ASKHA wayna-sipas Testigokunan Diosta astawan servinankurayku tukuy kaqninkuta pisiyachishanku (Mat. 6:22). ¿Imakunatan chaypaq ruwashanku? ¿Ima sasachakuykunan paykunapaq kan? Chayta yachanapaq México nacionpi predicaypi yanapakuq wakin iñiqmasikunamanta yachasun.

Dustin, Jassa iñiqmasikunan Estados Unidos nacionmanta kanku, 2007 watapitaq casarakurqanku. Paykunaqa ñawpaqmantapacha munasqankuman hinan huk barcota rantikurqanku, chaypi huk wata tiyanankupaqtaq rimarqanku. Barconkutan sayachirqanku Astoria llaqtapi (Oregón, Estados Unidos), chay llaqtaqa océano Pacífico lamar-qochaq qayllanpin tarikun, munay sach’a-sach’a campokunayoq rit’i orqokunayoqmi kanpas. Dustin nin: “Munaypunin chay llaqtapi campokunaqa”, nispa. Paykunaqa 8 metroyoq hina barcopin tiyarqanku, kuskan p’unchaylla llank’aqku, huk simipi kaq iñiq t’aqapi yanapakurqanku, maynintaq precursor auxiliar karqanku, chaymi niqku: “Pisillawan kawsaqmi kanchis”, nispa. Qhepamanmi ichaqa repararqanku huk ruwaykunapi ñawpaqtaqa afanakushasqankuta. Dustin nin: “Iñiq t’aqaykupi astawan llank’anaykumantaqa barco allichay afanpin kaq kayku. Diosta ñawpaqta serviyta munaspaqa kawsayniykutan cambianayku karqan”, nispa.

 Jassa nin: “Manaraq casarakushaspan México nacionpi tiyarqani, chaypin inglés simi iñiq t’aqapi yanapakurqani. Ancha kusikuytan chaypi tarirqani chaymi chayman kutiyta munarqani”, nispa. Huk nacionpi yanapakuy yuyaywanmi paykunaqa, yanapanata necesitaq llaqtakunaman ripuq iñiqmasikunaq kawsayninmanta familiantin Diosta yupaychasqankupi qelqakunata leeyta qallarirqanku (Juan 4:35). Dustin nin: “Paykuna hinan kusisqa kayta munarqayku”, nispa. Chay qhepamanmi amigonkuna willarqanku México nacionpi huk huch’uy t’aqapi yanapana necesitasqankuta. Hinan paykunaqa chay nacionman ripunankupaq decidikurqanku, chaypaqtaq llank’anankuta saqerqanku, barconkutapas vendepurqanku.

Dustin, Jassa iñiqmasikunaqa Tecomán llaqtamanmi ripurqanku, chay llaqtapas océano Pacífico lamar-qochaq qayllanpin tarikun, ichaqa Astoria llaqtamantaqa 4.300 kilómetro hina karupiraqmi kashan. Dustin nin: “Kay llaqtaqa sinchi q’oñin tukuy ladopitaq limón sach’akuna kan”, nispa. Chay llaqtaman chayaspaqa manan llank’anata tariyta atirqankuchu manataqmi qolqenkupas karqanchu, chaymi sapa p’unchay arrozniyoq frijol-llata mikhuqku. Jassan nin: “Amikusharaykuñan kaqllata mikhuspa, chayllamanmi estudiantekuna qoykuwarqanku mangokunata, platanokunata, papayakunata, limontapas bolsapi hunt’ata”, nispa. Chay qhepamanmi Internetllapi huk simi rimayta yachachirqanku Taiwán nacionpi tarikuq escuelapaq. Chaypi qolqe ganasqankun tukuy necesitasqankupaq aypan.

¿Kusisqachu chay iñiqmasikuna kashanku? Paykunan ninku: “Allinpaqmi kaymanqa hampuyku. Kaypi kaspaykun astawan Jehová Diosman asuykuyku, casado kawsayniykupipas kusisqa kashayku. Sapa p’unchaymi kuska predicacionman lloqsiyku, huñunakuykunapaq kuska preparakuyku, parlashallayku estudiantekunata imaynata yanapanaykupaqpas. Kunanqa manañan yanqa ruwaykunapichu afanakuyku. Chayraqmi allinta entiendeyku Salmo 34:8 textoq nisqanta, chaypin nin: ‘Reqsiykuychis, hinaspa rikuychis may sumaqchus Señor Diosqa kashasqanta’, nispa”, nispa.

2.900 hina iñiqmasikunan México nacionman ripunku necesitakusqan llaqtakunapi yanapakunankupaq, wakinqa solteron kanku wakintaq casado, 20 watayoqmanta 40 watayoqkama. ¿Imaraykun chay iñiqmasikuna huk llaqtakunapi yanapakunku? Chayta tapuqtinkun wakin iñiqmasikuna kinsamanta willarqanku. Chaymanta yachasun.

 Jehová Diosta runamasikunatawan munakuspa. Leticia iñiqmasin 18 watanpi bautizakurqan, paymi nin: ‘Entienderqanin Diosman prometekuqqa tukuy sonqowan Diosta servinan kasqanta. Chaymi tukuy sonqoywan munakusqayta rikuchinaypaq, tukuy tiempoywan tukuy kallpaywan payta serviyta munarqani’, nispa (Mar. 12:30). Hermilo iñiqmasipas 20 watanpi kashaspan predicaypi yanapanata necesitakusqan llaqtaman ripurqan. Paymi nin: “Runamasinchisman Diosmanta yachachispan paykuna munakusqanchistaqa rikuchinchis”, nispa (Mar. 12:31). Payqa Monterrey allin llaqtapin tiyarqan, bancopin llank’aq manataqmi imanpas pisiqchu, ichaqa chaykunata saqespan huk huch’uy llaqtaman ripurqan. Kunanqa Leticiawanmi casarasqa kashan.

Kusisqa kawsanapaq. Leticiaqa bautizakusqan qhepallamanmi experienciayoq precursorawan huk llaqtata predicaq rirqanku, chaypitaqmi huk killa predicarqanku. Leticia nin: “Anchatan admirakurqani chaypi llank’asqaykumanta, chaypi runakunaqa sumaqtan uyarikuqku predicasqaykuta chaytaqmi kusichiwarqan. Chaypi huk killa kanaypaq hunt’akushaqtinmi nirqani: ‘¡Kaytan ñoqaqa ruwayta munani!’ nispa”, nispa. 20 watanpi hina kashaq Essly iñiqmasipas chay hinapin tarikurqan. Hukkunata kusisqata rikuspan paypas huk llaqtapi yanapakuyta munarqan. Chay qhepakunamanmi payqa huk llaqtakunapi tukuy sonqowan yanapakuq iñiqmasikunawan reqsinakurqan. Paymi nin: “Llapankutapas kusisqata rikuspan ñoqapas paykuna hina kayta munarqani”, nispa. Askha iñiqmasikunan Essly ruwasqanta hina ruwarqanku. México nacionpin 680 hina soltera iñiqmasikuna necesitakusqan llaqtakunapi yanapakushanku. ¡Paykunaqa allin ejemplon kanku llapa cristianokunapaq!

Allin kaqta ruwaspa kawsanapaq. Colegionta tukusqan qhepamanmi Essly iñiqmasiman universidadpaq huk becata munachirqanku. Chaymi huk wayna-sipaskuna kallpacharqanku chay becata chaskikunanpaq, chay hinapi profecional kananpaq, carrota rantikunanpaq, huk nacionkunata paseaq rinanpaq ima. Ichaqa manan chaytachu ruwarqan. Essly nin: “Askha iñiqmasi amigoykunan pisipaq qhawarirqanku Diosta astawan serviyta, chaymi qhapaq kay maskhaypi afanakurqanku. Chaykunata maskhasqankuraykun imaymana llakikuykunapi tarikurqanku. Ñoqaqa sipas kashaspan Diosta allinta serviyta munani”, nispa.

Essly iñiqmasiqa pisi tiempollapi tukunapaq carrerakunatan estudiarqan precursora kananpaq, chay qhepamantaq yanapanata necesitaq llaqtaman astakurqan. Hinaspapas otomí, tapanco nisqa simikunata yachananpaqmi kallpachakurqan. Huk llaqtakunapi yanapakusqanmanta willaspan nin:  “Necesitaq llaqtakunapi yanapakusqaymi yanapawan allin kaqta ruwaspa kawsanaypaq, chaymantan kusisqa kashani. Ichaqa chaykunamanta astawanqa Jehová Diostan kunanqa amigoyta hina munakuni”, nispa. Phillip, Racquel iñiqmasikunapas chay hinatan yuyaykunku. Paykunaqa Estados Unidos nacionmantan kanku 30 watankupi hinataqmi kashanku. Paykunan ninku: “Kay pachaqa hukniraymanmi tukupushan, chaymi runakunaqa mana ima ruwaytapas atinkuchu. Chaywanpas huk llaqtakunapi runakuna sumaqta uyarikusqankun rikuchiwanku allin kaqta ruwaspa kawsasqaykuta. ¡Kayta ruwayqa ancha allinpunin!” nispa.

Huk llaqtakunapi predicayqa sasachakuykunatan apamun. Huk sasachayqa kanman imawan kawsaymi. Chay sasachakuyta atipanapaqqa imaynatachus chay llaqtapi kawsasqankuman hinallan kawsana. Verónica iñiqmasin unayña precursora kashan, paymi nin: “Huk llaqtapin mikhunata wayk’uspa vendeq kani, huk llaqtapitaq p’achata vendeq kani otaq chukchata rutuq kani. Kunanqa huk wasita pichaspan llank’ashani, chayllaraq wawayoq tayta-mamakunamantaqmi yachachishani wawankuwan imayna parlayta”, nispa.

Hinaspapas sasan kanman huk runakunaq costumbrenman hina kawsay, astawanqa hawa llaqtakunaman rispa. Chay hina llaqtamanmi Phillip, Racquel iñiqmasikuna rirqanku. Phillip nin: “Chay llaqtapi runakunaq kawsayninqa huk hinapunin karqan”, nispa. ¿Iman paykunata yanaparqan chay llaqtapi yachakunankupaq? Phillip nillantaq: “Náhuatl runakunaqa huk hinallan familiankuwan kawsanku, sut’illanta rimanku, sumaq sonqo runakunataq kankupas, chaytan astawanqa qhawariq kayku”, nispa. Racquel nin: “Chay llaqtapi tiyaspa, chaypi iñiqmasikunawan Diosta servispan imaymanata yacharqayku”, nispa.

Yaqapaschá qanpas munashanki huk llaqtapi yanapakuyta, ichaqa ¿imatan ñawpaqta ruwanayki? Chhayna llank’aypi tarikuq iñiqmasikuna nisqanman hinan kayta ruwawaq: pisiyachiy ima kaqniykikunatapas, kallpachakuytaq kapuqnillaykiwan kawsanaykipaq (Filip. 4:11, 12). Letician nillantaq: “Manan munaqchu kani unaypaq munachiwasqanku llank’anakunata. Ñoqaqa libren kayta munarqani ima p’unchaypas huk llaqtaman yanapakuq rinaypaq”, nispa. Hermilo nin: “Mikhuna wayk’uyta, p’acha t’aqsayta planchayta iman yacharqani”, nispa. Verónica nin: “Tayta-mamallaywanraq tiyashaspan wasi pichaypi yanapakuq kani, pisi qolqellawan allin mikhunakunata wayk’uyta yacharqani, yacharqanitaqmi qolqe aypachikuytapas”, nispa.

Levi, Amelia iñiqmasikunan Estados Unidos nacionmanta kanku, 8 watañan casarakusqankumanta kashan. Paykunaqa Jehová Diosmantan imatapunichus munasqankuta sut’inta mañakusqaku, chaysi paykunata yanapasqa México nacionman yanapakuq rinankupaq. Levi nin: “Huk watapi predicanaykupaq hayk’a qolqeta necesitasqaykutan ñawpaqta qhawarirqayku, hinamanmi Diosmanta mañakurqayku chay qolqeta huñunaykupaq”, nispa. Pisi tiempollapi chay qolqeta huñuruspan yuyaykusqanku llaqtaman predicaq ripurqanku. Levi nin: “Jehová Diosqa mañakusqaykuman hinan kutichimuwarqanku. Chaymi ñoqaykuñataq mañakusqaykuman hina ruwanayku karqan”, nispa. Amelia nin: “Ñoqaykuqa huk watallan kaypi qhepakunayku karqan, ñataqmi qanchis wataña kashayku manataqmi kutipuyta munaykuchu. Kaypi kaspaykun Jehová Diospa qayllanpi sientekuyku, sapa p’unchaytaq yanapayninta chaskiyku”, nispa.

Estados Unidos nacionmanta Adam, Jennifer iñiqmasikunatapas Diosmanta mañakusqankun yanaparqan México nacionpi inglés simi iñiq t’aqapi yanapakunankupaq. Paykunan ninku: “Ama tukuy imapas allin kanantaraqchu suyay. Diosman willay huk ladopi yanapakuy munasqaykita chayman hinataq imatapas ruway. Pisillawan kawsayta yachay. Yanapakuyta munasqayki nacionpi sucursalman qelqay chaypi yanapakuy munasqaykimanta. Gastokunata qhawarispataq yuyaykusqaykiman hina ruway”, nispa. * Chaykunata ruwanki chayqa sumaq llank’ayman haykunaykipaq huk punkupas kicharikushanman hinan kanqa, chaytaqmi saminchaykunata apamusunki.