O TERNE PUĆENA
Sar šaj i Biblija te pomožini man? – 1. deo: Penđar i Biblija pana pošukar
„Pokušinđum te čitinav i Biblija, ama ked dikhljum kobor tani bari vazdinđum me vasta kotar čitibe“ (Brajana, 15).
Da li hem tu osetineja tut ađahar? Akava članko šaj te pomožini tuće.
Sose valjani te čitine i Biblija?
Da ti tano tuće dosadno te čitine i Biblija? Ako tano ađahar, odova tano normalno. Šaj mislineja soj tani i Biblija knjiga koja isi la prekalo hiljada strane, sitna slovija hem nane la nijekh slika – nane odobor zanimljivo sar ked dikheja televizija ja diso ko internet!
Ama razmislin ando akava: Ked bi arakheja jekh purano sanduko pherdo blago, zar na bi mangeja te đane soj tano andre?
I Biblija tani sar asavko sanduko. Koro late isi but šukar savetija kola šaj te pomožinen tut:
Te ane šukar odluke
Te nakhe šukar te roditeljencar
Te arakhe šukar amala
Te ikljove ko krajo te problemencar
Sar šaj jekh asavki purani knjiga te ovel odobor korisno ko amaro vreme? Koro late pisini: „Celo Lil avela ando Devel“ (2. Timoteju 3:16). Odova značini so o savetija kola tane ki Biblija avena andi najmudro osoba.
Sar valjani te čitine i Biblija?
Sar prvo, šaj te čitine la ando početko đi o krajo. Ađahar ka đane sostar oj ćaće vaćeri. Isi pana but avera načinija sar šaj te čitine la. Aće duj predlogija:
Čitin redoja olake 66 knjige, ando Postanak đi o Otkrivenje.
Čitin redoja o događaja kolendar vaćeri i Biblija, ađahar sar so ulje.
Savet: Ko prevod Novi svet, ko dodatak A7 šaj te dikha o najvažna buća kola o Isus ćerđa ked hine ki phuv, kola tane pisime ađahar sar so ulje.
Sar dujto, šaj te čitine o deo andi Biblija kova vaćeri ando diso so tut zanimini. Na primer:
Da li mangeja te ovel tut prava amala? Čitin i priča ando Jonatan hem ando David (1. Samuilova, poglavlja 18-20). Palo odova, phrav o radni list „Kako pronaći odane prijatelje“ hem dikh so šaj te sikljove andi odija priča.
Da li mangeja te đane so šaj te ćere te na pere ko iskušenje? Čitin so ćerđa o Josif te na perel ko iskušenje (Postanak, 39. poglavlje). Palo odova, phrav o radni list „Kako se odupreti iskušenju – Josif (1. deo)“ hem „Lažno optužen! – Josif (2. deo)“ hem dikh so šaj te sikljove andi odija priča.
Da li mangeja te đane sar šaj i molitva te pomožini tut? Čitin so doživinđa o Nemija (Nemija, 2. poglavlje). Palo odova, phrav o radni list „Bog je uslišio njegovu molitvu“ hem dikh so šaj te sikljove andi odija priča.
Savet: Ked čitineja i Biblija, arakh jekh mirno than te šaj ti godi te ovel ko odova so čitineja.
Sar trito, birin dijekh događaj andi Biblija ja dijekh psalam, čitin le hem palo odova razmislin so sikljiljan odolestar. Palo odova so ka čitine odova deo, puć tut:
Sose o Jehova manglja akava te ovel pisimo ki Biblija?
So akava mothovi manđe odolestar savo tano o Jehova hem sar postupini?
Sar šaj te ićerav man ko odova so čitinđum?
Savet: Ćhiv tuće cilj! Birin jekh datum ked ka počmine te čitine i Biblija.