Pihuanbash alipachami llevarini nishpapash shutita na yachashpaca ¿ciertopachachu ali llevarinajunchiman? Bulgaria llactamanda Irina shuti huarmiguca ninmi: “Taita Diospa shutita na yachashpaca Taita Diospa rijsi tucuitaca na ushanchimanllu” nishpa. Imashinami chaishuj temapi ricuparcanchi, Taita Diosca paiman quimirichunmi munan. Chaimandami Bibliapica nin: “Ñucaca Jehovami cani. Chaimi ñuca shuti can” nishpa (Isaías 42:8, NM ).

Shinapash ¿ciertopachachu Taita Diosca gentecuna paipa shutita yachachun, paita shutipi parlachun munan? Ricupashun. Escrituras Hebreas o Ñaupa Testamento nishcata ricujpica Taita Diospa shutica casi 7 mil viajemi tiajun. Shuj shuj shuticuna Bibliapi escribishca tiajujpipash Taita Diospa shutillami ashtaca viaje escribishca tiajun. Taita Diospa shuti ashtaca viaje tiajujta yachashpami ninchi, Jehová Diosca paipa shutita yachachun, paita shutipi parlachunmi munan nishpa. *

Ashtaca gentecunaca ninmi, tucui ushaita charij, jucha illaj Taita Diostaca maitashi shutipi parlashun nishpa. Shinapash Jehová Diosca paita sirvijcuna paipa shutita alicachishpa shujcunamanbash rijsichichunmi munan (Salmo 69:30, 31; 96:2, 8). Jesusta yaripashun. Paipa catijcunataca nircami, Taita Diosta mañajushpaca ‘jahua pachapi tiajuj ñucanchi Taitalla, canba jucha illaj shutiguca alicachi tucushca cachun’ nishpa mañanguichi nirca. Taita Diospa shutita shuj gentecunaman villachishpami paipa shutita alicachinajunchi. Shina rurashpami paiman ashtahuan quimirinchi (Mateo 6:9).

Bibliapica ninmi: ‘Paipa shutita yarishpa causajcuna’ mañajpica Taita Diosca alicachishpami paicunataca uyajun nishpa (Malaquías 3:16). Paicunatami Jehová Diosca nin: ‘Ñuca shutita rijsishcamandami alicachisha. Ñucata mañajpica ñucapashmi tigrachisha. Ninan llaquipi cajpipash ñucami paihuan casha’ nishpa (Salmo 91:14, 15). Shinaca Taita Diospa alipacha rijsi cangapaj munashpaca paipa shutita yachashpami Taita Diostaca shutipi parlana capanchi.