LE MANATU O LE TUSI PAIA
Faapa‘ū Tama
I tausaga taʻitasi, e silia i le 50 miliona pepe e leʻi fananau mai e faapaʻū ma le loto i ai, o se fuainumera e sili atu nai lo o le faitau aofaʻi o tagata i le tele o atunuu.
Pe e filifili e le tagata lava ia pe e fua i taʻiala a le Atua?
TALA A TAGATA
E eseese māfuaaga e faia ai e fafine le faapaʻū tama, e aofia ai le lē lava o le faasoa, faafitauli i le mafutaga, o le saʻolotoga ina ia faaauau pea aʻoaʻoga po o se galuega, po o le lē fia avea foʻi ma tinā nofo toʻatasi. Peitaʻi e manatu nisi i le faapaʻū tama o se amioga lē tatau, ona e aveesea ai le faatuatuaga ua tuuina atu i le tinā maʻitaga.
MANATU O LE TUSI PAIA
I le silafaga a le Atua, e paia le ola aemaise le ola o le tagata. (Kenese 9:6; Salamo 36:9) E faatatau atu lenei mataupu silisili i se pepe o loo afuafua i le manava o le tinā, o se nofoaga saogalemu ua saunia e le Atua mo le pepe. Na taʻua e se tusitala o le Tusi Paia: “Na e ufiufi foʻi iā te aʻu i le manava o loʻu tinā.” Na ia faapea atili mai: “Na silasila mai lava ou fofoga ina o afuafua aʻu, na tusia foʻi i lau tusi ona vaega uma, e faatatau i aso na faia ai.”
Na atagia mai foʻi le silafaga a le Atua i le ola o se pepe e leʻi fanau mai, i lana Tulafono i le nuu o Isaraelu, faapea le lotofuatiaifo ua ia tuuina mai iā i tatou. Na taʻua i lenā Tulafono, pe afai e lavea se tinā maʻitaga i se tagata ma oti ai lana pepe e leʻi fanau mai, e faasalaina i le oti lenā tagata ina ia sui ai le ola ua maumau ona o ia. (Esoto 21:22, 23) Peitaʻi, e iloilo e faamasino le uunaʻiga ma vala na aofia ai.
Ua iai i tagata se lotofuatiaifo. Pe a faalogo se tinā i lona lotofuatiaifo, e ala i le faatāua o le ola o lana pepe e leʻi fanau mai, o le a tauia o ia e lona lotofuatiaifo. * Pe afai e na te lē amanaʻia lona lotofuatiaifo, o le a ōia pe taʻusala o ia e lona lotofuatiaifo. (Roma 2:14, 15) O le mea moni, ua faaalia i suʻesuʻega, o tinā e faia le faapaʻū tama e mafai ona telē le avanoa e aafia ai i le popole ma le lotomafatia.
Ae faapefea pe afai e lagona le popole i le tausia aʻe o se tamaitiiti, aemaise pe afai e leʻi fuafuaina le maʻitaga? Mātau le folafolaga faamāfanafanaloto a le Atua iā i latou e tausia ma le faamaoni ana taʻiala: “E te faamaoni i le tagata faamaoni; e lē ponā au feutagaʻiga ma le tagata e lē ponā.” (Salamo 18:25) Ua taʻua foʻi i le Tusi Paia: “E fiafia Ieova i le faamasinogatonu, e na te lē tuua foʻi o ē e faamaoni iā te ia.”
“Ua molimau o latou lotofuatiaifo iā i latou, ma faasalaina pe taʻutonuina i latou i o latou lava manatu.”
—Roma 2:15.
Ae faapefea pe afai na e faia le faapaʻū tama?
TALA A TAGATA
Na faapea mai Ruta o se tinā nofo toʻatasi: “Na iai laʻu fanau lāiti e toʻatolu ma na ou manatu e lē gafatia ona ou toe tausia se isi tamaitiiti. Ae ina ua uma ona faapaʻū laʻu pepe, na ou lagona ai ua ou faia se mea e sili ona leaga.” * Ae pe na ia faia se mea e lē mafai e le Atua ona faamagalo?
MANATU O LE TUSI PAIA
Na faailoa mai e Iesu Keriso le manatu o le Atua ina ua ia fetalai: “Auā ua ou sau e valaau i ē agasala ina ia salamō, ae lē o ē amiotonu.” (Luka 5:32) Pe a tatou salamō moni ona o se mea sesē na tatou faia, ma talosaga atu i le Atua mo le faamagaloga, e finagalo malie o ia e faia faapea e oo lava i agasala matuiā. (Isaia 1:18) Ua taʻua i le Salamo 51:17: “Le Atua e, e te lē inosia le loto momomo ma le nutimomoia.”
Pe a talosaga atu ma le lotomaulalo i le Atua le tagata ua salamō, e foaʻi mai e le Atua iā te ia se lotofuatiaifo mamā ma le filemu o le mafaufau. Ua faapea mai le Filipi 4:6, 7: “Ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai.” * Ina ua māeʻa ona suʻesuʻeina e Ruta le Tusi Paia ma sasaa atu ona faalogona i le Atua, na ia maua ai le filemu o le mafaufau. Na ia aʻoaʻoina ʻe faamagaloina e le Atua agasala.’
“E leʻi faia e [le Atua] iā i tatou e tusa ma a tatou agasala; e leʻi taui mai foʻi e ia iā i tatou e tusa ma a tatou mea sesē.”
—Salamo 103:10.
^ pala. 8 E lē avea se faalētonu e ono tulaʻi mai i le soifua mālōlōina o le tinā po o le pepe, ma māfuaaga e fai ai le faapaʻū tama. Pe afai e iai se faalētonu i le taimi e fanau mai ai le pepe, e tatau i le ulugalii ona filifili pe e faasao le ola o le tinā po o le pepe. I atunuu e lelei tamaoaiga, ua seāseā tupu ai lenā tulaga ona o le alualu i luma o le poto faafomaʻi.
^ pala. 12 Ua suia le igoa.
^ pala. 14 E mafai foʻi ona maua e le tagata le filemu o le mafaufau mai i le faamoemoe o le toetū. Tagaʻi i le “Fesili Mai le ʻAufaitau” i Le Olomatamata o Aperila 15, 2009, lea e talanoaina ai mataupu silisili o le Tusi Paia e faatatau i le avanoa e mafai ona toe faatūina mai ai se pepe na oti ae e leʻi fanau mai.
E te Ono Fiafia Foʻi
TALIINA O FESILI FAALE-TUSI PAIA
O le ā le Manatu o le Tusi Paia e Faatatau i le Faapaʻū Tama?
O le ā le taimi e amata ai le ola o se tagata? Pe e faamagaloina e le Atua se tasi na te faia le faapau tama?
