“Ua matuā aafia tagata, aai tetele ma meafaiola i suiga ogaoga o le tau. O suiga o le tau ua faateteleina ai le malolosi o matagi, lea ua faaleagaina ai fale ma faafaigatā ai ona tausia aiga o tagata i le lalolagi aoao. Ua matuā faateteleina foʻi le māfanafana o ogāsami ma e ono iʻu atu ai i le faatamaʻia o le tele o meafaiola o loo iai.”—Inger Andersen, se tasi o failautusi o Malo Aufaatasi, ma le faatonu lagolago o le Faalapotopotoga Tau Siʻosiʻomaga a Malo Aufaatasi, Iulai 25, 2023.

 Po o le a galulue faatasi faigāmalo e foʻia faafitauli nei o le lalolagi? Pe e mafai ona latou saunia ni vaifofō tumau o nei faafitauli?

 O loo taʻua i le Tusi Paia se malo e mafai ma o le a foʻia faafitauli uma tau i le siʻosiʻomaga o le lalolagi. O loo faapea mai, ʻo le a faatūina e le Atua o le lagi le malo,’ o le a pulea ma foʻia faafitauli i le lalolagi aoao. (Tanielu 2:44) I lalo o le pulega a lenā malo, o le a lē faia ai e se tagata “se mea e lamatia ai pe faaleagaina” ai se isi tagata po o le lalolagi.—Isaia 11:9.