Sara kamarade na azo so ayeke nde na mo
Kpale ni
Tongana e yeke kpe azo so e yeke na sioni pensé na ndö ti ala kpengo, e yeke kiri ti ke ala mingi. Tongana e sara kamarade na azo so ayeke gï tongana e, e peut ti komanse ti bâ so gï apensé ti e, aye so agbu bê ti e nga na aye so e sara la ayeke na lege ni.
Mama-ndia ti Bible
“Ala maï ndoye so ayeke na bê ti ala.”—2 ACORINTHIEN 6:13.
Versê so aye ti tene nyen? Tongana e ndoye azo so ayeke gï tongana e, ndoye ti e ayeke maï ape. Ti tene ye tongaso asi na e ape, a lingbi e gi ti sara kamarade na azo so ayeke nde na e.
Ngbanga ti nyen a yeke bien ti gi ti sara kamarade na azo so ayeke nde na e?
Tongana e hinga azo nzoni, e yeke comprendre ande ngbanga ti nyen la sarango ye ti ala ayeke nde na ti e. Na tongana e ga nduru na ala, e yeke girisa même so ala yeke nde na e. E yeke bâ ala na nene ni, na e yeke zia terê ti e encore mingi na place ti ala.
Bâ ye so asi na mbeni wali so iri ti lo ayeke Nazaré. Kozo, lo yeke na sioni bango ndo na ndö ti awande. Me lo fa ye so a-aidé lo, lo tene: “Mbi passé temps na ala nga mbi na ala e sara kua place oko. Me mbi bâ so atënë kue so a tene na ndö ti ala ayeke gï mvene. Tongana mo sara kamarade na azo so ngobo ti ala ayeke nde na ti mo, mo yeke bâ ande so ala kue ayeke gï oko ape, na mo yeke ye ala na mo yeke ne ala oko oko kue.”
Ye so mo peut ti sara
Sara lisoro na azo so alondo na mbeni kodro nde, azo ti mbeni kete mara nde wala ala so yanga ti kodro ti ala ayeke nde na ti mo. Mo peut ti
-
Hunda ala ti tene na mo tënë kete na ndö ti ala.
-
Tisa ala ti tene mo na ala ate kobe place oko.
-
Duti kpô mo mä ala na temps so ala yeke fa na mo ye so asi na ala na yâ ti fini ti ala nga bâ aye wa la ayeke kota ye na lê ti ala.
Tongana mo gi ti comprendre ye so asi na ala, mo yeke hinga ngbanga ti nyen la ala ayeke na asarango ye so mo hinga ala na ni so. A yeke sara si mo ye ala nga mo yeke ye nga amba ti ala mingi.
