Иегова Таҥара, дьиэ кэргэни олохтооччу буоларын быһыытынан, оҕону иитэр эппиэтинэһи төрөппүттэргэ сүктэрбитэ (Колоссяннарга 3:20). Оҕолоро Иеговаҕа тапталы сайыннараллара ону кытта эпиэтинэстээх дьон буолан улааталлара, төрөппүттэр эбээһинэстэригэр киирэр (2 Тимофейга 1:5; 3:15). Уолгут эбэтэр кыыскыт сүрэҕэр туох баарын өйдүү сатааҥ. Ону таһынан бэйэҕит кинилэргэ холобур буолуохтааххыт. Иегова тыла эһиги сүрэххитигэр дириҥник иҥпит буоллаҕына, оҕолоргутун үөрэтэргит судургу буолуо (Саалтыыр 39:9).

БИБЛИЯ ТУОХ ДИИРИЙ. «Хайаҕыт да истэргэ чуор, саҥарарга бытаан, уордайарга нэс буолуохтаах» (Иаков 1:19). Биллэн турар, оҕоҕут эһигини кытта аһаҕастык, куттаммакка кэпсэтэрэ улахан суолталааҕын өйдүүгүт. Оҕолоргут, эһиги кинилэри истэргэ мэлдьи бэлэм буоларгытын саарбаҕалыа суохтаахтар. Дьиэҕит эйэ дэмнээх, чуумпу буолара, оҕолоргутугар бэйэлэрэ тугу саныылларын аһаҕастык кэпсииллэригэр көмөлөһүө (Иаков 3:18). Өскөтүн оҕолоргут, сэмэлиэхтэрэ эбэтэр күүскэ такайыахтара диэн куттанар буоллахтарына, эһиэхэ аһыллартан толлуохтара. Оҕолоргутун тапталгытыгар эрэннэрэргит уонна өрүү тулуурдаах буоларгыт улахан суолталаах (Матфей 3:17; 1 Коринфяннарга 8:1).

ТУҺАЛААХ СҮБЭЛЭР

• Оҕоҕут кэпсэтиэн баҕардаҕына болҕойон истиҥ

• Оҕолоргутун кытта кыһалҕа эрэ үөскээтэҕинэ буолбакка, хаһан баҕар кэпсэтэр буолуҥ

БИБЛИЯ ТУОХ ДИИРИЙ. «Ким дьыаланы дириҥник өйдүү сатыыр, ол үтүөнү булуо» (Притчи 16:20). Ардыгар оҕо туох диэн этиэн баҕарбытын, киһи тута өйдөөбөт. Улааппыт оҕо баҕатын үксүн омуннаан атыннык этиэн сөп. «Ким ситэри истибэккэ хоруйдуур, кини өттүттэн ол өйө суох быһыы» (Притчи 18:13). Ол иһин санааҕытын түһэрэ охсумаҥ (Притчи 19:11).

ТУҺАЛААХ СҮБЭЛЭР

• Оҕолоргут тугу да эппиттэрин үрдүнэн, кыһырбаккаҕыт истиҥ

• Кинилэр саастарыгар сылдьан эһиги хайдаххытын уонна тугу улахаҥҥа уура сылдьыбыккытын умнумаҥ

БИБЛИЯ ТУОХ ДИИРИЙ. «Уолум, аҕаҥ үөрэтиитин иһит уонна ийэҥ сокуонун хаалларыма» (Притчи 1:8). Иегова оҕо иитиитин, төрөппүттэргэ иккиэннэригэр соруйбута. Оҕолору бэйэҕитин ытыктыырга, истэргэ үөрэтиҥ (Ефесяннарга 6:1—3). «Бэйэ-бэйэҕит икки ардыгар... хайдыһыы» баар буоллаҕына, оҕолоргут ону тутатына сэрэйэн билиэхтэрэ (1 Коринфяннарга 1:10). Үөскүүр хайдыһыылары оҕолоргутуттан туспа бэйэҕит быһаарсыҥ, инньэ гымматаххытына кинилэр эһигини ытыктаабат буолуохтара.

ТУҺАЛААХ СҮБЭЛЭР

• Оҕону хайдах иитэри уонна көннөрөрү эрдэттэн сүбэлэһиҥ

• Иитии боппуруостарыгар тус-туспа санаалаах буоллаххытына, кэргэниҥ көрүүтүн өйдүү сатаа

БИБЛИЯ ТУОХ ДИИРИЙ. «Уол оҕону ыйан-кэрдэн, сөптөөх суолга туруор» (Притчи 22:6). Оҕо бэйэтэ бэйэтинэн үчүгэй иитиилээх уонна үөрэхтээх буолбат. Иитии диэн такайан көннөрүү, онон быһаарыныылары толкуйдаан туран ылынаргыт улахан суолталаах (Саалтыыр 126:4; Притчи 29:17). Ол гынан баран, көннөрүү хайаан да сэмэлээһин буолбатах. Оҕоҕор быһыы-майгы быраабылаларын тоҕо толоруохтааҕын өйдүүрүгэр көмөлөс (Притчи 28:7). Ону таһынан Таҥара тылын таптыырга, онно суруллубут сүбэлэри өйдүүргэ үөрэтиҥ (Саалтыыр 1:2). Ол суобастара сөпкө иитиилээх буоларыгар көмөлөһүө (Еврейдэргэ 5:14).

ТУҺАЛААХ СҮБЭЛЭР

• Оҕолоргутугар Таҥара дьиҥнээхтии баарын, киниэхэ итэҕэйиэххэ уонна эрэниэххэ сөбүн өйдүүллэригэр көмөлөһүҥ

• Интернеккэ уонна социальнай ситимнэргэ кистэлэҥ кутталлары, угаайылары бэлиэтии көрөллөрүгэр үөрэтиҥ. Онон оҕону буорту гынар дьонтон хайдах харыстанары быһаарыҥ