Na. Ked uporedinaja o purane rukopisija dikhaja so i Biblija ki osnova nane menjimi, iako hiljade berša prepisinđe la ko materijali kova propadini.

 Arakhlje pe više ando hiljade purane e biblijake rukopisija. Disave olendar hine len nekobor razlike so mothovi amenđe so hine greške đi prepisinđe pe. But ando akala razlike tane tikne hem na prominđe o smisao ando tekst. Ama, otkrijime tane hem nekobor pobare razlike. Izgleda so disave olendar tane but berša angleder namerno ćhivde ko originalno tekst te bi i poruka andi Biblija promenini pe. Hajde te dikha duj asavke primerija:

1.   Ki 1. Jovanova 5:7, ko disave purane e biblijake prevodija isi akala lafija „ko nebo: o Dad, o Lafi hem o sveti Duh; akala trin tane jekh.“ Ama, o pouzdana rukopisija potvrdinena so akala lafija na hine ko originalno tekst. On hine dodajime pokasno. a Odolese on nane ko savremena prevodija.

2.   E Devleso anav pojavini pe hiljade putija ko purane e biblijake rukopisija. Ama, ko but e biblijake prevodija ov hine zamenimo e titulencar sar soj tane „Gospod“ ili „Devel“.

 Đi akana but rukopisija tane otkrijime hem odolese tano polokho te arakhen pe o greške nego angleder. b So otkrijinđa pe ando odova da li tani i Biblija avdije tačno ked uporedinđe pe akala dokumentija?

•   O izučavalac Vilijam Grin ando tekst kotar hebrejsko deo andi Biblija (kova tano penđardo hem sar „Purano zavet“) phenđa: „Slobodno šaj te phenel pe so nijekh purano delo na hine ađahar tačno prenosimo.“

•   E biblijako izučavalac o Frederik Brus ando grčko deo kotar Biblija ili o „Nevo zavet“ pisinđa: „O dokazija kola mothovena kobor tano tačno o tekst ando Nevo zavet tane but pobare ando avera lila kola pisinđe o klasična piscija, a ki kasi tačnost nikase ni na perela ki godi te sumnjini.“

•   O Ser Frederik Kenjon, o uvaženo stručnjako aso e biblijake rukopisija phenđa so o manuš „šaj te ljel ko pe vasta celo Biblija hem bizi dar hem bizi sumnja šaj te phenel so ko pe vasta ićeri o ćaćutno e Devleso Lafi kova vekonencar hine prenosimo andi generacija ki generacija bizo nesave važna promene.“

•   Hem o jevrejska hem o hrišćanska prepisivačija tačno prepisinđe o izveštaja kola vaćerena ando ozbiljna greške kola ćerđe e Devlese sluge (Brojevi 20:12; 2. Samuilova 11:2-4; Galatima 2:11-14). c Isto ađahar, on prepisinđe hem o delovija ko kola vaćeri pe so o jevrejsko narodo hine osudimo odolese so hine neposlušno hem ko kola otkrijinena pe o hovavne manušikane sikljoviba (Osija 4:2; Malahija 2:8, 9; Matej 23:8, 9; 1. Jovanova 5:21). Odolese so sa tačno prepisinđe, akala prepisivačija mothovđe so zaslužinena amaro poverenje hem so hor poštujinena e Devleso Lafi.

•   Zar nane logično te razmislina so o Devel kova pe svetone duhoja vodinđa o pisibe andi Biblija isto ađahar šajinđa te pobrinini pe oj te aćhol tačno? d (Isaija 40:8; 1. Petrova 1:24, 25). Isto ađahar, ov manglja oj te ovel korisno hem amenđe avdije, a na samo e manušenđe ko purano vreme (1. Korinćanima 10:11). Ustvari, „sa so hine pisimo angleder, pisimo tano te sikavi amen hem te del amen snaga te istrajina, te bi ovela amen nada“ (Rimljanima 15:4).

•   O Isus hem olese učenikija citirinđe ando hebrejsko deo kotar Biblija hem na sumnjinđe da li tano ov tačno (Luka 4:16-21; Dela 17:1-3).