I TAUSAGA taʻitasi, e silia i le ono miliona tagata e ō atu i se nofoaga maotua o loo iai se togāpaina telē, i le penisula o Shima i Iapani. E latou te ō atu i le Nofoaga Paia Tele o Ise o loo iai le atua fafine o le lā a le lotu Shinto, o Amaterasu Omikami, lea ua pe ā ma le 2,000 tausaga o tapuaʻi i ai tagata. E muamua faamamā e tagata tapuaʻi i latou e ala i le fufulu o o latou gutu ma lima. Pe a uma, ona tūtū lea i luma o le fale telē e faia ai le tapuaʻiga ma mulimuli i se faiga masani o le ifo, patipati, ma tatalo atu i le atua fafine. * E faataga e le lotu Shinto o latou tagata lotu e talitonu i isi faatuatuaga. E lē afāina foʻi i nisi tagata lotu Puta, ma i latou ua faapea mai o Kerisiano ma isi, le faia o faiga masani faaletapuaʻiga a le lotu Shinto ia e faia i lenei nofoaga paia.

O le tele o lotu autū i le lalolagi e iai a latou nofoaga paia mo tapuaʻiga, * ma e faitau miliona tagata e asiasi i na nofoaga. I atunuu ua faapea mai o Kerisiano, e anoanoaʻi falesā ma nofoaga paia ua faaigoa iā Iesu, Maria, ma sagato. O isi falesā ma nofoaga paia ua fausia i nofoaga ua faapea mai na tutupu ai mea o loo taʻua i le Tusi Paia, po o ni vaaiga na tutupu talu ai nei, po o nofoaga o loo tuu ai faatusa mo tapuaʻiga. E toʻatele tagata e ō i nofoaga paia ona e manatu o le a sili atu ona faafofogaina ai a latou tatalo pe a ofo atu i se nofoaga paia. Ae o isi, o le oo i se nofoaga paia, o le taunuuga lea o se malaga umi na latou faia ina ia faaalia ai lo latou tuutoina atu faaletapuaʻiga.

Pe e sili atu ona faafofogaina ma talia mai tatalo ma ōlega, pe afai e ofo atu i se nofoaga paia? Pe e fiafia le finagalo o le Atua i taumafaiga maelega a ē e malaga atu i nei nofoaga paia? A o le fesili tāua, pe e tatau i Kerisiano ona tapuaʻi atu i nofoaga paia? O tali i nei fesili, e lē gata o le a taʻu mai ai le auala e tatau ona tatou vāai ai i tapuaʻiga e faia i nofoaga paia, ae e tatou te iloa ai foʻi le ituaiga tapuaʻiga e talia moni lava e le Atua.

I le talanoaga a Iesu ma se fafine Samaria, ua faailoa mai ai le silafaga a le Atua i tapuaʻiga e faia i nofoaga paia. Sa malaga atu Iesu i Samaria ma mālōlō i se vaipuna e latalata i le aai o Sukara. Sa ia amataina se talanoaga ma se fafine Samaria na alu ane e asu vai. A o la talanoa, na taʻua e le fafine le matuā eseese o tapuaʻiga a tagata Iutaia ma tagata Samaria. Ua faapea mai le fafine: “Na tapuaʻi o matou tamā i lenei mauga; a ua outou faapea  mai, o Ierusalema e tatau ona tapuaʻi ai tagata.”—Ioane 4:5-9, 20.

O le mauga lea sa taʻua e le fafine, o le Mauga o Keresema, lea sa tū i le pe tusa ma le 30 maila (50 km) i le itu i mātū o Ierusalema. O i inā sa iai se malumalu a tagata Samaria na latou faamanatu ai tausamiga e pei o le Paseka. Peitaʻi e leʻi taulaʻi atu Iesu i lenā eseesega, ae na faapea atu o ia i le fafine: “Le mafine e, inā talitonu mai ia iā te aʻu, e oo mai le aso e tou te lē toe tapuaʻi ai i le Tamā i lenei mauga, po o i Ierusalema.” (Ioane 4:21) E mataʻina lenei faamatalaga aemaise lava na faia e se tagata Iutaia! Aiseā o le a lē toe tapuaʻi atu ai tagata i le malumalu o le Atua i Ierusalema?

Na faapea atili atu Iesu: “E oo mai le aso ma ua oo foʻi nei i ai, o ē o loo i le tapuaʻiga moni, latou te tapuaʻi i le Tamā i le agaga ma le upu moni, auā o loo saʻilia e le Tamā tagata faapena e tapuaʻi atu iā te ia.” (Ioane 4:23) E tele senituri o manatu tagata Iutaia i le malumalu matagofie na i Ierusalema o le taulaʻiga lea o la latou tapuaʻiga. E faatolu i le tausaga ona latou faimalaga atu i inā ina ia ofo atu taulaga i lo latou Atua o Ieova. (Esoto 23:14-17) Peitaʻi na fetalai Iesu o le a suia nei mea uma, ma “o ē o loo i le tapuaʻiga moni” o le a tapuaʻi atu “i le agaga ma le upu moni.”

O le malumalu o tagata Iutaia o se malumalu faaletino sa tū i se nofoaga patino. Ae o le agaga ma le upu moni, e lē faaletino pe patino atu i se nofoaga. O lea, na taʻua e Iesu o le tapuaʻiga a Kerisiano moni, e lē faaautū atu pe faalagolago i se malumalu faaletino po o se nofoaga patino, e pei o le Mauga o Keresema, le malumalu i Ierusalema, po o se isi lava nofoaga paia.

I le talanoaga a Iesu ma le fafine Samaria, na taʻua ai foʻi e Iesu le “oo mai” o le “aso” mo lenei suiga i le tapuaʻiga i le Atua. O afea e tupu ai lenā mea? Na oo mai lenā aso ina ua maliu faataulaga Iesu, ma faaiʻuina ai faiga faaletapuaʻiga a tagata Iutaia lea sa faavae i le Tulafono a Mose. (Roma 10:4) Peitaʻi na fetalai foʻi Iesu, “o le aso . . . ua oo foʻi nei i ai.” Aiseā? Talu ai i le avea o ia ma Mesia, ua ia aoaoina soo o le a usitaʻia lana faatonuga lenei: “O le Atua o le Agaga, ma o i latou o ē e tapuaʻi atu iā te ia, e tatau ona tapuaʻi i le agaga ma le upu moni.” (Ioane 4:24) O le ā la e uiga i ai le tapuaʻi atu i le agaga ma le upu moni?

Ina ua taʻua e Iesu le tapuaʻi atu i le agaga, sa uiga atu o ia i le taʻitaʻia e le agaga paia o le Atua, lea e fesoasoani iā i tatou ina ia malamalama i le Tusi Paia ma isi mea. (1 Korinito 2:9-12) O le upu moni lea sa faasino atu i ai Iesu, o le poto saʻo e faatatau i aʻoaʻoga a le Tusi Paia. O lea, nai lo o le tapuaʻi atu i se nofoaga faapitoa, o le a talia e le Atua la tatou tapuaʻiga pe afai e ōgatusa ma aʻoaʻoga a le Tusi Paia, ma taʻitaʻia i le agaga paia.

O le ā le vaaiga e tatau ona iai i Kerisiano i malaga ma tapuaʻiga e faia i nofoaga paia? I le faatonuga a Iesu e faapea o tagata i le tapuaʻiga moni e tapuaʻi i le Atua i le agaga ma le upu moni, ua manino mai ai o tapuaʻiga e faia atu i so o se nofoaga paia, e leai sona tāua faapitoa i lo tatou Tamā i le lagi. E lē gata i lea, ua taʻu mai foʻi i le Tusi Paia le silafaga a le Atua i le faaaogāina o tupua i tapuaʻiga. Ua taʻua i le Tusi Paia: “Ia sosola ese mai i le ifo i tupua” ma “ia leoleo outou mai i tupua.” (1 Korinito 10:14; 1 Ioane 5:21) O lea, e lē tapuaʻi atu se Kerisiano moni i so o se nofoaga e manatu i ai e paia, po o se nofoaga o loo faia ai faiga ifo i tupua. E teena e Kerisiano moni le tapuaʻi atu i nofoaga paia, pe a fua i le fuafuaga autū o nei nofoaga.

Peitaʻi, e lē faapea ai ua faasā e le Tusi Paia le iai o se nofoaga patino e tatalo, suʻesuʻe ma manatunatu loloto ai. E aogā le iai o se nofoaga mo sauniga e maopoopo ma i se tulaga mamalu, ina ia aʻoaʻoina ma talanoaina ai mea faaleagaga. E lē sesē foʻi le faia o se mea faamanatu e pei o se maa faamanatu mo se tagata ua maliu. O lenei maa atonu o se auala e manatua pe faaalia ai le alolofa i lē ua maliu. Peitaʻi afai e manatu i nei nofoaga o ni nofoaga paia po o ni nofoaga e tuu ai ni tupua po o ni faatusa, o le a matuā feteenaʻi la ma fetalaiga a Iesu.

O lea la, e lē manaʻomia ona e alu i se nofoaga paia e te tatalo ai, ma le faamoemoe o le a sili atu ai ona faafofoga mai le Atua i au tatalo. E lē fiafia foʻi le finagalo o le Atua pe aumaia ni faamanuiaga faapitoa iā te oe, ona o le faimalaga atu i se nofoaga paia. Ua taʻua i le Tusi Paia o Ieova le Atua, “o le Alii o le lagi ma le lalolagi, e lē afio o ia i malumalu e faia e lima.” Peitaʻi, e lē faapea ai ua mamao le Atua mai iā i tatou. E mafai ona tatou tatalo atu iā te ia i so o se nofoaga ma e faafofoga mai, auā “e lē o mamao o ia mai iā i tatou taʻitoʻatasi.”—Galuega 17:24-27.