Madzrungula Lamanene Lama Tsraliwiki hi Luka 22:1-71
-
Vaprista va hamba mazrengu ya ku dlaya Yesu (1-6)
-
Ku lulamiseliwa ka Paxkwa dzra wugamu (7-13)
-
Ku simekiwa ka Xilalelo xa Hosi (14-20)
-
“Lweyi a taka ni wonga a tsrhame na mine kola menzeni” (21-23)
-
Ku holovisana lokukulu hi leswaku hi mani lwenkulu (24-27)
-
Yesu a hamba xipfumelelanu xa Mfumu (28-30)
-
Yesu a profeta leswaku Petro a ta mu yala (31-34)
-
Tsrhamani na mi longile; swipada swibidzri (35-38)
-
Xikhongoto xa Yesu na a li Nhaveni ya Minhlwazri (39-46)
-
Ku khomiwa ka Yesu (47-53)
-
Petro a yala Yesu (54-62)
-
Yesu a hambiwa xihlekiso (63-65)
-
Yesu a thethisiwa a mahlweni ka Sanedri (66-71)
22 A Nkhuvu wa Mapawu lawa ma kalaka ma nga txheliwanga Fermentu,* lowu vitaniwaka Paxkwa, a wu li kusuhi.
2 Nakone a vaprista lavakulu ni vatsrali a va djula ku dlaya Yesu, kambe a va djuletela ndlela leyinene ya ku yentxa leswo hikusa a va txhava vhanu.
3 Kutani Sathana a nghena ka Yudasi Iskariyota, lweyi a a li mun’we wa lava 12,
4 hiloko a suka a ya khanelisana ni vaprista lavakulu kun’we ni valaviseli va tempele mayelanu ni ndlela leyi a nga mu wongaka ha yone a mu nyikela kwavu.
5 Va nyonxa ngopfu hi swone kutani va pfumelelana ku mu nyika mali ya prata.
6 Xileswo a pfumela a va a sungula ku djuletela mukhandlu lowunene wa ku mu wonga a mu nyikela kwavu na ku nga na xitsrhungu.
7 Kutani ku tlhase siku dzra Nkhuvu wa Mapawu lawa ma kalaka ma nga txheliwanga Fermentu,* ku nga siku ledzri a magandzrelo ya Paxkwa a ma fanela ku nyikeliwa hi dzrone;
8 xileswo Yesu a zruma Petro na Yohane a ku: “Fambani mi ya lulamisela a Paxkwa akuva hi da.”
9 Va mu vutisa va ku: “U djula hi ya dzri lulamisela kwini?”
10 A va byela a ku: “Loko mi nghena doropeni, mi ta tlhangana ni wanuna lweyi a zrwaliki hotsro ya mati. Mu landzrani ka yindlu leyi a taka nghena ka yone.
11 Kutani mi byela n’winyi wa muti mi ku: ‘Mudondzrisi a li: “Dzri kwini a sala dzra vayeni ledzri ni nga delaka ka dzrone a Paxkwa ni vadondzrisiwa vanga?”’
12 A ta mi komba a sala dzra dzrikulu ledzri kumekaka henhla, ledzri nga ni leswi vilelekaka akuva hi dzri tizrisa. Hi lulamiselelani Paxkwa kolanu.”
13 Xileswo va suka va famba, va ya swi kumisa xileswi a va byelisiki xiswone, kutani va lulamisela Paxkwa.
14 Loko nkama wu tlhasa, a tsrhama menzeni ni vapostola vake.
15 Kutani a va byela a ku: “A ni swi navela ngopfu ku da Paxkwa ledzri na n’wine na ni nga si na xaniseka;
16 hikusa na mi byela, a ni nge he ti tlhela ni da Paxkwa ku ya tlhasa loko Mfumu wa Xikwembu Nkulukumba wu fuma kutani ku hetiseka leswi Paxkwa dzri yimelaka swone.”
17 Yesu a teka kopo a hamba xikhongoto xa ku tlangela kutani a ku: “Tekani mi siyelisana,
18 hikusa na mi byela, ku sukela swoswi, a ni nge he tlheli ni nwa vhinyu ku ya tlhasa loko Mfumu wa Xikwembu Nkulukumba wu ta.”
19 A tlhela a teka pawu, a hamba xikhongoto xa ku tlangela, a dzri khemelela a gama a va nyika a ku: “Pawu ledzri dzri yimela mizri wanga lowu taka nyikeliwa hi nkonta yenu. Tamani mi yentxa leswi akuva mi ni dzrimuka ha swone.”
20 Kutani ntsrhaku ka loko va lalelile, a yentxa leswi fanaka hi kopo, a ku: “A kopo ledzri dzri yimela xipfumelelanu leximpshwa lexi tiyisekisiwaka hi ngati yanga leyi taka halatiwa hi nkonta yenu.
21 “Kambe vonani! Lweyi a taka ni wonga a tsrhame na mine kola menzeni.
22 Nakunene a N’wana wa mhunu awa famba hi lani swi profetiwiki ha kone; kambe khombo ka lweyi a taka mu wonga!”
23 Xileswo, va sungula ku vutisana hi xivone leswaku i mani kwavu lweyi a pimisaka ku yentxa leswo.
24 Nambitanu, va sungula ku holovisana hi leswaku i mani lwenkulu a makazri kwavu.
25 Kambe a va byela a ku: “A tihosi ta matiko ti bindzrisela vhanu, nakone lava nga ni wulawuli a henhla ka wone va nyikiwa mavito ya ku hlawuleka.
26 Kambe n’wine a mi fanelanga mi fana na vone. Lweyi a nga nkulu a makazri kwenu a a fani ni lwentsrongo, nakone lweyi a zrangelaka a a fani ni lweyi a tizrelaka.
27 Ka lweyi a tsrhamiki menzeni* ni lweyi a phamelaka* hi wini lwenkulu? Xana a hi lweyi a tsrhamiki menzeni?* Kambe mine ni le makazri kwenu swanga lweyi a mi tizrelaka.
28 “Nambitanu, n’wine hi n’wine mi tamiki mi va na mine a mahlomulweni yanga;
29 nakone ni yentxa xipfumelelanu xa mfumu na n’wine swanga hi leswi Papayi wanga a yentxiki xipfumelelanu na mine,
30 akuva a Mfun’wini wanga mi da mi tlhela mi nwa na mine a menzeni wanga, mi tlhela mi tsrhama a swiluvelweni akuva mi yavanyisa tinxaka ta 12 ta Israyele.
31 “Simoni, Simoni, Sathana a hlaye leswaku a djula ku mi hehezra ku fana ni trigu.
32 Kambe ni ku kombelelile ka Xikwembu Nkulukumba leswaku a lipfumelo dzraku dzri nga holi; kutani loko a lipfumelo dzraku dzri tlhela dzri tiya, tiyisa lipfumelo dzra vamakwenu.”
33 Kutani Petro a mu byela a ku: “Hosi, ni tibekiselile ku pfaleliwa na wene a djele nambi ku li ku fa.”
34 Kambe Yesu a ku: “Na ku byela Petro, namunhla na nkuku wu nga si na yimba, u ta yala kazrazru leswaku wa ni tiva.”
35 A tlhela a va byela a ku: “A nkama ni mi zrumiki na mi nga na xipatxhi xa mali, nkwama wa manghunghu* ni masandaliya, xana mi pfumali swa kukazri?” Va ku: “Im-him!”
36 Kutani a va byela a ku: “Kambe swoswi lweyi a nga ni xipatxhi xa mali a a xi teki, ni lweyi a nga ni nkwama wa manghunghu a a wu teki, nakone lweyi a kalaka a nga na xipada a a xavisi xiyambalu xake a xi xava.
37 Na mi byela, a tsralwa ledzri liki: ‘A tekiwe a li mudohi.’ Dzri fanela ku hetiseka kwanga.” Hikusa leswi tsraliwiki mayelanu na mine swi le ku hetisekeni.”
38 Kutani va ku: “Hosi, lavisa! Hi ni swipada swibidzri lani.” Yesu a va byela a ku: “Swa yanela.”
39 A suka a ya Nhaveni ya Minhlwazri hi lani a a tolovela ku yentxa ha kone, kutani a vadondzrisiwa na vone va mu landzra.
40 Loko va tlhasa a nhaveni, a va byela a ku: “Yanani mahlweni mi khongota akuva mi nga weli ndzringweni.”
41 Kutani a tsrhindzreka kulenyana na vone, a khinsama hi matsrolo a sungula ku khongota,
42 a ku: “Papayi, loko u swi djula, susa kopo ledzri kwanga. Kambe ku nga yentxeki ku zrandzra kwanga, a ku yentxeki ku zrandzra kwaku.”
43 Kutani ku humelela ntsrumi leyi pfaka hi le tilweni yi tlhasa yi mu tiyisa.
44 Kambe a a kazratekile ngopfu swinene lakakuva a ya mahlweni a khongota hi mbilu hinkwayu, nakone a nyuku wake lowu a wu nthonela hansi a wu fana ni ngati.
45 Loko a heta ku khongota a suka a ya ka vadondzrisiwa, a va kuma na va khutsriyelile, hikusa a va kazralile hi leswi a va ni gome.
46 A va byela ku: “Ha yini mi le ku yetleleni? Pfukani, yanani mahlweni mi khongota, akuva mi nga weli ndzringweni.”
47 Na a ha vulavula, ku humelela xitsrhungu lexi a xi kongomisiwa hi wanuna mun’we lweyi a vitaniwaka Yudasi, lweyi a a li mun’we wa lava 12, kutani a tsrhindzrekelela Yesu a tlhasa a mu n’qunta.
48 Kambe Yesu a mu byela leswi: “Yudasi, u wonga N’wana wa mhunu hi ku mu n’qunta?”
49 Loko lava a va li matlhelweni kwake va vona leswi a swi djula ku yentxeka, va ku: “Hosi, xana hi nga lwa na vone hi swipada?”
50 A va mun’we wavu a tsrema nandzra wa muprista lwenkulu a mu susa ndleve ya xinene.
51 Kambe Yesu a ku: “Mi nga yentxi leswo.” Kutani a khumba ndleve ya nandzra yelweyo a mu hanyisa.
52 Ntsrhaku ka leswo, Yesu a byela vaprista lavakulu, valaviseli va tempele kun’we ni vakulukumba lava a va mu yelile akuva va ya mu khoma, a ku: “Mi ta na mi ni swipada ni tinhonga ingiki hi loko no va muyivi?
53 Nkama lowu a ni li na n’wine siku ni siku a tempeleni a mi ni khomanga. Kambe lowu i nkama wenu ni nkama wa kuva lava nga munyameni va fuma.”
54 Kutani va mu khoma va famba na yene, va mu yisa kaya ka muprista lwenkulu; kambe Petro a a va landzra hi le kule.
55 Loko va tlhavike ndzrilo a xikazri ka muti kutani va tsrhama xikan’we, Petro na yene a ye tsrhama na vone.
56 Kambe loko mutizri mun’we wa xisati a mu vona na a wozra ndzrilo, a mu pondzrolela kutani a ku: “Wanuna lweyi na yene a a li na yene.”
57 Kambe a yala a ku: “Wansati, a ni mu tivi.”
58 Ntsrhaku ka nkamanyana, wanuna mun’wana a mu vona a ku: “Na wene u mun’we wa vone.” Kambe Petro a ku: “Nanduwe, a ni yene.”
59 Ntsrhaku ka loko ku khalute kolomu ka wora, wanuna mun’wana a sungula ku sindzrisa a ku: “Nakunene wanuna lweyi a a li na yene, hikusa vhela i Mugalileya!”
60 Kambe Petro a ku: “Nanduwe, a ni swi tivi leswi u swi hlayaka.” Kutani hi nkama wolowo, na a ha vulavula, a nkuku wu yimba.
61 Hiloko a Hosi yi ndzruluka yi lavisa Petro hi ku kongoma, kutani Petro a dzrimuka mazritu ya Hosi loko yi mu byela yi ku: “Namunhla na nkuku wu nga si na yimba, u ta ni landzrula kazrazru.”
62 Xileswo, a huma handle a ya dzrila hi xiviti.
63 A vavanuna lava khomiki Yesu va sungula ku mu hamba xihlekiso ni ku mu ba;
64 nakone ntsrhaku ka loko va mu funeketi wuso, a va mu vutisa va ku: “Profeta ka! I mani a ku biki?”
65 Va tlhela va hlaya mintxhumu ya yinyingi ya ku mu zruka.
66 Loko byi xa, ku hlengeletana ntlawa hinkwawu wa vakulukumba va tiko, leswi liki, vaprista lavakulu ni vatsrali, kutani va buyisa Yesu ka Sanedri dzravu, va ku:
67 “Loko u li Kriste, hi byeli.” Kambe Yesu a va byela a ku: “Nambiloko ni ngo mi byela a mi nge ti kholwa nikutsrongo.
68 Handle ka leswo, loko ni ngo mi vutisa swa kukazri a mi nge ni hlamuli.
69 Nambitanu, ku sukela ka swoswi, a N’wana wa mhunu a ta tsrhama a vokweni dzra xinene dzra ntamu dzra Xikwembu Nkulukumba.”
70 Xileswo hinkwavu va ku: “Kutani ke, xana u N’wana wa Xikwembu Nkulukumba?” A va hlamula a ku: “N’wine ha wuswenu mi hlaya leswaku ni N’wana wa Xikwembu Nkulukumba.”
71 Va ku: “Ha ha byi djulela yini wumboni byin’wana? Hikusa hi swi twile ha wuswezru na a swi hlaya hi nomu wake.”
Tintlhamuxelo ta le hansi
^ Kumbe: “Handzrelo”.
^ Kumbe: “Handzrelo”.
^ Hi ku kongoma: “a nga ku deni”.
^ Kumbe: “a tizrelaka”.
^ Hi ku kongoma: “a nga ku deni?”
^ Kumbe: “mbuva”.
