Malgré zot bann zéfor, domoun i gingn arpa mèt la pé su la tèr. Sé le roiyom Bondieu in gouvèrnman dann sièl ke va mèt sa an plas. Jézu Kris lé le chèf roiyom Bondieu. Regard sak la Bib i aprann anou su gayar léspérans la :

1.   Bondieu la promèt ke li va aport la « pé su la tèr pou domoun ke li ièm ». Pousa, li va « fé arèt bann gèr su tout la tèr » (Luk 2:14, Parole vivante ; Psom 46:9).

2.   Depu dann sièl, le roiyom Bondieu va dirij tout la tèr (Danièl 7:14). Kom li lé in gouvèrnman mondial, li va fé disparèt le santiman i pous domoun pou défann zot nasion parske sa mèm i provok in bonpe dézakor.

3.   Jézu, le chèf roiyom Bondieu, lé aplé « Prins la pé ». Li « va garanti la pé pou toultan » (Izai 9:6, 7, Parole de Vie).

4.   « [Bondieu] i détès domoun i ièm la violans. » Sak lé batayeur é i ve pa chanjé nora poin le droi viv sou dominasion roiyom Bondieu (Psom 11:5 ; Provèrb 2:22).

5.   Bondieu i aprann sak i aksèp son dominasion koman viv an pé. Kèl rézulta sa i donn ? « Zot va transform zot bann lépé an zouti pou travay la tèr é zot lans an sizay. In nasion va pa lèv lépé kont in nasion, é zot i aprandra pu fé la gèr » (Izai 2:3, 4).

 Depu koméla, gras lansègnman Bondieu bann milion Témoin Jéova su tout la tèr i aprann viv an pé (Matieu 5:9). Zot lé pa mèm ras, é zot i abit dann 240 péi é téritoir. Malgrésa, zot i refuz konbat zot prochin.