Gbâ ti apendere ye ayeke dä so e peut ti sara, so anzere na e, ndali ti so e yeke na fini. Atâa e wara akpale, mingi ni ambeni ye ayeke dä so apeut ti nzere na e na yâ ti gigi ti e. Tongana nyen la e peut ti fa na Jéhovah so e kiri singila na lo ndali ti fini so ayeke mbeni cadeau? Kota raison wa la ndali ni e doit ti kiri singila na lo?

1. Ngbanga ti nyen la a yeke nzoni e kiri singila ndali ti so e yeke na fini?

A yeke nzoni e kiri singila so e yeke na fini, ndali ti so a yeke mbeni cadeau so Babâ ti e Jéhovah, so aye e, amû na e. Lo la ‘lo mû fini na aye kue’, so ti tene lo la lo créé aye kue so ayeke na fini (Psaume 36:9). “Lo wani la lo mû na azo kue fini, pupu so ala yeke wu nga na aye kue.” (Kusala 17:25, 28). Jéhovah amû na e aye so e bezoin ni ti ngbâ na fini. Lo sara nga si lege ayeke dä ti tene gigi anzere na e.—Diko Kusala 14:17.

2. Tongana nyen la e peut ti kiri singila na Jéhovah ndali ti fini so ayeke mbeni cadeau so lo mû na e?

Na ngoi so a mû ngo ti mo, Jéhovah apensé na mo. Yingo ti Nzapa apusu David, mbeni wakua ti lo, ti tene na lo: “Lê ti mo abâ mbi même na ngoi so mbi ngbâ gï mênë.” (Psaume 139:16). Jéhovah abâ fini ti mo na nene ni mingi. (Diko Matthieu 10:29-31.) Tongana mbeni zo afâ mbeni zo na mbana wala lo fâ même terê ti lo, a yeke son Jéhovah mingi (Exode 20:13). a Tongana e zia fini ti e senge senge na yâ ti kpale wala e sara ye na hange ape ti bata fini ti azo, a yeke son nga Jéhovah. Tongana e bâ lege ti e wani nzoni nga e bâ na nene ni fini ti azo, e yeke fa so e kiri singila ndali ti fini so ayeke pendere cadeau so e yeke na ni.

 GI TI HINGA AYE MINGI

3. Bâ lege ti seni ti mo

A-Chrétien amû fini ti ala kue ti sara na Jéhovah. A yeke mo bâ mo tene ala mû terê ti ala tongana sandaga na Nzapa. Diko aRomain 12:1, 2, na pekoni kiri tënë na ahunda so:

• Nyen la adoit ti pusu mo ti bâ lege ti seni ti mo?

• Ambeni ye wa la mo peut ti sara ti bâ lege ti seni ti mo?

 5. Bâ na nene ni fini ti mbeni molenge so ade a dü lo ape

David afa so Jéhovah apensé na aye kue so ayeke si na mbeni molenge so ayeke kono na yâ ti mama ti lo. Diko Psaume 139:13-17, na pekoni kiri tënë na ahunda so:

• Na lê ti Jéhovah, eskê fini ti mbeni zo akomanse na ngoi so a mû ngo ti lo wala na ngoi so a dü lo?

Andia so Jéhovah amû na azo ti Israël ti ândö abata amama nga na amolenge so ayeke na yâ ti ala. Diko Exode 21:22, 23, na pekoni kiri tënë na ahunda so:

• Tongana na mbana ape mbeni zo asara si fini ti mbeni molenge so ade a dü lo ape ahunzi, Jéhovah ayeke bâ lo tongana nyen?

• Ka tongana mbeni zo asara ni na mbana, a yeke sara lo tongana nyen? b

• Mo pensé nyen na ndö ti bango ndo ti Nzapa?

Zia VIDÉO ni.

Même mbeni wali so abâ fini na nene ni apeut ti bâ so oko ye so lo peut ti sara ayeke ti tuku ngo ni. Diko Ésaïe 41:10, na pekoni kiri tënë na ahunda so:

• Tongana a pusu mbeni wali ti tuku ngo, a yeke nzoni lo bâ ndo na mbage ti zo wa ti mû maboko na lo? Ngbanga ti nyen?

 NA NDURU TËNË

Bible afa na e ti ye fini so ayeke mbeni cadeau so Jéhovah amû na e, ti bâ ni na nene ni nga ti bata ni. Tënë ni abâ fini ti e wani nga na ti amba ti e.

Dango bê

• Ngbanga ti nyen la Jéhovah abâ fini ti zo na nene ni?

• Tongana mbeni zo afâ zo na mbana, a yeke sara Jéhovah tongana nyen?

• Ngbanga ti nyen la mo kiri singila na Jéhovah ndali ti fini so ayeke cadeau so lo mû na mo?