Tara ti bâ anzoni ye so azo alingbi ti wara tongana mbeni gouvernement oko la akomande dunia mobimba. Laso, azo mingi ayeke bâ pasi ndali ti so ala yeke awayere, me na oko ngoi ni, ambeni ayeke ti ala na mosoro mingi. Me, mbeni gouvernement so ahinga ti bâ mawa ti azo ayeke sara kue ti mû na azo aye kue so ala yeke na bezoin ni. Mo pensé so azo ayeke zia na sese mara ti gouvernement ni so mbeni lâ?—Diko Jérémie 10:23.

Na yâ ti mbaï ti azo, agouvernement atara na alege nde nde kue gbä ti bâ lege ti azo ti gbe ti ala nzoni, mbilimbili awayere. Ambeni gouvernement ni ayeke sioni mingi (Zo-ti-fa-tene 4:1; 8:9). Me, Nzapa ti ngangu ahon kue amû zendo so lo yeke zia na sese mbeni gouvernement so ayeke mû ande place ti agouvernement kue ti azo. Gbia ti gouvernement ni so ayeke bâ ande lege ti azo kue nzoni.—Diko Ésaïe 11:4; Daniel 2:44.

Jéhovah asoro Molenge ti lo, Jésus, ti duti ande Gbia ti dunia mobimba, na Jésus alingbi biani na ni (Luc 1:31-33). Na ngoi so Jésus ayeke na ndo ti sese ge, lo ye mingi ti mû maboko na azo. So lo yeke Gbia awe, lo yeke bungbi ande azo ti amara kue oko, nga lo yeke zi pasi ti ala kue.—Diko Psaume 72:8, 12-14.

Me, eskê azo kue la ayeke yeda ande na Jésus tongana Gbia ni? Oko ape. Atâa so kue, Jéhovah angbâ ti kanga bê (2 Pierre 3:9). Lo ngbâ ti zia lege na azo ti yeda na Jésus tongana Gbia. Na yâ ti kete ngoi, Jésus ayeke futi ande azo ti sioni na lo yeke zia siriri nga na nzoni duti na ndo ti dunia mobimba.—Diko Michée 4:3, 4.