Pakupita cifupi miyezi miwiri pakubuluka ku Ejito, Aisraeli afika pa Phiri ya Sinai, mbamanga misasa. Yahova acemera Mose, wakuti akwira padzulu pa phiri mbampanga: ‘Ndapulumusa Aisraeli. Iwo angandibvera mbakoya mitemo yanga, anadzakhala mbumba yanga yakupambulika.’ Mose abwerera kuna Aisraeli, mbaapanga pidalonga Yahova. Kodi iwo atawira tani? Iwo atawira: ‘Tinacita pyonsene pidalonga Yahova.’

Mose akwira pontho pa Phiri. Penepo Yahova alonga: ‘Pakupita ntsiku zitatu ndinadzalonga na imwe. Cenjeza mbumba toera ikhonde yesera kukwira Phiri ya Sinai.’ Mose abwerera kuna mbumba mbaapanga toera akhunganyike kuti abvesere pinafuna longa Yahova.

Pakupita ntsiku zitatu, Aisraeli aona kucetuma kwa njazi na khole yakupswipa paphiri. Iwo abva dzumbi peno baruya ikulu ya kudhima na ya nyanga. Buluka penepo, Yahova apangiza mbiri yace mukuphatisira moto. Aisraeli agopa kakamwe mbatetemera. Phiri yonsene ikhatekenyeka kakamwe, pontho ikhadaphimbirwa na nkhungu. Dzumbi ya nyanga ikhathimizirika. Buluka penepo, Mulungu alonga: ‘Ine ndine Yahova. Lekani kulambira alungu anango.’

Mose akwira pontho paphiri. Yahova ampasa mitemo toera mbumba idziwe kuti Anamulambira tani na asafunika kucitanji. Mose alemba mitemo ineyi, buluka penepo mbaileriri Aisraeli. Iwo apikira: ‘Ife tinacita pyonsene pidalonga Yahova.’ Inde, iwo acita pikiro kuna Yahova. Kodi iwo mbadakwanirisa pikiro ineyi?