Motholpe, ke ando Estados Unidos o 80% katar le terne rhuginpe ka o Del, numa dopash anda lende rhugilpe suako gies. Shai avela uni pushenpe: ‘Si o rhugimos vareso kai azhutil man te aliarau man mai mishto?’

•  Chachimasa so si o rhugimos?

•  Chaches ashunel man o Del?

•  Pa save prame shai rhugiu?

•  So phenen aver terne

 Kana rhugis si te das duma le Jehovasa, kon kerdias sa le prame. De tu gogi so si godo amenge! Makar vo mai baro lo katar fersavo manush, “nai dur amendar” (Le Apostolengo 17:27). Pala godo, e Biblia mothol amenge vareso defial shukar: “Pashon pasha Del, ai o Del pashola pasha tumende” (Iakov 4:8).

 So shai keres te pashos ka o Del?

•   Rhugisavo. Gadia tu des duma lesa.

•   Estudisar e Biblia. Gadia si sar o Del del duma tusa.

 Te keresa godo, te rhugis tu ai te estudisa e Biblia, si te azhutil tu te aves mai amigo le Devlesa.

 “Te das duma le Jehovasa, amaro Baro Del, si e podarka mai bari kai si les iek manush” (Jeremy).

 “Kana phenau ka o Jehova so si man ando ilo, aliarau man mai pashe lestar” (Miranda).

 Makar pakiasa tu ando Del ai rhugis tu leste, shai avela nai tuke vushoro te gindis ke vo chachimasa ashunel tu. Numa e Biblia phenel pa o Jehova ke vo si kon ashunel o rhugimos (Salmo 65:2). Ai vi phenel tuke ke shai des duma lesa pa suako briga kai si tu. Sostar? Ke vo lel sama tutar (1 Petri 5:7).

 Gindi tu: Des duma suako gies kire amigonentsa? Shai keres gadia le Devlesa. De duma lesa suako gies ai akhar les pa lesko anau, Jehova (Salmo 86:5-7; 88:9). E Biblia phenel tuke te rhugis leske suako gies (1 Thesaloniana 5:17).

 “Kana rhugiu, dau duma murhe Dadesa ke si ando cheri ai putrau sa murho ilo” (Moises).

 “Phenau ka o Jehova dieli kai si bare mange, sar phenau murha dake ai ka murhe chache amiguria” (Karen).

 E Biblia phenel: “Ande soste godi mangen katar o Del ando rhugimos so trobul tumen ai mangen lestar iekhe ilesa kai naisil leske” (Filipiana 4:6).

 Atunchi si vorta te phenes le Devleske le bedi kai si tu? Ei, shai keres godo! E Biblia phenel tuke: “Tho kiro pharimos po Jehova, ai ninkerela tu” (Salmo 55:22).

 Na numa trobus te mothos le bedi kai si tu. E Chantelle phenel: “Te rhugiva man ka o Jehova, numa te mangau lestar te azhutil man, chi si te avau lashi amiga”. Ai mai phenel: “Mai anglal katar fersavi prama trobus te naisis leske, ai chachimasa si pala but dieli kai trobus te avas naisime”

 Gindi tu: Pala soste san naisime? De tu gogi trin prame kai shai naisis agies ka o Jehova.

 “Vareso tsinorho, sar te las sama iek lulugi, shai kerel te rhugis ka o Jehova te naisis leske” (Anita).

 “Shai te des tu gogi ande iek verseto la Bibliako kai plachal tu vai ande vareso kai kerdias o Jehova, polme shai naisis leske pala godo” (Brian).