Lliwmi hanaq pachaman riyta munanku

YAQA llapa runakunan hanaq pachaman riyta munanku: musulmán, hindú, budista nisqa runakuna, “cristianon kayku” niqkunapas hinallataq mana religionniyoq wakin runakunapas. Hanaq pachamanta rimaspan askha runakuna ninku: “Chaypiqa manan ima llakikuypas kanchu, chaypin allin runakuna wañusqa familiankuwan tupanku”, nispa. Llapankuña hanaq pachaman riyta munanku chaypas, pisillan chayman rinankupaq wañuytaqa munanku.

Sichus wañuspa hanaq pachaman rinanchispaq kamasqa karqanchis chayqa, maytachá wañuyta munasunman. Imaynan wawaqa hatunña kayta munan, huk noviapas casarakunan p’unchayta kusisqa suyan chhaynatachá wañuyta munasunman. Ichaqa manan pipas wañuyta munanchischu.

Chhaynaña kaqtinpas askha religionpi umallikunan ninku: “Kay pachapiqa huk ratollan kashanchis, chaymantaqa hanaq pachamanmi ripusunchis”, nispa. Paykunamanta huk kaqninmi Washington llaqtamanta arzobispo. Paymi nirqan: “Hanaq pachapi tiyananchispaqmi kamasqa karqanchis, manan kay pachapaqchu”, nispa. Hinallataq Estados Unidospi Asociación Nacional de Evangélicos nisqamanta ex presidentepas nirqan: “Kay pachapiqa Diosta hatunchaspa hanaq pachaman rinanchispaqmi kashanchis, chaypipunin tiyasunchis”, nispa.

Chaytaña ninku chaypas, pisillatan yachanku hanaq pachamanta. Religionmanta encuesta ruwaqkunaq presidenten George Barnan nin: “Askha runakunan televisionpi rikusqankuman hina, takikunapi uyarisqankuman hina hanaq pachaman ripuyta iñirqanku”, nispa. Florida llaqtapi Iglesia Episcopalmanta pastormi nirqan: “Hanaq pachaqa Diospa tiyananmi, chayllatan yachanchis”, nispa.

Chhaynaqa, ¿imaynataq hanaq pachari? ¿Chaypi kawsananchispaqchu kamasqa karqanchis? ¿Pikunan hanaq pachaman rinqaku? ¿Imatan chaypi ruwamunqaku? Chaykunamantan qatiqninpi yachasunchis Bibliaq yanapayninwan.

[11 paginapi willakuy]

¿Imaraykun mana pipas wañuyta munanchu hanaq pachaman ripunanpaq?