KOTA MAMA-TENE NI | TONGANA ZO AKUI NYEN LA AYEKE SI NA PEKONI?
Beku ayeke dä ndali ti azo so akui awe?
Azo so akui alingbi ti kiri ande na fini?
YE SO BIBLE AFA: “L’heure ayeke ga so azo kue so ayeke na du-kua, fade ala mä yanga ti [Jésus], na ala sigigi.”
Jésus asara tënë ti mbeni ngoi so, na gbe ti komandema ti Royaume ti lo, yâ ti dû ti kuâ ayeke duti ande senge senge. Fernando, so a sara fade tënë ti lo na yâ ti article so ahon, atene: “Na ngoi so mbi diko versê ti Jean 5:28, 29, bê ti mbi adö. Ye so amû na mbi tâ beku, nga mbi to nda ti wara nzoni bango ndo na ndo ti kekereke.”
Ândö, Job, so ayeke kota wakua ti Nzapa, ahinga so tongana lo kui Nzapa ayeke zingo ande lo. Lo hunda ndo, lo tene: “Tongana zo akui, fade lo kiri na fini mbeni?” Na pekoni, lo tene: “Na lâ ti kusala ti mbi kue, fade mbi ku [na yâ ti dû ti kuâ] juska lâ ti gbian mbi aga. Fade Mo iri ndo, na mbi kiri tënë na Mo.”
Zingongo Lazare na kuâ amû na e beku teti kekereke
Zingongo ti akuâ ayeke pëpe mbeni fini tënë na lê ti Marthe, so ayeke ita ti Lazare. Na peko ti so Lazare akui, Jésus atene na lo: “Ita ti mo ayeke zingo na kuâ.” Marthe akiri tënë, lo tene: “Mbi hinga so lo yeke zingo ande na kuâ na lango ti nda ni.” Na pekoni, Jésus atene na lo: “Mbi yeke zingongo ti akuâ nga na fini. Zo so amä na bê na mbi, atâa lo kui, lo yeke kiri na fini.” (Jean 11:23-25). Hio na pekoni, Jésus azingo Lazare na kuâ. Mbaï so afa na e gi kete yanga ti kota ye so ayeke si ande. Tara ti bâ so a sara mara ti ye ni so na yâ ti dunia kue!
A yeke zingo ande ambeni zo ni ti gue na yayu?
YE SO BIBLE AFA: Bible afa so zingongo ti Jésus na kuâ ayeke tâ nde na ti azo miombe so a sara tënë ti ala na yâ ti Mbeti ti Nzapa. Azo miombe so a zingo ala lani akiri aduti na fini na ndo ti sese ge. Me, ti Jésus ayeke nde, Bible atene: “Jésus Christ . . . [ayeke] na koti ti Nzapa, teti lo gue na yayu awe.” (1 Pierre 3:21, 22). A yeke gi Jésus lo oko la a zingo lo na kuâ ti gue na yayu? Jésus atene lani na adisciple ti lo kozoni, lo tene: “Tongana mbi gue mbi leke mbeni ndo ndali ti ala, mbi yeke kiri ti ga na mbi yeke yamba ala na ndo ti mbi, si na ndo so mbi yeke dä ala nga ala lingbi ti duti dä.”
Christ ague lani na yayu na lo leke ndo ti ku na gango ti ambeni disciple ti lo. Wungo ti ala so a yeke zingo ala na kuâ ti gue na yayu ayeke 144000 (Apocalypse 14:1, 3). Me nyen la azo ni so ayeke gue ti sara kâ?
Ala yeke ande na aye mingi ti sarango ni! Bible atene: “Ngia ayeke na zo kue so azingo na kozo zingongo ti akuâ ni, nga lo yeke nzoni-kue; kuâ ti use ni ayeke na komandema na ndo ti azo so pëpe, me fade ala yeke duti aprêtre ti Nzapa na ti Christ na fade ala yeke komande tongana agbia legeoko na Christ na yâ ti ngu saki oko ni.” (Apocalypse 20:6). Azo so a zingo ala ti gue na yayu ayeke komande tongana agbia na aprêtre legeoko na Christ na ndo ti sese.
Na peko ti ala, a yeke zingo azo wa?
YE SO BIBLE AFA: Bible afa peko ti tënë so bazengele Paul atene: “Mbi yeke na beku na mbage ti Nzapa, beku so azo so nga ayeke na ni, so a yeke zingo ande na kuâ azo ti mbilimbili na azo ti mbilimbili pëpe.”
Bible adë bê ti e so fade a yeke zingo ande azo mingi mingi so akui
“Azo ti mbilimbili” so Paul asara tënë ti ala ge so ayeke azo wa? Bâ mbeni tapande. Tongana Daniel, so ayeke kota wakua ti Nzapa ândö, aga nduru ti kui, mbeni ange ti Nzapa atene na lo, a tene: “Mo yeke wu tere ti mo, me mo yeke londo ande ti wara part ti mo na nda ti alango ni.” (Daniel 12:13, FD). A yeke zingo ande Daniel ti wara fini na ndo wa? Bible atene: “Sese ni aga ye ti héritier ti azo ti mbilimbili, na fade ala duti dä lakue.” (Psaume 37:29). Nga, Jésus atene: “Ngia ayeke na ala so ayeke sara ye na ngangu pëpe, teti fade sese ayeke ga ti ala.” (Matthieu 5:5). Daniel na ambeni koli na wali so aduti lani be-ta-zo ayeke kiri ande ti duti na fini na ndo ti sese, teti lakue lakue.
Ka “azo ti mbilimbili pëpe” ni so ayeke azo wa? A yeke azo mingi mingi so ayeke giriri na fini si akui, so mingi ti ala akui sân ti hinga tâ tënë ti Bible nga ti sara ye alingbi na ni. Na peko ti so a zingo ande ala na kuâ, ala yeke manda ti hinga Jéhovah * nga na Jésus (Jean 17:3). Azo kue so asoro ti voro Nzapa ayeke duti ande na fini kpu na kpu tongana ti Jéhovah wani so ayeke na fini lakue lakue.
Azo kue so asoro ti voro Nzapa ayeke duti ande na fini kpu na kpu, na nzoni seni nga na ngia
Dunia ayeke duti ande tongana nyen na ngoi ni kâ?
YE SO BIBLE AFA: Nzapa ayeke “mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.” (Apocalypse 21:4). “Fade azo asara da, na ala duti na yâ ni; fade ala lu vigne na yaka, na ala te lê ni.”
Tara ti bâ tere ti mo na dutingo na yâ ti mara ti pendere ndo tongaso na tere ti azo ti mo so mo ye ala mingi si a zingo ala na kuâ so! Me, hundango tënë so angbâ ayeke so: Nyen la afa biani so a yeke zingo ande azo na kuâ?
^ par. 15 Jéhovah ayeke iri ti Nzapa na yâ ti Bible.
