Wakin runakunaqa kaytan tapukunku: “¿Imapaqmi Dios kamawarqanchis? ¿Imatan vidaywan ruwasaq?”, nispa. Bibliaq nisqanman jinaqa Dioswan amigontin kananchispaqmi kamasqa karqanchis. Chaymantan astawan yachasun.

•   Diosqa kamawaqninchismi. Biblian nin: “[Diosmi] kamawarqanchis, paypan kanchis”, nispa (Salmos 100:3; Apocalipsis 4:11).

•   Imaynan kamaqninchis Dios kay jallp’a pachata mana yanqa kananpaqchu kamarqan, chhaynatan runakunatapas mana yanqapaqchu kamawarqanchis (Isaías 45:18).

•   Runakunaqa “Diosta necesitasqanchista reparakunanchispaqmi”, kusisqa kausananchispaqmi kamasqa karqanchis (Mateo 5:3). Diosqa maytan munashan paymanta yachaspa kusisqa kausananchista (Salmos 145:16).

•   Diosta astawan reqsinanchispaq kallpachakuspaqa paywanmi amigontin kapusunchis, chay ruwayqa maytan kusichiwanchis. Dioswan amigontin kayqa manan sasachu, chaymi Biblia kayta niwanchis: “Diosman asuykuychis, jinan paypas asuykamusunkichis”, nispa (Santiago 4:8; 2:23).

•   Diospa amigon kanapaqqa paypa munayninman jinan kausananchis. Chaytan Bibliaqa sut’ita willashan: “Diosta manchakuy, kamachikuyninkunata kasukuy; chaypunin runaq imamantapas aswan jatun ruwananqa”, nispa (Eclesiastés 12:13).

•   Jamuq tiempopin Jehová Diosqa imaymana ñak’ariykunata tukuchinqa, chaymantapas amigonkunamanmi payta tukuy sonqo serviqninkunamanmi wiñay kausayta qonqa. Chhaynapin Diospa munaynin runakunapaq junt’akunqa (Salmos 37:10, 11).