I LALO o le tulafono, na talia e Ieova le ofoina atu o taulaga i manutagi ma lupe. E masani ona taʻua faatasi nei manulele i tulafono e faatatau i le ofoina atu o taulaga, ma e mafai ona ofo atu le isi manu pe a lē maua le isi manu. (Levi. 1:14; 12:8; 14:30) Aiseā na aogā ai le faia faapea? O se tasi o māfuaaga, ona e lē o taimi uma e maua ai manutagi. Aiseā?

O manutagi o ni manu e femalagaaʻi solo, ma e nonofo solo i Isaraelu i masina māfanafana o le tausaga. Ae i le masina o Oketopa e latou te faimalaga atu ai i le itu i saute i atunuu māfanafana, ma e toe foʻi atu i Isaraelu i le tau e totogo ai mea. (Pese 2:11, 12; Iere. 8:7) O lona uiga la e faigatā i se tagata Isaraelu anamua, ona ofoina atu ni manutagi mo ana taulaga i le taimi o le taumālūlū.

Ae e lē masani ona femalagaaʻi lupe, o lea la e mafai ona maua i Isaraelu i le tausaga atoa. E mafai foʻi ona faafagafao lupe. (Faatusatusa i le Ioane 2:14, 16.) E tusa ai ma le tusi Bible Plants and Animals, “o nuu uma ma taulaga i Palesitina e iai a latou lupe faafagafao. O aiga uma, e iai pu i o latou fale lea e mafai ona nonofo ai lupe.”​—Faatusatusa i le Isaia 60:8.

O lea la o le talia o manulele e mafai ona maua i le tausaga atoa i Isaraelu e fai ai taulaga, ua faailoa mai ai le alofa ma le fetuutuunaʻi o Ieova.