Apocalipsis libroca Bibliamanda shuj libromi can. Chai palabraca griego shimipica apokálypsis nishcami can. Chaica “descubrimiento” o “revelación” nishcami significan. Chaimandami Apocalipsis librotaca Revelación nishpapash rijsin. Chai libropica ashtaca ashtaca huatacunata en secreto charishca villaicunatami charin. Shinallata chai libropica shamuj punllacunapi imacunalla pasanatapashmi villajun. Apocalipsis libropi villashca profeciacunamandaca huaquin profeciacunaca pactarinarami.

Apocalipsis libropica ¿imacunamandallata parlan?

•   Callari shimicuna (Revelación [Apocalipsis] 1:1-9).

•   Jesús siete congregaciongunaman villachun cachashca villaicuna (Apocalipsis 1:10–3:22).

•   Muscuipishna Taita Dios mandana pushtupi tiajujta ricushca (Apocalipsis 4:1-11).

•   Muscuipishna ricushcacuna:

  •   7 sellocuna (Apocalipsis 5:1–8:6).

  •   7 trompetacuna; quimsa último angelcunaca paicunapa trompetacunataca “Aij” nishpami huacachin (Apocalipsis 8:7–14:20).

  •   7 tasonguna, cada tasonmi Taita Dios ninan culirashcahuan junda caimanda cai nali mundopi ‘talirijun’ (Apocalipsis 15:1–16:21).

  •   Taita Diospa contracuna tucuchi tucushca muscuipishna ricushcacuna (Apocalipsis 17:1–20:10).

  •   Taita Dios prometishca shuj mushuj cielota y shuj mushuj alpata muscuipishna ricushcacuna (Apocalipsis 20:11–22:5).

•   Tucuri shimicuna (Apocalipsis 22:6-21).

Apocalipsis librota yachajungapaj 5 yuyaicuna

1.   Apocalipsis libropica ali villaicunami tian. Taita Diosta sirvijcunaca Apocalipsis librota liinataca na manllanachu can. Ashtaca gentecunaca apocalipsis shimita uyashpaca, jatun manllanai llaquicuna pasanatami yuyan. Shinapash callarimanda tucuringacamanmi Apocalipsis libropica cashna nin: ‘Chai shimicunata liijcuna y chai escribishca shimicunata cazujcunaca cushijunami can’ (Apocalipsis 1:3; 22:7).

2.   Cai libropica huaquin versiculocuna y huaquin shimicunami diferente significadota charin. Chaimandami ali ali intindina can (Apocalipsis 1:1).

3.   Apocalipsis libropi parlashca huaquin gentecuna y huaquin importante yuyaicunaca Bibliapa shuj librocunapipashmi ricurin:

   •   Jehová Diosca jahua cielomanda y cai alpamanda Taita Diosmi can. Paimi tucuita ruraj Dios can (Deuteronomio 4:39; Salmo 103:19; Apocalipsis 4:11; 15:3).

   •   Jesucristoca ‘Taita Diospa Maltun Llamagumi’ can (Juan 1:29; Apocalipsis 5:6; 14:1).

   •   Satanás Diabloca Taita Diospa contrami can (Génesis 3:14, 15; Juan 8:44; Apocalipsis 12:9).

   •   Importante Babilonia Llacta o panda religionguna. Paicunaca punda tiempopi tiashca Babilonia o Babel llactashnami can. Porque llullacunatami yachachin. Chaimandami Importante Babilonia Llactaca Jehová Diospa y paipa sirvijcunapa contra can (Génesis 11:2-9; Isaías 13:1, 11; Apocalipsis 17:4-6; 18:4, 20).

   •   ‘Mar yacu’ chaica Taita Diosmanda caruyashca gentecunatami ricuchin (Isaías 57:20; Apocalipsis 13:1; 21:1).

   •   Tabernáculo huasipica arca del trato, maillaringapaj jatun tason, lamparacuna, incienso y Taita Diosman ofrendata cungapaj altarmi tiarca. Chaica Taita Diosta adorangapami carca (Éxodo 25:10, 17, 18; 40:24-32; Apocalipsis 4:5, 6; 5:8; 8:3; 11:19).

   •   Manllanai sacha animalcuna: Cai mundopi tiashca gobiernocuna (Daniel 7:1-8, 17-26; Apocalipsis 13:2, 11; 17:3).

   •   Apocalipsis libropi numerocunaca shuj significadotami charin (Apocalipsis 1:20; 8:13; 13:18; 21:16).

4.   Muscuipi ricushcacunaca ‘Señorpa punllapimi’ pactarin. Chaica 1914 huatacunapimi pactari callarirca (Apocalipsis 1:10). 1914 huatapimi Jesusca Taita Diospa Gobiernopi mandai callarirca. Chaimandami Apocalipsis libropi escribishca profeciacuna cai tucurimui punllacunapi pactarinata yachapanchi.

5.   Apocalipsis librota y Biblia enterotapacha aliguta intindingapaca Taita Diospa ayudatami mañana capanchi. Shinallata Bibliata aliguta intindijcunapa ayudatami mañana capanchi (Hechos 8:26-39; Santiago 1:5).