Kan bann zanfan la finn gran, zot néna le gran résponsabilité fé an sort de bien okup zot bann paran ke lé finn vieu. La Bib i di ke zot i devré ‘dabor fémont zot foi an Bondieu dan zot prop fami é rann zot bann paran tout sak zot i doi banna. Ala sak i fé plézir Bondieu’ (1 Timoté 5:4, Bible en français courant). Kan bann zanfan i fé léfor prann soin zot bann paran ke lé finn vieu, zot i obéi le komannman la Bib, donn loneur zot paran (Éfézien 6:2, 3).

 La Bib i di pa klèrman koman i fo fé pou okup nout bann paran ki viéyi. Seulman, li koz su bann bonom èk bann madam ke lavé foi dann Bondieu é ke la okup zot bann paran. Li donn anou osi bann konsèy util ke va èd anou.

•  Dann tan biblik, koman té okup bann gramoun ke té fé parti la fami ?

•  Pou sak i doi okup zot bann paran, kèl konsèy util la Bib i donn ?

•  Èske la Bib i oblij anou gard nout bann paran ke lé finn vieu zot kaz pou okup de zot ?

 An vré, té i dépan le situasion.

•   Jozèf té abit loin son papa Jakob ke té finn vieu. Mé kan li la gingn lokazion, li la fé an sort ke son papa i vien viv koté li. Li la donn son papa in kaz pou abité, sak i fo pou manjé é li la vèy desu son papa (Jenèz 45:9-11 ; 47:11, 12).

•   Rut la parti abit dann péi son bèl mèr, é li la travay dur pou prann soin d’li (Rut 1:16 ; 2:2, 17, 18, 23).

•   Jézu, jus avan li mor, la choizi in moun pou okup son momon, Mari a (Jan 19:26, 27).

 Mèm si défoi okup nout bann paran ke lé finn vieu i uz nout kor é nout moral, la Bib i donn anou bann zansègnman ki gid anou pou ke nou gingn okup de zot.

•   Donn loneur nout paran.

   Sak la Bib i di : « Donn loneur out papa é out momon » (Égzod 20:12).

   Koman aplik se lansègnman biblik la ? Fémont ke ou donn loneur out bann paran, lès azot débrouy azot par zot mèm tank zot i gingn. Tank lé posib, lès azot pran le bann désizion ki konsèrn azot. Mé mont osi ou donn azot loneur kan ou fé tout out méyeur posib pou èd azot.

•   Konprann azot é pardonn azot.

   Sak la Bib i di : « Lé sur, in moun ki pran le tan konprann kosa néna dèryèr in situasion i pran pa la kolèr vitman, é kan i blès ali é ke li pas pard’su, li mérit in gran réspé » (Provèrb 19:11).

   Koman aplik se lansègnman biblik la ? Si in papa momon ke lé finn vieu i di in nafèr pa tro janti oubien si na lèr li lé pa tro rekonésan pou lèd ou aport ali, demann aou : « Si mi té gingn pu tro fé gran choz kom li koman mi noré santi amoin ? » Si ou fé léfor konprann azot é pardonn azot, ou va évit agrav le situasion.

•   Demann konsèy.

   Sak la Bib i di : « Bann projé i march pa kan nou rod pa konsèy, mé kan néna in tralé i donn konsèy bann projé i ariv obout » (Provèrb 15:22).

   Koman aplik se lansègnman biblik la ? Réfléchi bien koman ou sa okup out bann paran ke lé malad. Pran ransègnman su bann zèd ke néna ousa ou abit. Koz èk dot moun ke lé dan le mèm situasion ke ou. É si ou néna bann frèr é seur, pans réuni la fami pou voir kosa zot paran la bezoin, mé osi koman chakèn i pe fé son par pou okup de zot.

•   Rekonèt nout bann limit.

   Sak la Bib i di : « La sajès lé avèk sak i rekoné zot bann limit » (Provèrb 11:2).

   Koman aplik se lansègnman biblik la ? Rekoné out bann limit. Pa toulmonn néna le mèm tan ni le mèm fors. Daoir se bann limit la nora in léfé su sak ou pe vréman fé pou out bann paran. Si okup banna i fé tro pou ou, demann in koudmin out fami ou bien bann domoun ke sé zot métié.

•   I fo nou okup de nou.

   Sak la Bib i di : « Okin bonom la jamé détès son prop kor, mé li donn manjé é li pran soin son prop kor » (Éfézien 5:29).

   Koman aplik se lansègnman biblik la ? Mèm si ou doi okup out bann paran, ou doi osi okup de ou èk out fami si ou lé maryé. Manj bann manjé ke lé bon pou out kor. Pran le tan bien repoz aou é bien dormi (Éklézias 4:6). É kan lé posib, fé ot choz. Komsa dan out keur, dan out tèt é dan out kor, ou va santi aou mieu pou okup out bann paran.

 La Bib i di pa rien ladsu. Tank zot paran i gingn ankor rès dan zot kaz, désèrtin fami va désid lès azot laba, oubien va pran banna ché zot. Mé somanké in moman doné le méyeur solusion pou zot i pouré èt le mézon retrèt. La fami i devré rasanm azot pou désid sak lé mieu pou toulmonn (Galat 6:4, 5).