispa (Mateo 16:24). Diosta servinanpaq prometekuspan Jesusta qatikuyta qallarin. Chay qhepamantaq bautizakun, chayta ruwaspan chay runaqa Jehová Diospaq allin qhawarisqan kapun. * Chay jinaqa Señorpi iñiqllawan casarakuyta munaqqa, “Diospa, jinallataq Señor Jesucristoq kamachinwanmi” casarakunan (Santiago 1:1).

Sichus juj runa Jehová Diospa testigonkunawan Bibliata estudiashan kallpachakushantaq iñiyninpi wiñananpaq chayqa, allintan ruwashan. Ichaqa manaraqmi Jehová Diosman prometekunchu, Dios serviytapas manaraqmi vidanpi ñaupaqman churanraqchu, payqa imaymanapiraqmi cambianan kashan, chayta ruwaspallan Diosman prometekuspa bautizakunman, chay qhepamanña casarakuypiqa piensanan.

Wakinqa ninmanpaschá: Yaqapaschá Diosmanta willaq runawan noviazgopi kanman, jinaspa suyanman bautizakunanta, chay qhepaman paywan casarakunaypaq”, nispa. Chayta ruwayqa manan allinchu kanman. Chayta ruwaqtinqa yaqaspachá chay runaqa iñiqmasinchiswan casarakunanraykulla bautizakunman, manataq Jehová Diosta munakusqanraykuchu.

Noqanchiswan kuska Diosmanta willaq runaqa juj tiempollan chhaynapiqa tarikun, chay qhepamantaq iñiyninpi wiñaspa bautizakapun. Chaymi Señorpi iñiqllawan casarakuymanta kamachikuyta kasukuyqa mana nishu sasachu. Ichaqa, yaqapaschá juj tayta-mama Jehová Diospa testigonkuna kanku, wawantaq ichaqa askha watakunaña Diosmanta willaq lloqsishan. Payqa ñapaschá casarakunanpaq jinaña kashan. Chhayna kaqtinqa, ¿imataq paytari jark’aran Diosman prometekuspa bautizakunanpaq? ¿Imarayku iskayashanraq chayta ruwananmanta? Icha, ¿iskayashanchu Diospa llaqtanpi kasqanmanta? Manaña “mana iñiq runa” nispachu nisunman chaypas, manaraqmi Señorpi iñiqta jinaqa qhawarisunmanchu.

Apóstol Pablo iñiqmasinllanchiswan casarakunanchispaq kamachikuyta nisqanqa allinninchispaqmi (Isaías 48:17). Sichus juj iñiqmasikuna Jehová Diosta servishanku jinaspa rimanakunku casarakunankupaq chayqa, chay ruwasqankuqa allinmi kashan, allintataqmi paykunaqa iñiyninkupi yanapanakunqaku. Mana sasachakuspallan Diospa kamachikuyninkunatapas kasukunqaku, iskayninkutaq Jehová Dios serviyta ñaupaqman vidankupi churanqaku, chayta ruwaspataq kusisqa kanqaku. Chaymantapas Señorpi iñiqllawan casarakuspaqa Jehová Diostan sonqomanta munakushanku, chaymi paykunaqa wiñaypaq bendicionkunata chaskinqaku. Bibliapin nin: “Señor Diosníy, junt’aqpaqqa junt’aqllataqmi kanki”, nispa (Salmos 18:25, Diospa Simin Qelqa).

[Nota]

[Foto]

‘ Señor Diosníy, junt’aqpaqqa junt’aqllataqmi kanki’