E iai sau uō o le isi itupā e malamalama lelei iā te oe, ma e lua te talanoa i so o se mea. Atonu e te manatu iā te ia ua na o se uō. Peitaʻi, e lē o le manatu lenā o lou toʻalua pe a ia iloa lua talanoaga uumi e masani ona fai.

Ua fai si māfana tele o le lua faigāuō, ma ua tatau nei loa ona tuu. Muamua, seʻi iloilo pe na faapefea ona e oo i lenā tulaga.

Faamalieina. O le mea moni, o le uaʻi mai o le isi itupā e mafai ona lelei ai ou faalogona. E te lagona le mimita i le iloaina o loo faatāuaina ma amanaʻia oe. Ae pe a mavae sina taimi talu ona uma le lua faaipoipoga, o le a amata ona e saʻili atu i se tasi o le isi itupā ina ia faamalieina ai na manaʻoga. Ae ia manatua, o le faia faapea e tele ni iʻuga leaga e oo i ai. Pe afai e te atiaʻe se faiā e lē talafeagai ma se tasi o le isi itupā, o lona uiga ua e faavaivaia le lua faiā ma lou toʻalua. O lea, ua e lē taulau i le faaali atu o le alofa lea e tatau ona avatu i lau paaga.

• Fesili ifo, ʻO ā ni vala o loo oʻu maua ai le fiafia ma le faamalieina i lenei faigāuō, lea e tatau ona ou maua mai i laʻu faaipoipoga?’

Lē mautonu. O loo taʻua i le Tusi Paia, o i latou ua faaipoipo “o le a oo iai puapuaga.” (1 Korinito 7:28) O se faataʻitaʻiga, e iai taimi e te lagona ai ua tuulafoaʻia pe lē talisapaia oe e lau paaga, po o lou teuloto foʻi o le ita mai i se mataupu ua lē mafai ona foʻia. Atonu ua taumafai foʻi lou toʻalua e ʻalofia le toe talanoa atu iā te oe e faatatau i se mataupu, ma e te lagona ai le ita ma faigofie ai ona tosina atu lou loto i se tasi o le isi itupā. Ua faapea mai nisi tagata atamamai, o le ʻalofia o le talanoaina o mataupu tāua, o le faailoga lenā o le leai o se fiafia i le faaipoipoga, ma e ono iʻu atu ai i le teteʻa.

• Fesili ifo, ʻPo o iai se mea o faalētonu i laʻu faaipoipoga ua faigofie ai ona ou atiaʻe lenei faauōga lē talafeagai?’

Iloa lamatiaga. Ua faapea mai le Tusi Paia: “Pe e mafai ea e se tagata ona tuu le afi i lona fatafata ae e lē mū ai ona ofu?” (Faataoto 6:27) O le mea moni, o le atiaʻe o se faiā māfana ma se tasi o le isi itupā ae ua uma ona e faaipoipo, e mataʻutia iʻuga e oo i ai. (Iakopo 1:14, 15) O lea, aua le faatalitali i se mea e ono tupu. Peitaʻi, ia iloilo iʻuga o ni mea na tutupu i le taimi ua mavae. O lou tosina atu i se tasi o le isi itupā, ua e lē taulau ai i le faaali atu o le alofa lea e tatau ona avatu i lau paaga.

Tuu ou moomooga faivavale. O le māfana tele o se faauōga, e te ono taumānatu ifo ai, pe e faapeʻī lau faaipoipoga pe ana faapea e te lua nonofo ma lea tagata. O le faia faapea, ua e faatusatusaina ai uiga lelei o lau uō i vaivaiga o lou toʻalua. Ae ia manatua, o le fiafia o loo e maua mai i lau uō, atonu o ou faalogona foʻi na sa iai mo lou toʻalua.​—Taʻiala faale-Tusi Paia: Ieremia 17:9.

Faataatia ni tapulaa. E tuu e tagata ni faailoilo i o latou fale po o taavale, ina ia ʻalofia ai le gaoia o a latou meatotino. O le tulaga foʻi lenā e tatau ona faia i lau faaipoipoga. Ua faapea mai le Tusi Paia: “Ia leoleoina lou loto.” (Faataoto 4:23) E faapefea ona e faia lenā mea? Faataʻitaʻi mea o loo mulimuli mai:

• Faailoa atu ua uma ona e faaipoipo e ala i le tuu o se ata o lau paaga i lau kesi i le falefaigaluega.​—Taʻiala faale-Tusi Paia: Kenese 2:24.

• Filifili mea e tatau ona fai ma mea e lē tatau ona fai pe a feutagaʻi ma le isi itupā. O se faataʻitaʻiga, ʻalofia le talanoa atu iā te ia e faatatau i faafitauli o lau faaipoipoga, po o le ō faatasi foʻi ma ia pe a manava ina ia inu sina fagu.

• Pe afai ua māfana tele le lua faauōga ma se tasi o le isi itupā, ia faamuta nei loa! Pe afai e faigatā tele ona fai, fesili ifo pe aiseā. Nai lo o lou taumafai e puipuia le tagata lea e te faauō i ai, ia lagolagoina lou toʻalua ma fai taumafaiga uma ina ia puipuia ai le lua faaipoipoga.​—Taʻiala faale-Tusi Paia: Faataoto 5:18, 19.