O se tasi o tiute tauave mai i le tele o tiute e faia e tagata e lē o ni ositaulaga mai i le ituaiga o Levi, o le avea lea ma leoleo. O lenei galuega sa faatonutonu e le taʻitaʻiʻau o le malumalu. Na faamatala e se tusitala Iutaia o Philo tiute a nei leoleo e faapea “O nisi o nei tagata [sā Levī] e leoleoina faitotoʻa o le pa e ulu atu ai i totonu o le lotoā o le malumalu, o nisi e i totonu [i le vaega o loo i ai le malumalu] i luma o le faleʻie paia e leoleo so o se tasi e lē faatagaina ona ulu atu i lenei vaega, e tusa pe na ia fuafua e alu atu i inā pe e na te leʻi fuafuaina foʻi. O nisi e feoaʻi faataamilo i le malumalu, ma e auauaʻi i a latou tiute i le ao ma le pō.”

E mafai e le Faamasinoga Sili ona talosagaina le fesoasoani a nei leoleo. E na o le pau lea o le vaega o tagata Iutaia e faataga e le malo o Roma ona tauaveina auupega.

Na faamatala mai e se faitofā o Joachim Jeremias, ina ua puʻeina e leoleo Iesu, na ia fesili atu i ai pe aiseā na latou leʻi puʻeina ai o ia a o aʻoaʻo atu i le malumalu mai i lea aso i lea aso. E lē mafai ona fesili atu Iesu i lenā fesili pe ana faapea e lē o leoleo o le malumalu ia na auina atu e puʻe o ia. (Mata. 26:55) Na talitonu foʻi lenei lava tusitala o i latou na auina atu e puʻe Iesu i se taimi na muamua atu, o leoleo o le malumalu. (Ioa. 7:32, 45, 46) Mulimuli ane na auina atu nei leoleo ma lo latou taʻitaʻiʻau e aumai soo o Iesu i luma o le Faamasinoga Sili, ma e foliga mai o i latou foʻi ia na tosoina mai Paulo i fafo o le malumalu.​—Galu. 4:1-3; 5:17-27; 21:27-30.