Pakumala kusandika misambo yakuipa ya Afarisi, Yezu abuluka na anyakupfundzace. Iwo acita ulendo wa nsindzo wakulapha mbaenda kunkwiriro, cisa ca Tiro na Sidhoni ku Fenisya.

Yezu agumana nyumba toera kukhala, mbwenye iye nee akhafuna kuti anthu adziwe pakhali iye. Ngakhale tenepo anthu mbadakwanisa kudziwa pakhali iye. Nkazi m’bodzi Wacigerego wakuti abalwa mu cisa ceneci agumana Yezu mbatoma kundembetera: ‘Ndibvereni ntsisi Mbuya, Mwana wa Dhavidhi. Mwananga wankazi akuthabuka kakamwe thangwi iye ali na dimonyo.’—Mateu 15:22; Marko 7:26.

Pakupita ndzidzi ungasi, anyakupfundza aphemba Yezu: ‘Mpangeni aende pyace, thangwi iye asapitiriza kukhuwa nduli mwathu.’ Yezu aapanga kuti thangwi yanji nee akupangiza citsalakano kwa iye, mbalonga: ‘Nee ndatumwa toera kuenda kuna anthu onsene, mbwenye basi ene kuna mabira akutayika a dzindza ya Izraeli.’ Nkazi nee abwerera nduli. Iye afendedza dhuzi mbagodama kutsogolo kwa Yezu, mbadembetera: ‘Mbuya, ndiphedzeni!’—Mateu 15:23-25.

Panango toera kuyesera cikhulupiro cace, Yezu aphatisira nsangani toera kupangiza kuti Ayuda akhapwaza anthu a madzindza anango, mbalonga: ‘Si pyadidi tayu kukwata nkate wa ana, mbatiuponyera anambwa ang’ono.’ (Mateu 15:26) Yezu aphatisira fala yakuti ‘anambwa ang’ono,’ toera kupangiza kuti akhabvera ntsisi anthu akuti nee ndi Ayuda. Panango pyenepi pyaoneka pakweca m’malongero ace aufuni.

Mbuto mwakuipirwa, nkazi adzindikira kuti Yezu akhalonga pya tsankhu ya Ayuda, pontho mwakucepeseka iye alonga: ‘Inde Mbuya, mbwenye undimomwene ndi wakuti anambwa ang’ono asadya manyedzwa anagwa pantsi pa meza ya mbuya wawo.’ Yezu adzindikira n’khaliro wadidi wa ntima wace, mbalonga: ‘Nkaziwe, cikhulupiro cako ndi cikulu; mbapicitike ninga munafunira iwe.’ (Mateu 15:27, 28) Mwana ntsikana awangiswa maseze nee akhali penepo ndzidzi unoyu! Pidabwerera iye kunyumba, nkazi agumana mwanace mbakagona patalimba, pontho ‘dimonyo akhadabuluka.’—Marko 7:30.

Yezu na anyakupfundzace abuluka ku cisa ca Fenisya mbaenda ku cisa ca Nkulo wa Yordani. Iwo awambuka Yordani kumabulukiro a dzuwa a Bara ya Galileya, mbaenda ku cisa ca Dhekapoli. Kweneko, iwo akwira paphiri, mbwenye mwinji waagumana penepo. Anthu abweresa pana Yezu anyakulamala, maboliboli na mabewewe. Iwo aikha atenda anewa pa miyendo ya Yezu, natenepa iye aawangisa. Anthu adzumatirwa na pyenepi mbatoma kusimba Mulungu wa Izraeli.

Mbwenye Yezu akhadzudzumika kakamwe na mamuna m’bodzi wakuti ndi dhrodhro na bewewe. Nyerezerani kuti mamuna unoyu apibva tani pakati pa mwinji. Panango Yezu akhadziwa kuti mamuna unoyu akhagopa, tenepa iye aenda naye kutali pang’ono na mwinji. Pikhali iwo okhene, Yezu apangiza pikhafuna iye kucita kuna iye. Iye aikha pyala pyace m’makutu a mamuna unoyu, pidamala iye kuphula mata, akhuya lirimi ya mamuna. Yezu ayang’ana kudzulu, mbalonga fala Yacihebheri yakuti isabveka: “Funguka.” Pyenepi pyacitisa mamuna kutoma pontho kubva na kulonga. Yezu nee akhafuna kuti pyenepi pidziwike kwa anthu azinji, iye asafuna kuti anthu ankhulupire kubulukira ku pinaona iwo na pinabva iwo.—Marko 7:32-36.

Mphambvu ya Yezu toera kuwangisa anthu munjira ineyi, yacitisa anthu azinji kudzumatirwa kakamwe. Iwo alonga: ‘Iye asacita mwadidi pinthu pyonsene. Ngakhale madhrodhro na mabewewe, iye asaawangisa.’—Marko 7:37.