Po o le Avea ma Tagata Lelei, e Mautinoa E te Maua ai se Lumanaʻi Saogalemu?
Mo le faitau selau o tausaga, e toʻatele e manatu o le avea ma tagata lelei o le auala lea e maua ai se lumanaʻi saogalemu. O se faaaʻoaʻoga, e ioe tagata i Sasaʻe Tutotonu i le faamatalaga a Confucius (551-479 T.L.M.), o se faifilosofia taʻutaʻua e faapea: “O mea e te lē manaʻo e faia e isi iā te oe, aua e te faia i isi.”
O SE ALA UA UIA E LE TOʻATELE
O loo talitonu pea le toʻatele pe a latou amiolelei, o le a latou maua la se lumanaʻi saogalemu. E latou te taumafai e faaalia le faaaloalo, le āva fatafata, amanaʻia a latou matafaioi i le olaga, ma tausisia ni lotofuatiaifo lelei. Ua faapea mai Linh o se fafine i Vietiname, “Na ou talitonu pe a ou faaalia le faamaoni, o le a faamanuiaina aʻu.”
O nisi ua uunaʻia e o latou talitonuga faalotu ina ia faia mea lelei. Ua faapea mai Hsu-Yun o se tamāloa e nofo i Taiwan e faapea, “Na aʻoaʻoina aʻu pe a faia e se tasi mea lelei o le a ia maua le fiafia pe a mavae le oti, ae pe a ia faia mea leaga o le a mafatia o ia.”
O Ā IʻUGA?
O le mea moni, e tatou te maua le tele o aogā pe a tatou faia mea lelei i isi. Peitaʻi, o le toʻatele o loo taumafai e faia mea lelei i isi, ua latou iloa e lē o taimi uma e iʻu atu ai i mea na latou faatalitalia. Ua faapea mai Shiu Ping o se fafine e nofo i Hong Kong, “Na ou iloa mai i mea na tutupu iā te aʻu, e lē o taimi uma e faamanuiaina ai i latou e faia mea lelei. Na ou faia le mea sili e tausia ai loʻu aiga ma faia mea lelei. Ae na malepe laʻu faaipoipoga, ma na tuua e laʻu tane i maʻua ma laʻu tama tama.”
Ua iloa e le toʻatele, e lē o tagata lolotu uma e lelei. Ua faapea mai Etsuko, o se fafine e nofo i Iapani, “Na ou auai i se lotu ma na amata ona ou faamaopoopoina mea e fai e le ʻau talavou. Na faateʻia aʻu ina ua ou iloa, o nisi o tagata o le lotu o loo faia amioga lē mamā, faatautavā ina ia maua le pule, ma faaaogāsesē tupe a le lotu.”
“Na ou faia le mea sili e tausia ai loʻu aiga ma faia mea lelei. Ae na malepe laʻu faaipoipoga, ma na tuua e laʻu tane i maʻua ma laʻu tama tama.”—SHIU PING, HONG KONG
Ua faanoanoa nisi tagata mapolotu ona ua lē tauia a latou gaoioiga lelei. E faapena faalogona na oo iā Van o se fafine mai i Vietiname. Na ia faapea mai, “O aso uma ou te faatauina ai fualaau ʻaina, fugālaau, ma meaʻai, ma ofo atu i oʻu tuaa ua maliliu ma le faamoemoe o le a ou mauaina faamanuiaga i le lumanaʻi. E ui i gaoioiga lelei uma ma tū faalelotu na ou faia mo le tele o tausaga, ae na aafia lava laʻu tane i se maʻi tugā. Na oti foʻi laʻu tama teine e 20 tausaga a o aʻoga i se isi atunuu.”
Pe afai e lē lava le tau ina avea ma tagata lelei e faamautinoa ai se lumanaʻi saogalemu, e faapefea la ona maua? Ina ia tali lenei fesili, e tatou te manaʻomia se taʻiala maufaatuatuaina, o se puna o faamatalaga e mafai ona taliina a tatou fesili ma taʻitaʻia i tatou i se lumanaʻi saogalemu. O fea e tatou te mauaina ai lenā taʻiala?
E te Ono Fiafia Foʻi
ALA MAI!
Le Tāua o Tapulaa Tau Amio
O le aʻoaʻoina o lau fanau i tapulaa tau amio o le faavae mautū lenā mo i latou i le lumanaʻi.
LE OLOMATAMATA
E Tutupu Mea Leaga i Tagata Lelei—Aiseā?
O loo faamatilatila mai e le Tusi Paia māfuaaga autū e tolu o loo māfua ai mafatiaga o tagata.
