24 de enero de 2021 punllataca Zimbabue llactamanda señas shimipi, La Biblia: el Evangelio según Mateo nishca libro llujshishcatami villarca. Zimbabue llactamanda Comité de Sucursalpi sirvij Taurai Mazarura shuti huauquimi, shuj grabashca discursopi Bibliamanda cai libro llujshishcata villarca.

Mateo libro llujshishcata yachashpaca, Zimbabue llactamanda señas shimipi congregaciongunamanda 401 publicadorcunaca ninandami cushijurca. Paicunaca Bibliata yachajungapaj, villachingapaca cai librotaca ñami utilizangapaj munanajun.

COVID-19 ungüi mundo enteropi tiashcamandami cai librota traducinaca ashtahuan shinlli carca. Traductorcunaca na uyaj gentecunahuanmi ñavi ñavi parlanata yachan. Shinami señas shimita gentecuna imashina parlashcata yachaita ushan. Shinapash COVID-19 ungüimanda jarcaicuna tiajpica, chaitaca napacha rurai usharcachu. Chai jarcaicuna tiajpipash ¿imashinata trabajashpa catita usharca? Chaipaca Internetpi videohuan conectarishpami paicunahuanga parlarca. Chaita rurashcamandami, Zimbabue llactamanda na uyaj tucuilla gentecuna aliguta intindichun traducita usharca.

Zimbabue llactamanda Comité de Sucursalpi sirvij John Hunguka shuti huauquica ninmi: “Mateo librota llujchishpami callaripashcanchi. Shinapash ashtahuan trabajomi tian. Zimbabue llactamanda señas shimipica tucuilla Bibliatami traducingapaj munapanchi. Chaita rurangapaca, 10 huatacunatashnami parashun” nishpa.

Caicunata yachashpaca, Jehová Dios tucui laya gentecunata juyashcatami ricupanchi. Shinallata ñucanchita bendiciajushcatapashmi ricupanchi. Shinaca ñucanchicunaca, “tucui llactacunapi causajcuna, aillucuna, shuj rimaita parlajcuna, shuj shuj gentecunapash” yachachunga, “causaita causaicaman” ali villaigucunatami villachishpa catishun.