Tongana mo mä asango ti dunia so, peut-être mo bâ so ambeni zo ayeke sara asioni ye na iri ti Nzapa. Abungbi ti vorongo kue la si ayeke ti tâ Nzapa ape (Matthieu 7:15). Ti tâ tënë ni, a handa azo mingi laso.—Diko 1 Jean 5:19.

Me, Nzapa azia lê ti lo na ndo ti azo so andoye biani aye ti nzoni nga na tâ tënë (Jean 4:23). Lo yeke wa mara ti azo tongaso ti manda tâ tënë so ayeke na yâ ti Bible.—Diko 1 Timothée 2:3-5.

Laso Jéhovah Nzapa ayeke mû azo ti yâ ti abungbi ti vorongo nde nde, lo bungbi ala oko na lo yeke fa tâ tënë na ala nga lo fa na ala ti ndoye mba ti ala (Michée 4:2, 3). Ni la, mo yeke hinga atâ wavorongo Nzapa na fason so ala yeke bâ na lege ti mba.—Diko Jean 13:35.

Atâ wavorongo Nzapa amä na bê gi na ye so Bible afa nga ala yeke sara ye a gue oko na atënë ti yâ ni (2 Timothée 3:16). Ala yeke mû nga iri ti Nzapa na nene ni (Genèse 22:14). Nga ala yeke fa na azo so Royaume ti Nzapa oko la ayeke beku ti ala (Daniel 2:44). Ala yeke sara nga ye tongana ti Jésus, ala sara nzoni na azo, si “lumière ti ala aza” na lê ti azo dandara (Matthieu 5:16). Tongaso, e yeke hinga atâ Chrétien na lege so ala yeke gue ti fa nzoni tënë ti Royaume ti Nzapa so na azo na yanga-da ti ala.—Diko Matthieu 24:14; Kusala 5:42; 20:20.