LESON 57

É si ou fé in péché grav ?

ÉKOUT AN

Mèm si ou ièm Jéova vréman for é ke ou fé zéfor pou pa chagrinn son keur, nadfoi ou va fé bann zéreur. Mé detroi péché lé plu grav ke dot (1 Korintien 6:9, 10). Si ou komèt in péché grav, pans pa ke Jéova i ièm pu ou. Rapèl aou ke li lé paré pou pardonn aou é èd aou.

1. Kosa i fo fé pou èt pardoné par Jéova ?

Sak i ièm Jéova néna in gran tristès, kan zot i konpran ke zot la komèt in péché grav. Mé zot lé rékonforté par se promès Jéova la : « Mèm si zot péché lété bien rouj fonsé, zot va ni blan parèy la nèj » (Izai 1:18). Si zot i repan azot vréman, Jéova va pardonn azot totalman. Koman repanti anou ? Nou arèt fé sak lé mové, é nou va supli Jéova pardonn anou parske nou regrèt vréman sak nou la fé. Aprésa, nou fé tout pou chanj nout bann pansé é nout bann mové labitud ke la amèn anou péché. É nou fé zéfor pou viv dapré bann rekomandasion Jéova ke lé pur (lir Izai 55:6, 7).

2. Koman Jéova i utiliz bann zansien pou èd in pécheur ?

Si nou fé in péché grav, Jéova i di : « Ke li apèl koté li bann zansien lasanblé » (lir Jak 5:14, 15). Bann zansien i ièm Jéova é son bann brebi. Zot néna bann kalité ki fo, pou èd bann pécheur retrouv son bann bon relasion ansanm Jéova (Galat 6:1).

Koman bann zansien i èd in krétien ke la komèt in péché grav ? Gras la Bib, 2 oubien 3 zansien i ésplik poukosa sak li la fé lé mové. Zot i donn osi bann konsèy pratik pou pa rekomansé. É zot va petèt limit sak li fé dan lasanblé, le tan li retrouv son santé spirituèl. Si in krétien la komèt in péché grav, é i repan pa li, bann zansien va éskomunié ali pou protèj lasanblé de son mové konduit.

ALON APRANN PLUS

Alon fé grandi nout rekonésans pou lèd ke Jéova i aport anou si nou komèt in péché grav.

3. Konfès anou i pèrmèt la gérizon

Kan nou pèch, nou blès Jéova. Donk, lé normal ke nou konfès anou. Lir Psom 32:1-5 é koz su késtion la :

Poukosa lé mieu konfès nout bann péché avèk Jéova pluto ésèy kachièt ali ?

Pou santi anou mieu, nou la bezoin konfès nout bann péché avèk Jéova, é osi chèrch lèd bann zansien. Gard le VIDÉO é koz su le késtion ki vien apré.

VIDÉO : « Jéova i fouèt sak li ièm » (3:01)

Koman bann zansien la èd Canon revni vèr Jéova ?

Nou doi èt onèt avèk bann zansien ; zot lé la pou èd anou. Lir Jak 5:16 é koz su késtion la :

Poukosa lé plu fasil pou bann zansien èd anou si nou lé onèt èk banna ?

Konfès out péché, di la vérité èk bann zansien é aksèp lèd plin lamour Jéova.

4. Bann bon léfé kan i éskomunié

In moun ke la komèt in péché grav é ki refuz suiv bann rekomandasion Jéova, i pe pa rès dan lasanblé. Donk, li lé éskomunié ; nou frékant pa é nou koz pa èk li non plu. Lir 1 Korintien 5:6, 11 é 2 Jan 9-11 é koz su bann késtion la :

Kosa i éspas kan nou mèt le levin dan in pat ? Kèl léfé in pécheur ki repan pa li, i pe avoir su lasanblé ?

In bonpe zéskomunié la revni dan lasanblé. Sa la fé mal azot kan la korij azot, mé sa la èd azot pou revni a la rézon (Psom 141:5). Gard le VIDÉO é koz su le késtion ki vien apré.