¿QUIQUINBASHCHU Adrianashna sintirishpa, huañungaparapash munapashcangui? Adrianaca yapata llaquilla, pinarishca, paillami sintirin carca. Paica depresión grave nishca ungüitami charirca.

Japonmanda Kaoru shuti jarita ima pasashcata ricupashun. Paica, paipa mayoriashca ungushca taitamamatami cuidarca. Paica ninmi: “Chai tiempopimi ñuca trabajopica ninanda trabajachihuanajurca, shaijushcami sintirijurcani. Micuitapash na micunayarcachu, puñuitapash na ushajurcanichu. Chaimandami huañungaparapash munarcani” nin.

Nigeria llactamanda Ojebode shuti jarica ninmi: “Siempremi llaquilla yalin carcani, imagumandapash huacajunllami carcani. Shina sintirijuimandami huañuchiringapaj munarcani” nin. Ojebode, Kaoru, Adrianapash na huañuchirircachu, shinapash cada huatami casi ochocientos mil gentecuna huañuchirin.

Paicunamandallata huañuchirishcacunamandaca, taucacunaca jaricunami can. Taucacunaca pinganayachimandami ayudataca na mascashca. Jesusca, huañujuj gentecunami doctorcunataca minishtin nirca (Lucas 5:31). Quiquinbash llaquillapacha sintirijushpaca ayudata mascanami capangui. Depresionda charij tauca gentecunaca doctorcunapa tratamientocunata catishpami alillata tucushca. Chaitami Ojebode, Kaoru, Adrianapash rurarca. Cunanbica paicunaca alillatami sintirishca.

Depresionda mishangapaca huaquin doctorcunaca jambicunata ufiachun, psicologocunapaman richunmi mandan. Shinallata cai ungüita charijcunaca familiacuna amigocunapash intindichun, pacienciahuan ayudachunmi minishtin. Tucuita yali amigoca Jehová Diosmi can. Paica Bibliahuanmi ashtacata ayudan.

Depresión ungüita charijcunaca ashtaca tiempotami tratamientocunata catina can. Ñaupaman catingapami, paicunapa causaipi huaquin cambiocunata rurana can. Quiquin cai ungüita chimbapurajushpaca, shamuj punllacunapi ali causaigu tianatami crina capangui. Caitami Ojebodeca shuyajun. Chaimi paica nin: “Isaías 33:24​pi shimicuna pactarinataca yariami shuyajupani. Chaipica pipash ñana ‘ñucaca huañujunimi’ ningachu” ninmi. Taita Diosca cai Alpataca ‘mushujtami’ rurasha, chaipica ima “nanaipash”, llaquilla sintirijunapash ñana tiangachu ninmi (Apocalipsis [Revelación] 21:1, 4). Quiquinga ñana cunanbishna llaquilla sintiripanguichu, yaritallapash ñana yaripanguichu (Isaías 65:17).