Na ngoi so molenge asigi pan na yâ ti mama ti lo, a yeke kota ye ti tene na yâ ti kozo ngbonga so lo sigi, a zia lo na terê ti mama ti lo. Ye so ayeke sara si molenge ni ayeke maï ande nzoni. *

Nyen la asara si amama aye ka mingi ti bâ lege ti abébé ti ala nzoni? Jeannette Crenshaw, so ayeke mbeni kota wafango mbeti, atene na yâ ti mbeni mbeti (The Journal of Perinatal Education) so ye so ayeke na gunda ni ayeke hormone so a iri ni ocytocine, so ayeke mingi na yâ ti terê ti mama ni. Lo fa so, so hormone ni ayeke mingi na yâ ti terê ti mama ni, a sara si na ngoi so mama ni ayeke ndu fini bébé ti lo ni, lo bâ lê ti lo wala lo mû me na lo, ndoye so lo yeke na ni ndali ti bébé ti lo ni akiri akono. Na oko ngoi ni, mbeni hormone ni nde ayeke nga dä so ayeke “pusu mama ni ti sara tënë na bébé ni” nga ayeke sara si lo kiri lo ye bébé ni mingi. Ngbanga ti nyen la a yeke kota ye ti gbu li ni na ndö ti ye ni so?

Jéhovah Nzapa, * so asara aye kue nga so andoye e, la asara si kpengba songo ayeke na popo ti mama na bébé ti lo. Gbia David atene so a yeke Nzapa la ‘asigi na ni na yâ ti mama ti ni’ na lo sara si ni duti nzoni na yâ ti maboko ti mama ti ni. Lo sambela lo tene: “Ngbene ye so a dü mbi, a zia mbi na tïtî mo ti bâ lege ti mbi; ngbene ye so mbi de na yâ ti mama ti mbi, mo yeke Nzapa ti mbi.”—Psaume 22:9, 10.

GBU LI NA NDÖ TI TËNË SO: Tongana Nzapa acréé mara ti ahormone tongaso, so asara si mbeni mama asara ye na nzoni bê na bébé ti lo nga lo bâ lege ti abezoin ti lo, eskê aye ti fa nga so lo yeke pensé na e oko oko kue ape? e ‘so e yeke amolenge ti lo so’.—Kusala 17:29.

Jésus so ahinga Nzapa nzoni mingi ahon tanga ti azo kue atene: “A yeke kä anzêrë use na senge lê ti pata oko, ni la ape? Me mbeni oko ti anzêrë so ayeke tï na sese pëpe sân ti tene Babâ ti ala ahinga ni. Me ti ala, a diko même kuä ti li ti ala kue awe. Tongaso, ala sara mbeto pëpe; ngere ti ala ahon ngere ti gbâ ti anzêrë.”—Matthieu 10:29-31.

Gï kete wungo ti azo la ayeke gi ti pensé ka na akete ndeke so e yeke bâ ka, nga tongana ‘mbeni oko ti ala atï na sese’ gï kete wungo ti azo la ayeke ahinga ni.’ Me Babâ ti e ti yayu ayeke bâ ala oko oko kue! Na lê ti lo valeur ti andeke, même atâa a mû ala gbani, alingbi ti  hon ti zo lâ oko ape. Ye so e lingbi ti manda ge ayeke so: A lingbi mo gi bê ti mo ape wala eskê Nzapa ayeke pensé na mo. Lo yeke pensé na mo mingi!

Mbeti ti Nzapa adë bê ti e

• “Lê ti Jéhovah ayeke na ndo kue, lo yeke bâ ye ti sioni nga na ye ti nzoni.”—APROVERBE 15:3.

• “Lê ti Jéhovah ayeke na ndö ti azo ti mbilimbili, na mê ti lo ayeke mä ala tongana ala toto ti wara mungo maboko.”—PSAUME 34:15.

• “Mbi yeke duti na ngia mingi ndali ti tâ ndoye ti mo, ngbanga ti so mo bâ pasi ti mbi; mo hinga kota vundu ti mbi.”—PSAUME 31:7.

Tongana e hinga so Nzapa ayeke pensé mingi na nzoni duti ti e nga lo yeke bâ ndo na ndö ti e na ndoye, eskê a yeke changé mbeni ye na yâ ti gigi ti e? En, a yeke changé ye na yâ ti gigi ti e tongana ti so Hannah, * so ayeke na kodro ti Angleterre, atene:

“Fani mingi mbi pensé lani so Jéhovah aye mbi ape nga so lo yeke kiri tënë na asambela ti mbi ape. Mbi tene a yeke ngbanga ti so mabe amanke mbi la. Mbi pensé lani mbi tene so lo yeke punir mbi la wala lo girisa na ndö ti mbi ndali ti so mbi yeke ye oko na lê ti lo ape. Mbi bâ lani mbi tene lo yeke pensé na mbi ape.”

Me laso Hannah ayeke na mara ti kite ni so encore ape. Nyen la asara si lo changé bango ndo ti lo? Lo tene: “Changement ni aga yeke yeke. Mbeni pendere diskur so a mû lani na ndö ti sandaga ti Jésus apika bê ti mbi mingi nga a-aidé mbi ti hinga so Nzapa andoye mbi. Mingi ni tongana mbi bâ so Jéhovah akiri tënë na asambela ti mbi, ngu lê ti mbi ayeke sigi ndali ti so mbi bâ so lo ye mbi biani. Na mbage, mandango Bible nga guengo na abungbi amû lege na mbi ti hinga aye mingi na ndö ti Jéhovah, asarango ye ti lo nga na fason so lo yeke pensé na e. Fadeso, mbi hinga polele so Jéhovah ayeke aidé e, lo ndoye e kue nga so lo ye mingi ti bâ lege ti e oko oko kue.”

Atënë so Hannah atene so adë bê ti e mingi. Me nyen la afa na mo biani so Nzapa ayeke comprendre mo nga so lo hinga akpale ti mo? Mbage so ayeke ga na peko ayeke kiri tënë na hunda so.