Shamuj punllacunapi ashtaca llaquicuna o problemacuna ricurijpipash ashtaca gentecunaca shinlli tucushpa ñaupaman catinatami uyan. Shinapash ¿shuj punllaca tranquilo, ali causaita usharingacha? Ari. Bibliapica shuj ali causaigu tianatami parlan.

•  Bibliapica ¿ima promesacunatata cun?

•  Bibliapi nishcacunaca ¿ciertopachachu ali can?

•  Bibliapa promesacunaca ¿imashinata pactaringa?

•  Bibliapa promesacunaca ¿ima horashi pactaringa?

•  Bibliapa promesacunaca ¿imashinata quiquindaca ayudan?

 Bibliapica ashtaca llaquicuna problemacuna tianatami parlan. Shinapash Bibliapillatami cai llaquicunaca na siempre tianatapash parlan. Chaipaca huaquin yuyaicunata ricupashun.

•   Llaquicuna: maipi causanatapash na charijpi

   Bibliapica ninmi: “Huasicunata shayachishpami, chaipi causanajunga” (Isaías 65:21).

   Ñapachami pactaringa: Tucuicunami paicunapa propio huasipi causanga.

•   Llaquicuna: trabajo illaj, pobrella causai

   Bibliapica ninmi: “Ñuca agllashcacunaca, paicunapaj maquihuan imatalla rurashcahuanmi cushijushpa causanajunga” (Isaías 65:22).

   Ñapachami pactaringa: Tucuicunallatami paicuna gushtashca, ali trabajota charita ushanga.

•   Llaquicuna: agllashpalla ali tratan

   Bibliapica ninmi: “Tucuita ali ricushpa mandajcunapashmi, mandashpa tianajunga” (Isaías 32:1).

   Ñapachami pactaringa: Tucuicunatallatami ali, justo tratanga. Chaipica pobrella gentegucunaca na tiangachu. Shuj raza cashcamandallapash agllashpallaca na tratangachu. Shinallata charijlla cashcamandapash ashtahuan alica na tratangachu.

•   Llaquicuna: yarjai tiempo

   Bibliapica ninmi: “Pambapipash, jahua urcu umacunapipash, granocuna tiachunmi maqui jundata shitanajunga” (Salmo 72:16).

   Ñapachami pactaringa: Ashtaca sano micunacunami tianga. Tucuicunami micunataca charishun. Yarjaimanda cajpipash na sufringachu.

•   Llaquicuna: ashtaca shuacuna y violencia tiajpi

   Bibliapica ninmi: “Tucuicunami quiquin uvas yura ucupi, quiquin jigos yura ucupi tiarishpa samanajunga. Chaipica, pipash na manllachingachu” (Miqueas 4:4).

   Ñapachami pactaringa: Nali gentecuna ña na tiajpimi, tucuicunallata seguro sintiringa. Shinallata, ʹimatapash cashcatapacha [o alita rurajcunallami, TNM], llactata [o alpataca] japingaʹ (Salmo 37:10, 29).

•   Llaquicuna: guerracuna

   Bibliapica ninmi: “Llactapuracunapash na ashtahuan macanajungapaj espadacunahuan llujshingachu. Macanajuita yachachinapash na ashtahuan tiangachu” (Isaías 2:4).

   Ñapachami pactaringa: Mundo enteropimi tranquilo, ali causai tianga (Salmo 72:7). Guerracunapa culpamandaca, pipash ña na sufringachu. Shinallata guerracunamanda pacajushpapash ña na ringachu. Shinallata pipash ña na huañujpimi huacaicunapashña na tianga.

•   Llaquicuna: ungüicuna tiajpi

   Bibliapica ninmi: “Chaipi causajcunaca, pipash na: ‘Ñucaca huañujunimi’ ninajungachu” (Isaías 33:24).

   Ñapachami pactaringa: Discapacitado gentegucunapash ña na tiangachu. Shinallata gentecunapash ña na irquiyangachu (Isaías 35:5, 6). Shinallata Bibliapica huañuicunapash ña na tiangachu nishpami prometishca (Apocalipsis 21:4).

•   Llaquicuna: cai alpata contaminashpa ninanda huaglichijpi

   Bibliapica ninmi: “Jichushca chulunlla sirij pambaca, cushillami tucunga. Chaquishca yuracunapash cushijushpami, juyailla rosas sisashna sisanga” (Isaías 35:1).

   Ñapachami pactaringa: Primeropi Taita Dios imashna munashcashnami cai alpaca shuj paraíso tucujpi gentecunaca cushilla, ali causanga (Génesis 2:15; Isaías 45:18).

 Shina pensanaca normalmi can. Shinaca, shamuj punllacunamanda Biblia ima nijta ricupashun. Bibliapa promesacunaca gentecunapa nishcacunahuanga na igual canllu. Bibliaca Taita Diosmandami shamun. Shinaca ¿imamandata diferente can? Chaipaca, ishcai razongunata ricupashun:

•   Taita Diospica confiai ushapanchimi. Shinallata Bibliapica “na llullaj Taita Diosmi” can ninmi (Tito 1:2). Shinallata Taita Diosllami shamuj punllacunapi ima pasanatapash yachan (Isaías 46:10). Bibliapica, Taita Diospa nishcacuna siempre pactarijtaca, ashtaca ejemplocunapimi ricuita ushapanchi. Caimanda ashtahuan yachangapaj munashpaca Biblia cabalta nijushcataca ¿imamandata crita ushanchi? nishca videota ricupangui.

•   Taita Diosmi tucui problemacunata arreglaita ushan. Bibliapica Taita Dioca ashtaca poderta charimandami ‘imata rurangapaj munashcatami ruran’ nin (Salmo 135:5, 6). Shinaca Taita Diosca ñucanchita juyaimandami paipa nishcacunata pactachinga. Y paipa nishcacunata pactachichunga, pipash jarcaitaca na ushanllu (Juan 3:16).

 Shinapash, ‘Taita Dios ayudaita ushashpapash, ¿imashpata cunangacaman ashtaca problemacunata charinchi?’ nishpachari tapuripangui. Caimanda ashtahuan yachangapaj munashpaca Diosca ¿imamandata llaquicuna tiachun saquishca? nishca videota ricupangui.

 Taita Diosca paipa gobiernota apamushpami paipa promesacunataca pactachinga. Chai gobiernopica, paipa churi Jesucristo mandachunmi autoridadta cushca. Paimi cai alpata y cai alpapi causaj gentecunatapash cuidashpa mandanga. Jesús cai alpapi cashpaca irquilla gentegucunata jambirca, ashtaca gentecunamanbash micunaguta cararca, tamia jatun huaira jatarijtapash controlarca, y huaquin huañushca gentegucunatapashmi causachirca (Marcos 4:39; 6:41-44; Lucas 4:40; Juan 11:43, 44). Jesús caicunata rurashpami Taita Diospa Gobiernopi ña mandajushpa imacunatalla ruranata ricuchirca.

 Taita Diospa Gobierno imata ashtahuan ruranata yachangapaj munashpaca Taita Diospa Reinoca ¿imata can? nishca videota ricupangui.

 Taita Diospa Gobierno mandanaca ñallami pactaringa. Porque Bibliapica Taita Diospa Gobierno ña mandai callarigrijujpica huaquin señalcunatami ricunguichi nircami. Chaimandami Taita Diospa Reino ña mandagrijushcataca seguro capanchi (Lucas 21:10, 11). Bibliapa nishcacuna ña pactarijushcataca tucuicunami ña ricunajupanchi.

 Caimanda ashtahuan yachangapaj munashpaca “Taita Diospa Gobiernoca ¿imahorata cai alpataca mandanga?” nishca temata ricupangui.

 Bibliata escribij shuj runagu esperanzamanda parlashpaca, ‘shuj ancla gancho jirruca barcota shinllita charijun, shinallatami esperanzapash ñucanchi causaita shinllichin’ nircami (Hebreos 6:19). Imashinami shuj jatun huaira jatarijpica, shuj ancla gancho jirruca barco shinlli shayajuchun ayudan, shinallatami ñucanchi problemacunata charijpica shamuj punllacunapi ali causaiguta charina esperanzaca ñucanchitaca ayudaita ushan. Shinallata esperanzata charinaca mentalmente y emocionalmente y ali saludta charichunbash ayudan (1 Tesalonicenses 5:8).