Mo rappelé na ngoi so mo ngbâ lani kete si mo tï? Peut-être mo wara kä na maboko ti mo wala genou ti mo amboko. Mo rappelé tongana nyen la mama ti mo adë bê ti mo? Peut-être lo sukula lê ti kä ni na pekoni lo kanga ni. Mo yeke toto lani, me atënë ti dengo bê so lo tene na mo nga so lo gbu mo na kate asara si bê ti mo adë. Na angoi ni so lani, a hunda ti gue ayo ape ti wara dengo bê.

Tongana e yeke kono, gigi ayeke kpengba na e. Akpale ti e ayeke kono nga warango mbeni zo ti dë bê ti e aga tënë. Ye ti mawa ni ayeke so, mingi ni, mara ti ye so mama ti e asara na e na kete ti e, na ngoi so e wara lani kä so, alingbi encore pëpe ti leke akpale so e wara na ngoi so e kono. Zia e bâ ambeni tapande ni.

• A si na mo awe ti tene vundu asara mo mingi ndali ti so a zi mo na kua? Julian atene so na ngoi so a zi lo lani na kua, ye ni asara si li ti lo aga kirikiri. Lo yeke hunda tere ti lo: ‘Mbi sara ande tongana nyen ti bâ lege ti azo ti sewa ti mbi? Ngbanga ti nyen la, na peko ti angu mingi so mbi sara kua ngangu so, akota zo ti place ti kua ti mbi apensé so mbi lingbi encore ape?’

• Peut-être vundu ahon ndo ti mo ndali ti so yâ ti mariage ti mo afâ. Raquel atene: “Na ngoi so, gi tongaso, koli ti mbi azia lani mbi, a sara fadeso nze 18 awe, mawa ahon ndo ti mbi mingi. A sara mbi mo bâ mo tene yâ ti bê ti mbi afâ use. Songo ti ye ni so ayeke lani na yâ ti bê ti mbi me nga na yâ ti tere ti mbi. Bê ti mbi agi mbi lani mingi.”

• Peut-être mo yeke na mbeni kota kpale ti seni so na bango ni changement ayeke dä ape. Na ambeni ngoi, mo lingbi ti duti na oko pensé ti Job so ayeke dema lani atene: ‘Ye ni ahon ndo ni awe! Mbi yeke ngbâ na fini lakue lakue pëpe.’ (Job 7:16, Mbeti ti Nzapa, Tënë so amu fini). Peut-être mo yeke na a-oko pensé ti Luis, mbeni koli so ayeke na yâ ti ngu 80, so atene: “Na ambeni ngoi mbi yeke pensé mbi tene, ti mbi, mbi ngbâ ti ku gi kuâ ti mbi awe.”

• Wala peut-être kuâ ti mbeni zo so mo ye lo mingi la asara si mo yeke gi ti wara dengo bê. Robert atene: “Na ngoi so molenge ti mbi ti koli akui na yâ ti accident ti avion, kozo mbi yeda na tënë ni ape. Na pekoni, vundu akomanse ti sara mbi, vundu so Bible ahaka ni na mbeni yongoro épée so akpo zo alï.”—Luc 2:35.

Robert, Luis, Raquel, nga na Julian awara dengo bê atâa na yâ ti aye ti ngangu so asi na ala so. Ala wara nzoni Zo so alingbi ti mû na ala dengo bê ni so. Mbeni zo nde ape, gi Nzapa so ngangu ti lo ahon angangu kue. Lo mû na ala dengo bê ni so tongana nyen? Eskê lo lingbi ti mû na mo nga dengo bê so mo yeke na bezoin ni so?