NA OU lē toe tupu ina ua iva tausaga loʻu matua. O le mea lenā na tupu i le 34 tausaga ua mavae i Côte d’Ivoire, ma e oo mai lava i aso nei e na o le tolu futu (1 m) loʻu umī. Ina ua iloa e lo matou aiga loʻu tulaga, na faalaeiauina aʻu e oʻu matua ia ou galue mamafa ina ia aua neʻi oʻu mafaufau ai i loʻu tulaga. Na ou faatūina se fata e faatau ai fualaau ʻaina i luma o lo matou fale ma faamamā i taimi uma. Na tosina mai i ai le toʻatele o tagata faatau.

E leʻi mafai ona suia mea uma ona o loʻu galue mamafa. O loo oʻu puupuu lava, ma tauivi pea e oo lava i feʻau faigofie, e pei o le aapa i luga o fata o faleoloa. E foliga mai o mea uma na faia mo tagata e uumi atu nai lo o aʻu, ma na ou matuā faanoanoa ai lava. Peitaʻi, na suia lenā mea ina ua 14 oʻu tausaga.

I se tasi aso, na ō mai ai ni fafine Molimau a Ieova se toʻalua ma faatau a la fualaau ʻaina, ma amata ai loa la matou suʻesuʻega faale-Tusi Paia. E leʻi umi ae ou aʻoaʻoina, o le iloaina o Ieova ma lona finagalo e sili atu ona tāua na i lo o loʻu tulaga faaletino. Na logolelei lenā feʻau iā te aʻu. O le Salamo 73:28 o le mau lea e sili ona oʻu fiafia i ai. Ua faapea mai le vaega muamua o lenā mau: “Ou te faalatalata atu i le Atua ou te lelei ai.”

Na faafuaseʻi ona siitia atu lo matou aiga i Burkina Faso, ma na matuā suia ai loʻu olaga. Ua masani tagata i Côte d’Ivoire, e vāai iā te aʻu i autafa o le fata faatau fualaau ʻaina. Peitaʻi i lo matou vaipanoa fou e lē iloa aʻu e se tasi. E fou le vaai a le toʻatele iā te aʻu ma e latou te sioa mai. O le iʻuga, na ou nofo i le fale mo ni vaiaso. O lea, na ou manatua ai le lelei o le faalatalata atu iā Ieova. Na ou tusi i le ofisa o le lālā a Molimau a Ieova, ma na fetaui lelei le tagata na asiasi mai iā te aʻu. O Nani, o ia o se misionare e fai lana uila afi.

O auala oneonea i lo matou vaipanoa e masani ona maseesee ma palapalā i vaitau timuga. E tele taimi na paʻū ai Nani i lana uila afi a o sau e fai la ma suʻesuʻega, peitaʻi e leʻi fiu ai o ia. Na ia ofo mai e ave aʻu i sauniga. Na ou iloa o le a ou alu ese ai mai i le fale, ma e tatau ona ou faafetaiaʻia le sioa mai o tagata iā te aʻu. O loʻu oso i tua o le uila afi o le a atili ai ona mamafa ma faigatā ona alu le uila.  E ui i lea, na ou malie ou te alu ma maufaatuatuaina le vaega lona lua o le mau ou te fiafia lava i ai: “Ou te sulufaʻi atu i le Alii Pule Silisili Ese o Ieova.”

O nisi taimi e ma te paʻuʻū ai ma Nani i se vaivai, ae sa ma faaauau pea ma oo ai i le sauniga. Maʻeu le eseese o le laufofoga fiafia o tagata i le Maota mo Sauniga ma le sioa mai o tagata o le lalolagi! I le iva masina mulimuli ane, na ou papatiso ai loa.

Ua faapea mai le vaega mulimuli o le mau lea ou te fiafia lava i ai: “Ina ia folafola atu au galuega uma lava.” Na ou iloa o le a avea le faiva o se luʻi sili iā te aʻu. Ou te manatua le taimi muamua na ou talaʻi ai mai i lea fale i lea fale. Na sioa mai tamaiti ma tagata matutua ma mulimuli mai ma faataʻitaʻi le auala ou te savali ai. E ese le tigā o lea mea, ae sa ou mafaufau pea e latou te manaʻomia le parataiso e pei foʻi o aʻu, o lea na ou maumauaʻi ai pea.

Ina ia faafaigofie le tulaga o mea, na maua ai saʻu uila e tolu paʻu e vili i lima. E tulei e laʻu paga le uila agaʻi i luga o se aʻega ona oso mai lea i luga a o ma agaʻi i lalo o le aʻega. O le taimi muamua sa avea le faiva o se luʻi, ae ua avea nei ma puna o le olioli. O lea, i le 1998 na ou galue ai o se paeonia sauatoa.

E tele aʻu suʻesuʻega faale-Tusi Paia na fai, ma o le toʻafā o i latou ua papatiso. E lē gata i lea, na talia e se tasi o oʻu uso le upu moni. E ese ma loʻu faagaeetia pe a faalogo i le auala o loo agaʻigaʻi ai i luma isi i le itu faaleagaga. A o oʻu mafatia i le maʻi o le malalia i se tasi aso, ae maua mai loa saʻu tusi mai i Côte d’Ivoire. Na amata sa ma suʻesuʻega faale-Tusi Paia ma se talavou e aʻoga i le iunivesite i Burkina Faso, ma na ou tuuina atu i se tasi o uso e na te faia. Na siitia mulimuli ane le talavou i Cote dʻIvoire. Maʻeu loʻu fiafia ina ua ou iloa ua avea o ia o se tagata talaʻi e leʻi papatiso!

E faapefea ona maua aʻu tupe? Na ofo mai se faalapotopotoga e fesoasoani i tagata e lē atoatoa le malosi e aʻo laʻu suʻisuʻi. Na mātauina e se tasi o faiaʻoga le auala sa ou galue ma faapea atu i isi: “E tatau ona aʻo lana fai fasimoli.” Na latou aʻoaʻoina aʻu. Na ou faia fasimoli tamea ma fasimoli taʻele. Na fiafia tagata i aʻu fasimoli ma faailoa atu i isi. Ou te alu lava e tiliva aʻu fasimoli i laʻu uila afi.

Pagā loʻu faanoanoa, ona i le 2004 na faateteleina ai tigā ona o le leaga o loʻu tuasivi, ma oo ai i le tulaga ua tatau ona tuu laʻu paeonia. Ae e ui i lea, o loo faia pea soʻu sao atoatoa i le faiva.

E faapea mai tagata ou te foliga ataata i taimi uma. E tele māfuaaga ou te fiafia ai auā o le faalatalata i le Atua ou te lelei ai.—Faamatalaina e Sarah Maiga.