Čitin so ulo e Karinake hem razmislin so bi kerea sine tu te ove sine lake ko than.

 Karina: Džikote vozinava sine te džav ki škola, jekh policajco ačhavgja man hem pišingja mange kazna soske vozinava sine but sigate. But sium sine holjami! Phengjum me dajake hem oj vakergja mange te kerav lafi me dadea. A adava na mangljum ni najhari te kerav.

  So bi kerea sine tu?

1.  A: Ka kerav man sar te phene ništo na ulo hem ka nadinav man kaj mo dad nikogaš nane te doznajnel adava.

2.  B: Ka vakerav sa me dadeske.

 Šaj ka ove ko iskušenie te birine i opcija A. Šaj ti daj mislinela peske kaj tu više vakergjan te dadeske hem adaleske oj nane te vakerel leske ništo. Ama, isi šukar pričine soske te priznajne tle greške, bizi razlika dali dobingjan kazna so vozingjan sigate ili kergjan nešto javer.

1.  1. Adaleske so adava tano ispravno te kerel pe. O hristijanja valjani te živinen sprema akala lafija tari Biblija: „Mangaja ko sa o bukja te ova poštena“ (Evreite 13:18).

    „Trudingjum man but te ovav iskreno, te phiravav o posledice taro mle postapke hem te priznajnav mli greška odma“ (Aleksis).

2.  2. Adaleske so o javera ka oven pospremna te prostinen okolenge so priznajnena pumare greške. Ki Biblija pišinela: „Koj garavela ple grevija nane te ovel le uspeh, a okova so priznajnela len hem na kerela len više, ka sikavel pe leske milost“ (Izreki 28:13).

    „Valjani hrabrost te priznajnel pe jekh greška, ama agjaar o javera ka ovel len doverba ki tute. Agjaar ola ka dikhen kaj sian iskreno. Koj priznajnela pli greška, ekvaš prostinela pe leske“ (Ričard).

3.  3. Soj najvažno, adalea keraja e Jehova bahtalo. Ki Biblija pišinela: „E Jehovaske tane odvratna o nečesna manuša, a paše tano okolencar soj tane pravedna“ (Izreki 3:32).

    „Otkeda kergjum jekh seriozno greška, haliljum kaj, valjani te priznajnav la, soske samo agjaar o Jehova ka nagradinel man“ (Rejčel).

 So kergja i Karina? Oj manglja te garavel i kazna taro plo dad. Ama adava našti sine te garavel le večno. Oj vakerela: „Palo jekh berš, džikote mo dad dikhela sine o dokumentija bašo osiguruvanje, arakhlja i kazna so dobingjum. Adalea kergjum mange panda pobare problemija — čak mi daj holjangja so na kergjum adava so vakergja mange!“

 So sikljovaja taro akava: I Karina vakerela: „Keda garavea tle greške, kereja tuke pobare problemija. Koga-togaš, ka oven tut posledice taro adava!“

 Sekova manuš kerela greške (Rimjanite 3:23; 1. Jovanovo 1:8). Isto agjaar sar so dikhlem, ako odma priznajnaja amare greške, sikavaja kaj siem zrela hem ponizna manuša.

 Javer buti so valjani te kere tani te sikljove taro tle greške. Žalno tano adava, so but terne na kerena adava. Ola šaj osetinena pe isto sar jekh tinejdžerka, i Prisila, koja so vakerela: „Poangle sine mange but pharo keda kerava sine nesave greške. Adaleske so sine man lošno mislenje baši mande, sekoja mli greška dikhjola pe sine mange sar pharo tovari kova so našti te phiravav le. Osetinava man sine but razočarimi hem mislinava sine kaj mange nane nisavi nadež“.

 Dali tu da osetinea tut nekogaš agjaar? Ako oja, ma bistre akava: Ako stalno razmislinea bašo tle greške so kergjan len, adava tano isto sar te vozine vrda hem celo vreme te dikhe ko retrovizor. Ako koncentririnea tut ko adava so ulo poangle, ka osetine tut kaj na vredinea hem nane te ovel tut sila te ikljove ko krajo e predizvikoncar so ka oven.

 Namesto adava trudin tut te dikhe uramnoteženo ko tle greške.

 „Setin tut ko tle greške, sikljov lendar te šaj te na kere len palem. Ama ma te vrtinen pe tuke ki godi celo vreme te šaj te na razočarine tut“ (Eliot).

 „Trudinava man tari sekoja mli greška te sikljovav sar te ovav pošukar ličnost hem sar te postapinav ako palem arakhljovava ki slično situacija. Adava ka pomožinel man te ovav pozrelo“ (Vera).