E toʻatele tane ma avā e faigatā ona iai ni fesootaʻiga lelei e tusa lava po o loo nonofo i se fale e tasi. Aiseā?

•  Aiseā e lē lelei ai fesootaʻiga a se ulugalii?

•  Mea e mafai ona e faia

•  Tala a isi ulugalii

•  Fesili e talanoa ai

•   Lē lavā

   “Pe a maua se taimi e ma te talanoa ai, o le taimi lenā e lē lavā ai laʻu tane pe ou te lē lavā ai foʻi. E masani lava ona ou maitaita pe a ou lē lavā. O lea, e sili atu ai le ma matamata i le TV.”—Anna.

•   Faalavelavea e masini faaonapōnei

   “E mafai ona alu uma lo tatou taimi i fesootaʻiga ma faafiafiaga i luga o le initaneti. E tele itula e mafai ona e faaaluina ai e aunoa ma lou talanoa atu ai i lau paaga faaipoipo. E sili ai le nonofo valavala.”—Katherine.

•   Eseese mea e fiafia i ai

   “Pe a manava mai laʻu tane i le galuega, e masani lava e faaalu lona taimi i mea e fiafia i ai. E tatau ona faaalu se taimi mo ia lava ona e galue mamafa. Ae maʻimau pe ana ma faaaluina faatasi le tele o le taimi mo i maʻua.”—Jane.

•   Galuega

   “O le faatekinolosi ua lē mafai ai ona iloa le taimi e tatau ona faaalu mo le galuega ma le taimi mo le aiga. E tele taimi ou te faaaogāina e tali ai imeli ma feʻau tusitusia mai le galuega, ae sa tatau ona ou faaaluina lenā taimi ma laʻu avā.”—Mark.

•   Ia vaai i le faaaluina faatasi o le taimi, o se mea e tatau ona fai ae lē o se mea e faatoʻa fai pe a leai ni mea e faia.

   Mataupu silisili o le Tusi Paia: “Ia outou faamautinoa o mea e sili ona tāua.”—Filipi 1:10.

   Mea e mafaufau i ai: Po o faaalia e au gaoioiga e te vaai i lau faaipoipoga o se mea e sili atu ona tāua, nai lo galuega ma mea e te fiafia i ai? Pe faatoʻā e faaaluina le taimi ma lau paaga faaipoipo pe a leai sau mea e fai?

   Fesoasoani: Ia fai e lē aunoa ni fuafuaga e faaalu faatasi le taimi ma lau paaga faaipoipo e aunoa ma ni mea e faalavelave mai.

   “Ou te matuā fiafia lava pe a faatulaga e laʻu tane se mea e ma te faia na o maʻua. Ou te lagonaina ai e alofa laʻu tane iā te aʻu ma e faamautinoa mai ai foʻi e fiafia e ma te faatasitasi.”—Anna.

•   Ia tuu ese masini faaonapōnei.

   Mataupu silisili o le Tusi Paia: “E iai le taimi e atofaina mo mea uma.”—Failauga 3:1.

   Mea e mafaufau i ai: O le ā le tele e faalavelavea ai lou uaʻi atoatoa atu i lau paaga ona o feʻau tusitusia?

   Fesoasoani: Taumafai e faaalu se taimi i aso taʻitasi e aai faatasi ai ma tuu ese lua telefoni i se isi mea. O le taimi e aai faatasi ai o se avanoa e sili ona lelei lenā e talanoa ai i mea na lua faia i lenā aso.

•   Pe a mafai ia ō faatasi e faatau pe fai faatasi feʻau i le fale.

   Mataupu silisili o le Tusi Paia: “E sili ona lelei o le toʻalua nai lo o le toʻatasi, auā ua iā te i laʻua le taui lelei o la laʻua galuega mamafa.”—Failauga 4:9.

   Mea e mafaufau i ai: E faafia ona alu lava le tagata ia e fai le faatau mo le aiga?

   Fesoasoani: Ia galulue faatasi ma fesoasoani le tasi i le isi, e oo lava i feʻau e mafai ona fai e se tagata e toʻatasi.

   “Nai lo le vaai i le faia o faatau, fufuluina o ipu, naunau le tagamea ma le teuina o le fanua o ni feʻau, aiseā e lē vaai i ai o se avanoa e faaalu faatasi ai le taimi?”—Nina.

•    Ia magafagafa.

   Mataupu silisili o le Tusi Paia: “Ia iloa e tagata uma lo outou magafagafa.”—Filipi 4:5.

   Mea e mafaufau i ai: E faapefea ona e faaalia le magafagafa i mea e te faatalitalia mai i lau paaga?

   Fesoasoani: Ia talanoa ma ia magafagafa i manaʻoga o le tasi. Ia ioe uma i mea e te lua maua ai le fiafia ma lagolagoina atoatoa ai e le tasi le isi.

   “E ese le aumalosi o laʻu tane, ae e itiiti loʻu malosi ona ou te maʻi. E masani lava ona ou uunaʻia laʻu tane e alu i fafo e fai mea e fiafia i ai, ae ou faatali i le fale. Ou te nofo i le fale ona e manaʻomia ona ou mālōlō, a o alu laʻu tane e faamalositino ona e na te manaʻomia. E ma te lagona uma le fiafia ona o le mafai ona ma faia o mea e ma te manaʻomia.”—Daniela.

 Muamua e mafai ona iloilo e le tagata lava ia fesili o loo mulimuli mai, ona talanoa faatasi lea o lua tali.

•    O faapeʻī le lua faiā pe a fua i taimi e te lua faaaluina faatasi?

•   O le ā se faamālō e mafai ona e avatu i lau paaga ona o le faaaluina faatasi o le taimi?

•   O ā ni faaleleiga e mafai ona oulua faia?

•   O le ā le tele e faalavelavea ai e masini faaonapōnei lou uaʻi atoatoa atu i mea o loo talanoa mai ai lau paaga?

•   E faapefea ona oulua faaalia le magafagafa i mea e faatalitalia e le tasi mai i le isi?

•   O ā suiga e mafai ona oulua faia i lenei vaiaso, ina ia faaalu faatasi ai le tele o le taimi e aunoa ma se mea e faalavelave mai?