Bibliapi nisqan jina Miguel sutiqa Jesuspa jujkaq sutinmi, wakin religionkunan ninku: “San Miguel”, nispa. Miguel sutiqa Bibliapi rijurin manaraq Jesús kay allpaman jamushaqtin, chaymantapas rijurillantaq Jesús janaq pachaman kutipusqan qhepaman. a Bibliaqa willanmi Miguel Moisés wañupusqan qhepaman saqrawan churanakusqanta, chaymantapas Miguelqa yanaparanmi juj angelta Diospa mensajenta profeta Danielman entregananpaq (Daniel 10:13, 21; Judas 9). Miguelqa Jehová Diostan defienden enemigonkunamanta. Chaymi Miguel sutiqa “¿Pitaq Dios jina kanman?” niytan munan (Daniel 12:1; Apocalipsis 12:7).

 Kunanqa yachasunchis imaraykun Jesusta arcángel Miguel nikullantaq chaymanta.

•   Bibliaqa Migueltan “arcángel” nin (Judas 9). Arcangelqa angelkunaq jefen niytan munan, chaymantapas arcángel simiqa iskay kutillatan Bibliapi rijurin. Bibliapiqa arcángel nispallan nishan manan arcangelkuna nispachu, chaypin yachanchis arcangelqa jujlla kasqanta. Jesusmantan Biblia khaynata nin: “Señor kikinmi kamachiq kunkawan, arcángel kunkawan, Diospa trompetanwan ima janaq pachamanta uraykamunqa”, nispa (1 Tesalonicenses 4:16). Kay textopi nisqan jina, Jesusmi arcángel kunkayoqqa. Chhaynaqa, Jesuspunin arcángel Miguelqa.

•   Bibliaqa willanmi Miguel angelkunata umallishasqanta. “Janaq pachapin Miguelqa angelninkunapiwan dragonwan maqanakuran”, chay dragonqa saqran (Revelación 12:7). Miguelqa janaq pachapiqa ancha atiyniyoqmi. Chaymi Bibliaqa paymanta nin: “Umalli ángel Miguel”, “jatun kamachikuq Miguel”, nispa (Daniel 10:13, 21; 12:1). Bibliapi Nuevo Testamentomanta allinta yachaq David Aune nisqa sutiyoq runan Miguelmanta khaynata nin: “Angelkunaq jefenmi”, nispa.

   Bibliapiqa Jesusllamantan kayta nin: “Chayqa kanqa Señor Jesús atiyniyoq angelninkunawan kuska nina rauraypi janaq pachamanta rijurimuqtinmi”, nispa (2 Tesalonicenses 1:7, 8; Mateo 16:27). Chaymantapas, 1 Pedro 3:21, 22 Jesusmanta nin: “Payqa janaq pachatan ripuran, paymanmi k’umuchisqa karan angelkunapas, autoridadkunapas, atiyniyoq kaqkunapas”, nispa. Diosqa manan churanmanchu karan iskay umalliqkunata Jesustawan Migueltawan enemigontin kaspanku angelninkunata umallinankupaq. Chhaynaqa, Jesús sutipas Miguel sutipas kaq runallamantan rimashan.

•   Bibliaqa willanmi Miguel “khuyay llaki phuti p’unchaykunapi” “sayarinanta” (Daniel 12:1). Bibliapi Daniel libropi, “sayarinqa” nisqa simiqa juj rey ancha importante ruwayta aparinanmantan rimashan (Daniel 11:2-4, 21). Bibliapin Jesusta sutichakun: “Diospa Simin”, nispa. Chaymantapas payqa “Reykunaq Reynin” jinan Diospa enemigonkunata chinkachinqa, Dios sonqo runakunatataq libranqa (Revelación 19:11-16). Chaytaqa ruwanqa “manchay ñak’ariy tiempopin, chay ñak’ariy jinaqa manan karanchu kay pachaq qallariyninmantapacha kunankamapas” (Mateo 24:21, 42).