Diosqa uyarinmi pachantinpi runakunaq mañakusqanta (Salmo 145:18, 19). Simin Qelqapas kallpachawanchismi ima llakikuyninchistapas payman willakunapaq (Filipenses 4:6, 7). Ichaqa sapa kuti kasqan rimaykunallawan mañakuykunaqa manan sonqonpaq hinachu (leey Mateo 6:7).

Kamachikuyninkunata mana kasukuq runakunaq mañakusqankutapas manallataqmi uyarinchu (Proverbios 28:9). Ñawpa tiempopipas israelitakunaq mañakusqantan mana uyarirqanchu, runa wañuchiq kasqankurayku. Chhaynaqa mañakusqanchista Dios uyariwananchispaqqa kamachikuyninkunatan kasukunanchis (leey Isaías 1:15).

Mana iñiyniyoq kaqtinchisqa Diosqa manan uyarinchu mañakusqanchista (Santiago 1:5, 6). Cheqaqpaqpunin paytaqa qhawarinanchis, manataqmi iskayananchischu yanapay munawasqanchismanta. Iñiyniyoq kanapaqqa Bibliapi yachachikuykunan yanapawanchis, chayraykun Bibliataqa allinta estudiananchis (leey Hebreos 11:1, 6).

Chaymantapas tukuy sonqowan huch’uyyaykukuspan Diosmanta mañakunanchis, imaynan Jesuspas ruwarqan hinata (Lucas 22:41, 42). Chayraykun Diosmanta mañakuspa “kayta ruwanaykitan munani” nispa ninamantaqa, astawanqa kallpachakunanchis kamachikuyninkunata entiendenapaq, chaypaqmi Bibliata leenanchis. Chhaynapin mañakusqanchisqa Diospa munayninman hina kanqa (leey 1 Juan 5:14).