Ande Biblia nai o suato aborto te del duma pa kana varekon terdiarel o traio peska glatako. Numa but verseturia azhutin amen te aliaras sar dikhel o Del o traio le manushengo ai vi o traio katar iek glata kai chi arakhadili.

 O traio si iek lashi prama katar o Del (Génesis 9:6; Salmo 36:9). O traio mol but le Devleske, ai vi o traio katar iek glata kai si ando gi peska dako. Pala godia kana terdiaren o traio katar iek glata kai sachi arakhadili, si iek mundarimos.

 O zakono kai o Del dias ka le israeliti phenelas: “Te avela si mursh kai marenpe ai malaven iekha zhuvlia phari ai pala godo e glata arakhadiol makar nai e vriama numa khonik chi merel, o doshalo trobul te pokinel so mangela o rhom la zhuvliako pala o nasul kai kerdias. Trobul te pokinel so mothona godola kai shinen kris. Numa te merela varekon, trobus te des traio pala traio” (Éxodo 21:22, 23). a

•  Kana astarel te trail iek manush?

•  Iertil o Del iekha zhuvliake kai kerdias peske iek aborto?

•  Te avela ke e zhuvli vai e glata shai meren, si vorta te kerel peske iek aborto?

 Le Devleske astarel te trail iek manush kana iek zhuvli ashel phari. Ande Biblia o Del sikavel ke e glata ando gi peska dako, si aver manush. Aida dikhas uni ejempluria kai sikaven ke o Del dikhel sa iek fialo ka iek glata kai si ando gi peska dako ai aver kai arakhadili.

•   Mashkar o sunto dujo o amperato David phendias le Devleske: “Kire iakha dikhle man kana kerdiuvavas ando gi murha dako” (Salmo 139:16). Godo sikavel ke o Del dikhelas ka o David sar iek manush mai anglal te arakhadiol.

•   Aver ejemplo si, ke mai anglal te arakhadiol o profeta Jeremias o Del alosardias leske iek bari buki. Vo phendias leske: “Mai anglal te kerava tu ando gi, prinzharavas tu; ai mai anglal te arakhadios, suntsosardem tu, kerdem tu profeta le themenge” (Jeremías 1:5).

•   O Lukas, kai sas iek andal manush kai ramosarde e Biblia, sas dojtoro. Vo te del duma pa iek glata kai chi arakhadili ai pa iek kai gata arakhadili phendias numa iek vorba griega (Luk 1:41; 2:12, 16).

 Ei, o Del shai iertil iekha zhuvliake kai kerdias peske iek aborto. Te avela ke astarel te dikhel o traio sar dikhel les o Del nai pala soste te aliarelpe tristo ai doshali. E Biblia phenel: “O Jehova sikavel mila ai lashimos [...]. Gadia dur sar si o este katar o oeste, gadia thodias amendar amare bezeja” (Salmo 103:8-12). b O Jehova iertil godoles kai keilpe ilesa anda so kerdias, sar godoles kai kerdias peske iek aborto ai keilpe (Psalmo 86:5, E Nevi Viasta ai o Psalmo).

 Pa so sikavel e Biblia pa o traio katar e glata kai si ando gi peska dako, iek zhuvli nashtil te kerel peske iek aborto makar iek andal dui shai jasaren o traio.

 Ai te avela ke ando gies kana arakhadiol e glata si vareso kai chi azhukerelpe ai trobul te alosarelpe o traio la zhuvliako vai katar e glata, kon trobul te alosarel? Kana nakhen gadala dieli, trobun te alosaren le dada katar e glata.