Bebe akhafuna kakamwe babace. Mafala anewa alongwa na xamwali wakuti akhali wacibale wace, mbwenye Bebe aaona ninga akuphekesa m’mbuto mwakukhala acibalangazo. Iye akhalonga mwakubwereza-bwereza mafala awa: “Kufa kwa baba nee kukhali cinthu cadidi.” Pakupita pyaka pingasi, mudalemba iye mabvero ace m’bukhu pikhapangiza kuti iye akhapitiriza kutsukwala thangwi yakulowa kwa babace.

Ninga Bebe, pisakwata ndzidzi toera munthu akunde kutsukwala thangwi yakuferwa, makamaka khala nyakuferwa akhafunana kakamwe na munthu adalowa. M’Bhibhlya, kufa kusalongwa ninga ‘nyamalwa wakumalisa.’ (1 Akorinto 15:26) Kufa kusagwandiza umaso wathu, kazinji kene kusacitika mwakukhonda dikhira, mbakutibera anyakufunika athu. Nkhabepo anakhonda khuyiwa na kufa. Natenepa, mphyacibaliro kukhonda dziwa kuti tinathimbana tani na kutsukwala thangwi ya kufa kwa nyakufunika wathu.

Panango mwabvundzika: ‘Pisakwata ndzidzi ungasi toera kumalisa kutsukwala thangwi yakuferwa? Munthu anathimbana nako tani? Ndinabalangaza tani anyakuferwa? Pana cidikhiro kwa anyakufunika athu adafa?’