YACHANA PARTI 50
Ailluhuan cushi causangahua imatata rana angui (2 parti)
Huahuagunaga Jehova cushca manaun. Jehovaga, yayaguna paiguna huahuagunata alita cuiranauchun munan. Chiraicu, chita pactachingahua, yayagunata alita cunasha yachachin. Chasnallata, aillu cushi sintiringahua, huahuagunatas cunan.
1. Jehovaga yayagunata ima cunaigunatata cun
Jehovaga yaya mamaguna tucui uras paiguna huahuagunata llaquisha yanapanauchun munan. Chasnallata, mana ali ranagunamanda cuirasha, Bibliahuan cunasha yachachinauchun munan (Proverbios 1:8). Chiraicu, Jehovaga yaya mamagunata nin: “Canguna huahuagunata [...] alita huiñachisha, Diospa Shimita yachachisha cunaichi” (Efesios 6:4ta leipai). Jehovaga, yayaguna pai mandashcata casusha, paiguna huahuagunata alita huiñachinauchun munan. Yayagunallami paiguna quiquin huahuagunata cuirana anaun.
2. Jehovaga churigunata ushigunata ima cunaigunatata cun
Jehovaga huahuagunata nin: “Tucui uras camba mamata camba yayata casuna manguichi” (Colosenses 3:20ta leipai). Shuc churi o ushi, paiba yayagunata respetasha casucpiga paiguna cushi sintirinaun, Jehovahuas cushiyanmi (Proverbios 23:22-25). Jesusca ali churi mara. Ucha illac ashahuas, paiba uchayuc yayagunata casushami causara (Lucas 2:51, 52).
3. Ailluga Jehovahua mayanbi sintiringahua imatata rana an
Camba huahuaguna, can Jehovata llaquishca shina, paita llaquinauchun munangui. Imashinata chita pactachinata ushangui. Bibliamanda cai cunashcata catina ushangui: ʻJehova rimashca shimigunata, camba huahuagunata alita yachachina mangui. Camba huasibi tiausha, ñambita puriusha, caigunamanda rimana anguiʼ (Deuteronomio 6:7). Alita yachachingahua, cuti cuti rimasha intindichina anchi. Chasnallata, camba huahuaguna can yachachishcata ama cungarinauchun nisha, cuti cuti rimasha yachachina angui. Cai Bibliamanda texto nishca shina, camba huahuagunata caran punzha Jehovamanda rimana angui. Chasnallata, huin aillugunaga caran semanaibi Bibliamanda yachasha, pariulla Jehovata adorangahua timputa surcuna anaun. Huahuagunata mana charishahuas, caran semanaibi Bibliata canllata estudiana, ashcata yanapanga.
CAIMANDA MASTA YACHAI
Ailluguna cushilla, cungailla causangahua, yanapac cunaigunata yachashunchi.
4. Camba huahuagunata llaquihuan yachachi
Huahuagunata huiñachina imasaibi sinzhi an. Bibliaga imashinata yanapan. Santiago 1:19, 20ta leichi, huasha cai tapuigunamanda cuintanacuichi:
-
Yayaguna imashinata paiguna huahuagunahuan sumaclla cuintanacuna anaun.
-
Shuc yaya piñarishca aushaga, imahuata paiba huahuata mana cuscanzhina an. a
5. Camba huahuagunata cuirai
Camba huahuagunata cuirangahua, sexualidadmanda caran huahuagunahuan cuintana angui. Chasna ashahuas, caimanda rimana pingai man. VIDEOTA ricuichi, huasha cai tapuigunamanda cuintanacuichi:
-
Maican yayagunaraicu paiguna huahuagunahuan sexualidadmanda rimanaga imahuata sinzhi an.
-
Maican yayagunata imata yanapashca, paiguna huahuagunahuan sexualidadmanda cuintanacungahua.
Bibliaibi quillcashca shina, cunan punzhagunaibi Satanaspa munduibi causac runaguna mas irus tucunaun. 2 Timoteo 3:1, 13ta leichi, huasha cai tapuigunamanda cuintanacuichi:
-
Versiculo 13bi mana ali runagunamanda riman. Chi irus yuyaiyuc runagunaga, ichilla huahuagunata abusasha violanata munanaun. Chasna acpiga, imahuata yayagunaga paiguna huahuagunata sexualidadmanda yachachina anaun. Imashinata huahuaguna chi iridsa abusac runagunamanda cuirarina anaun.
Yacharanguichu
Testigo de Jehovagunaga, yayaguna paiba huahuagunata sexualidadmanda rimangahua, abusac runagunamanda cuiraringahua, ashca publicaciongunata, videogunata surcunaun. Caigunata ricui:
-
Canguna huahuagunata cuiraichi (video)
-
“Camba huahuahuan sexualidadmanda imasa rimana” (¡Despertad!, núm. 5 2016)
6. Camba yayagunata respetai
Huahuaguna, maltaguna, paiguna yayagunata respetohuan rimana manaun. VIDEOTA ricuichi, huasha cai tapuigunamanda cuintanacuichi:
-
Imahuata maltagunaga paiguna yayagunata respetohuan rimana anaun.
-
Shuc maltaga imata rashata paiba yayagunata respetan.
Proverbios 1:8ta leichi, huasha cai tapuimanda cuintanacuichi:
-
Shuc malta, paiba yayaguna caita rai nicpiga, imatata rana an.
7. Jehovata ailluhuan adoraichi
Testigo de Jehovagunaga, caran semanaibi timputa surcusha ailluhuan Diosta adoranaun. Ailluhuan Diosta adoranaga, imashina tan. VIDEOTA ricuichi, huasha cai tapuigunamanda cuintanacuichi:
-
Caran semanaibi Diosta ailluhuan adorangahua imata yanapanga.
-
Ailluhuan Diosta adoranaibi, huinguna gustu cushita sintirinauchun nisha, yayagunaga imatata rana anaun (Punda fotota ricui).
-
Ailluhuan Diosta adorangahua cambaraicu sinzhi chan. Ima arcaitata charingui.
Callari timpuibi, Jehovaga israelitaguna paina aillugunahuan Bibliamanda cuintanacunauchun munara. Deuteronomio 6:6, 7ta leichi, huasha cai tapuimanda cuintanacuichi:
-
Imasata canga cai cunashcata pactachina ushangui.
Ailluhuan Diosta adorana yuyaiguna:
-
Tandarinagunaraicu estudiaichi.
-
Bibliaibi rimashca runamanda leisha cuintanacuichi.
-
Ichilla huahuagunata charishaga, jw.org pistuibi, huahuagunata yachachingahua copiata surcusha yanapaichi.
-
Malta churita o ushita charishaga, jw.org pistuibi maltagunaraicu yachana temata anllaichi.
-
Biblia cuintashcata pariulla ricuchichi.
-
JW.ORG pistumanda videota ricusha cuintanacuichi.
MAICANGUNAGA CASNAMI NINAUN: “Ñucaraicu, Bibliamanda huahuagunata yachachina sinzhi man”.
-
Canbas chasnallatachu yuyangui.
IMATA YACHASHCANGUI
Jehovaga, yayaguna paiguna huahuagunata llaquisha, yachachisha, cuiranauchun munan. Chasnallata, huahuaguna paiguna yayagunata respetasha casunauchun munan. Chimandas, huinguna tandalla paita adoranauchun munan.
Yachashcata cuintai
-
Imasata yayagunaga paiguna huahuagunata yachachisha cuirana anaun.
-
Huahuagunaga, imata rashata paiguna yayagunata respetanaun.
-
Caran semanaibi ailluhuan Diosta adorangahua timputa surcunaga imashinata yanapan.
CANLLATA MASTA YACHAI
Camba huahua rucu tucushcaibi, ali causachun imata yanapanga.
“Camba huahuagunaraicu 6 balishca yachachinaguna” (¡Despertad!, num. 2 2019)
Rucuyashca runagunata imashina cuirana ashcata leipai.
“Ñucanchi yayaguna rucuyacpi, Diosca paigunata cuirachunzhu munan” (jw.org internet pistuibi)
Shuc runa paiba huahuagunata huiñachinata mana yachashahuas, imashina ali yaya tucushcata ricui.
Jehovami huahuagunata huiñachingahua yachachitucushcanchi (5:58)
Imasa shuc yaya paiba huahuagunahuan amigo tucushcata yachai.
“Shuc yaya paiba huahuama caillayangahua imatata rana an” (La Atalaya, 1 de noviembre de 2011)
a Biblia “cuscanzhina” nishaga, yachachina, cunana, alita causangahua yanapanata nin. Yayagunaga, huahuagunata mana sinzhita macasha libachina chanaun (Efesios 6:4).