Amen las amen chachimasa pala so phenel e Biblia pa sar trobus te seras e martia le Jesusoski, kai uni manush phenen lake “o jamos le Gazdesko” vai o paluno jamos (1 Corintios 11:20, La Biblia. Traducción del Nuevo Mundo [NWT]). Numa, so keren ai so pakian uni religionuria pa kako chi avel katar e Biblia.

 Kana seras e martia le Jesusoski seras so kerdias o Jesus pala amende ai sikavas amaro naisimos (Mate 20:28; 1 Korintiana 11:24). Chi seras kako te del amen vareso o Del vai te iertil amen. Ke e Biblia sikavel ke o Del shai iertil amare bezeja te sikavasa pakiamos ando Jesus, ai na pala vareso kai keras butivar vai suako data (Romanos 3:25, NWT; 1 Jono 2:1, 2, E Nevi Viasta ai o Psalmo [ENV]).

 O Jesus phendias peske disiplonge te seren leski martia, numa chi phendias sodivar (Luk 22:19). Uni manush gindin ke trobun te seren la suako shon; aver suako kurko, suako gies, vai butivar ando gies, vai kana kamena te seren la. Numa, si uni prame kai trobus te zhanas.

 O Jesus thodias o paluno jamos o gies kai serelaspe e patrazhi andal judiuria; ai uni chasuria mai angle mulo (Mateo 26:1, 2, NWT). Numa sas pala varesoste ke o Jesus mulo godo gies. E Biblia phenel ke o sakrifis le Jesusosko sas sar iek bakrorho patrazhako (1 Corintios 5:7, 8, NWT). E patrazhi serelaspe iek data ando borsh (Éxodo 12:1-6; Levítico 23:5). Vi le pervo kristianuria serenas e martia le Jesusoski iek data ando borsh, pala godo le marturia le Jehovaske keras sa iek fialo, sar phenel e Biblia. a

 Sar thodias o paluno jamos o Jesus azhutil amen te das po gor sodivar trobus te seras les, ai vi te zhanas o gies ai o chaso. O Jesus kerdias godo polme te perel o kham o 14 anda o nisan anda o borsh 33, katar o calendario la Bibliako kai lelpe katar o shenuto (Mate 26:18-20, 26). Vi le Marturia seras suako borsh e martia le Jesusoski godo gies, sar kerenas le pervo kristianuria. b

 O 14 anda o nisan anda o borsh 33 sas parashtune, numa suako borsh shai avel fersavo gies anda o kurko. Te zhanas savo gies si te avel o 14 anda o nisan, le marturia le Jehovaske keras sar ande vriama le Jesusoski, ai na sar keren le judiuria agies. c

 Ande kako jamos, o Jesus lias manrho kai numa sas les arho ai pai, ai vi lias mol loli katar so ashilo anda e patrazhi (Mate 26:26-28). Pala godo, vi amen lasharas iek manrho sar godo. Ande mol loli chi trobul te avel khanchi, sar shikieri, ai chi likoro, ai nashtil te avel andal struguria kai nai len fermenchala, numa trobul te avel mol loli.

 Uni religionuria len manrho kai si les fermenchala. Numa, ande Biblia, e drozhda butivar phenelpe ke si sar o bezej vai vareso kai rimol (Luk 12:1; 1 Korintianuri 5:6-8, ENV; Galatiana 5:7-9). Pala godo, o manrho kai numa sas le arho ai pai si sar o stato le Jesusosko kai nas les khanchi nasul (1 Petri 2:22). Aver religionuria len so kerdiol andal struguria, numa nai mol. Chi len mol sostar chi meken len te pen pimos. Numa godo chi sikavel e Biblia (1 Timote 5:23).

 O manrho kai nai les fermenchala ai e mol e loli azhutil amen te gindis ando stato ai ando rat le Kristosko. Chi kerdion chaches o stato ai o rat le Kristosko ai chi aminpe leske statosa ai leske ratesa sar te avela iek milagro sar uni manush gindin. Aida dikhas so sikavel e Biblia pa kako.

•   Te avela ke o Jesus mangliasas katar peske disiplonge te pen anda lesko rat, godo sas sar te mangliasas te na pakian o mui katar o Del kai tradias te na keren godo (Génesis 9:4; Le Apostolengo 15:28, 29). Numa o Jesus nas te mangel lendar vareso kai zhal opral pa le zakonuria katar o Del kai denas duma pa o rat (Iovano 8:28, 29).

•   Godia riat, le apostluria chi pile anda o rat le Jesusosko sostar vo phendias ke lesko rat trobulas te avel shordo, godo kamelas te phenel ke lesko sakrifis sachi kerdilo (Mate 26:28).

•   O Jesus dias pesko traio “ferdi jekh data” (Zhidovuri 9:25, 26, ENV). Numa te avela ke suako data kai serelpe leski martia, o manrho ai e mol kerdiol stato ai rat, le manush kai jan ai pen si sar te keren pale o sakrifis le Jesusosko.

•   O Jesus phendias: “Keren kadia te den [tumen] goji mande”, chi phendias: “Keren kadia, te kerdiol pale murho sakrifis” (1 Korintiana 11:24).

 Uni manush gindin ke o manrho ai e mol kerdion o stato ai o rat chachune le Jesusoske pala sar ambolde ande aver shiba uni verseturia katar e Biblia. Iek ejemplo si, ke but Bibli ambolde ande aver shiba o divano katar o Jesus kana dias duma pa e mol gadia: “Ke kado si murho rat” (Mate 26:28). Numa, le suaturia katar o Jesus shai amboldenpe sar: “Kako si sar te avela murho rat” vai “kako si sar murho rat”. d Sar kerdias butivar o Jesus kana sikavelas, katse phendias iek paramichi (Mate 13:34, 35).

 Kana le marturia le Jehovaske seren o jamos le Gazdesko, tsirha anda lende jan anda o manrho ai pen anda e mol. Sostar?

 Kana shordiaspe o rat le Jesusosko, thodiaspe iek nevo pakto kai meklias rigate o purano kai kerdiasas o Jehova de dumut le manushentsa anda o Israel (Zhiduvuria 8:10-13). Le manush kai si tela godo nevo pakto jan anda o manrho ai pen anda e mol o gies kai serelpe e martia le Jesusoski. Nashtin te keren godo sa le kristianuria, numa keren les godola kai o Del alosarel (Hebreos 9:15, NWT; Luk 22:20, ENV). Kakala kristianuria si te amperetsin le Kristosa ando cheri. E Biblia sikavel ke numa 144.000 manush si te avel len godia buki (Luk 22:28-30; Sikavimos [Apocalipsis] 5:9, 10; 14:1, 3, ENV).

 Makar tsirha “bakriorha” si te amperetsin le Kristosa, sa le kolaver kristianuria azhukeras te avas anda “o baro narodo” kai si te trail pe Phuv ai te lel o traio kai chi mai getolpe (Luk 12:32; Sicharimos 7:9, 10). Makar godola kai azhukeras te trais pe Phuv chi jas anda o manrho ai chi pias anda e mol, chidas amen te seras e martia le Jesusoski te sikavas ke naisis o sakrifis kai o Jesus kerdias pala amende (1 Jono 2:2, ENV).