I le faitau selau miliona o tagata e nonofo i Amerika Latina, o le faitau miliona e tautatala i a latou lava gagana ma e iai a latou lava aganuu. O le toʻatele o i latou nei o o tatou uso ma tuafāfine faaleagaga, o ē e faatāua a latou aganuu. Ina ia fesoasoani i tagata i le itu faaleagaga, latou te faaliliuina ma tufatufa atu lomiga a Molimau a Ieova i le silia ma le 130 gagana eseese i Amerika Latina. a E ui i lea, o loo feagai pea nisi ma teteega ona o le filifili e auauna iā Ieova ma mumusu e auai i tū ma aganuu e lē faale-Tusi Paia. E faapefea i au foaʻi ona fesoasoani iā i latou?

 Na teena ma le faaaloalo e uso ma tuafāfine i Mekisikō i le nuu o Huichol i le vaega maugā o le Setete o Jalisco, le auai i faiga faalotu na latou manatu e lē faale-Tusi Paia. b Peitaʻi, na feita ai nisi o tagata i le nuu. Iā Tesema 4, 2017, na osofaʻia ai e se vaega faatupu vevesi se vaega o Molimau ma isi tagata na iai faatasi ma i latou. Na tutuliese e tagata faatupu vevesi i latou mai i le nuu, faaleagaina a latou meatotino, ma faamataʻu atu o so o se tasi lava e taumafai e toe foʻi i le nuu, o le a fasiotia.

 Na vave ona fesoasoani atu Molimau na latalata ane i manaʻoga o o tatou uso ma tuafāfine. O le ā na manaʻomia ona fai ina ia latou toe foʻi ai i o latou aiga? Na taʻua e Agustín, “e leʻi lava se matou tupe e totogi ai se matou lōia, pe iloa foʻi se isi e fesili i ai mo mataupu tau faamasinoga.”

 Talu ai ona o lea ua aafia le saʻolotoga o tatou uso ma tuafāfine e tapuaʻi ai, na gaoioi ai loa le lālā i Amerika Tutotonu. Muamua, na latou talosaga i tagata maualuluga o lenā malo ina ia iloilo le mataupu. Na sosoo ai ma lo latou mauaina o le faatagaga mai i le Komiti o le Sooupu a le Vaega Pule a Molimau a Ieova, ina ia galulue faatasi ma le Matagaluega o Tulafono a le ofisa ulu ina ia faia se tagi mo o tatou uso ma tuafāfine i Huichol. Na iʻu lava ina oo atu le mataupu i le Faamasinoga Maualuga a Mekisikō.

 Na faamatala mai e se vaega o lōia faavaomalo, e pei ona tatau i isi ona faaaloalo i aganuu a isi nuu, e tatau foʻi la i le nuu ona faaaloalo ma puipuia le saʻolotoga a o latou tagatānuu. E iai aiā tatau a tagata uma e tusa lava po o fea e nonofo ai.

 Iā Iulai 8, 2020, na malilie ai le Faamasinoga Maualuga e lagolagoina Molimau a Ieova. Na latou faatonuina le toe foʻi o i latou uma ia na tutuliese i o latou nuu. Na faailoa mai e Agustín lea na taʻua muamua faapea ma isi, lo latou lotofaafetai: “Matou te talisapaia ma le fiafia le fesoasoani a uso mo i matou. Pe ana leai lo latou fesoasoani, e leai se mea e mafai ona matou faia.”

 I le taimi e tasi, na fesagaʻia foʻi e o tatou uso i San Juan de Ilumán i Ekutoa na ituaiga teteega. I le 2014, ina ua uma ona maua se faatagaga, ona latou fausia loa lea o se Maota mo Sauniga. E ui i lea, na taʻitaʻia e se faifeʻau se vaega faatupu vevesi lea e silia ma le toʻa 100 ma taofi faamalosi le fausiaina o le Maota mo Sauniga. Na faatonuina foʻi e le nuu Molimau a Ieova ina ia taofia le toe faatasitasi mo tapuaʻiga.

 Na galulue faatasi le matagaluega o tulafono i le lālā i Ekutoa ma le ofisa ulu, e puipuia le faapotopotoga mai i le moliaga e faatatau i le saʻolotoga e tapuaʻi ai. Na avatu e o tatou uso le mataupu i le faamasinoga. O lea, na lē toe tetee ai loa le nuu i Molimau a Ieova, faataga le latou tapuaʻiga ma faaauau le fausiaina o le Maota mo Sauniga. Peitaʻi, ina ia puipuia aiā tatau a o tatou uso i le lumanaʻi, na talosaga ai e tatou uso le faamasinoga sili ina ia faia se faaiʻuga i se fesili lenei e sili ona tāua: Pe e tatau i tagata o le nuu ona faaaloalo i aiā tatau a tagata uma?

 Iā Iulai 16, 2020, na folasia ai i le Faamasinoga Pito i Maualuga a Ekutoa le mataupu. O uso lōia i Ekutoa na fai ma sui o le faapotopotoga. E faaopoopo atu i lenā, e toʻafā o tatou uso lōia faavaomalo na tutū mo le faapotopotoga i le faamasinoga. Na latou fesootaʻi mai i o latou lava atunuu e ala i le initaneti ona o faasāsāaga o le KOVITI-19. O le taimi muamua lea ua faataga ai e se faamasinoga se vaega faaletulafono lea na fai ma sui o Molimau a Ieova, e tuuina atu la latou tagi i lenei auala. c Na taʻua e lenā vaega se tulafono faavaomalo lea na faamaonia ai, e lē tatau ona faalēaogāina aiā tatau a tagatānuu ona e faapea o i latou o tagata o le nuu.

 Na faatalitali ma le naunau o tatou uso i Otalo Valley i le faaiʻuga a le Faamasinoga Pito i Maualuga. I le taimi e tasi, na latou matuā lotofaafetai i le fesoasoani na latou maua. Ua faapea mai César o se toeaina i le faapotopotoga i Ilumán Quichua: “Ua na o Ieova e na te faia le tele o mea mo ni nai tagata e ala mai i lana faalapotopotoga.”

 O lōia o loo aofia i le iloiloga o le faamasinoga o ni Molimau a Ieova, ma e latou te fiafia e faasoa mai o latou tomai faaletulafono e aunoa ma se totogi. Peitaʻi, o le saunia o nei mataupu ma tuuina atu i le faamasinoga e alu ai le tele o le taimi ma tupe. Na faaalu e o tatou lōia ma isi uso le silia i le 380 itula e sauniuni ai a latou folasaga faaletulafono, ae o le isi 240 itula na faaalu e faaliliu ai na faamatalaga i le faa-Mekisikō. E toetoe 40 lōia Molimau a Ieova mai vaipanoa eseese o le lalolagi, na faaalu le faitau selau o itula i le mataupu faafaamasinoga i Ekutoa. E faapefea ona faatupe nei mataupu faafaamasinoga mo tatou uso? E ala iā outou foaʻi o loo faia i auala eseese lea o loo faamatala i le donate.dan124.com. Faafetai tele mo le tou limafoaʻi.