O le ā na Aʻoaʻo e Iesu e Faatatau i Seoli?

Na fetalai Iesu: “Afai e te agasala ona o lou mata, ia lafoaʻi. E lelei ona e ulu atu i le malo o le Atua ma le mata e tasi, a e leaga ona lafoina oe ma ou mata e lua i seoli. E lē mamate ilo i inā, ma e lē mafai foʻi ona tineia le afi.”—MAREKO 9:47, 48, Contemporary English Version.

I se isi taimi, sa fetalai ai Iesu e faatatau i le vaitaimi o le faamasinoga, pe a ia faapea atu i ē amioleaga: “Ō ese atu ia iā te aʻu outou ua malaia i le afi e faavavau, ua saunia mo le tiapolo ma ana agelu.” Na ia faapea mai foʻi, o le a ō i latou i le “faasalaga e faavavau.”—MATAIO 25:41, 46, The New American Bible.

PE A e faatoʻā faitau i upu o loo i luga, e foliga mai o loo lagolagoina e Iesu le aʻoaʻoga o le afi i seoli. O le mea moni, e leʻi manaʻo Iesu e iai se feteenaʻiga ma le Afioga a le Atua, lea e faapea mai ma le manino: “O ē ua oti, latou te lē iloa se mea.”—Failauga 9:5.

O le ā la na faasino i ai Iesu ina ua ia fetalai e lafoina se tagata i “seoli”? Pe e moni pe faafaatusa le “afi e faavavau” lea na lapataʻi mai ai Iesu? O le ā le uiga e ō atu tagata amioleaga i le “faasalaga e faavavau”? Seʻi auauaʻi ona tatou iloiloina nei fesili.

O le ā na faasino i ai Iesu ina ua ia fetalai e lafoina le tagata i “seoli”? O le upu Eleni na faaliliu mai ai le upu “seoli” i le Mareko 9:47, o le Geʹen·na. O lenei upu e sau mai le upu Eperu Geh Hin·nomʹ, o lona uiga “Vanu i Hinoma.” O le Vanu o Hinoma sa i tuapā o Ierusalema anamua. I vaitaimi o tupu o Isaraelu, o i inā sa faia ai taulaga i tamaiti, o se faiga na inosia ma teena e le Atua. Na fetalai mai le Atua o le a ia faaoo le oti iā i latou o ē faia lea faiga faatapuaʻiga sesē. Ua taʻua ai la le Vanu o Hinoma o le “vanu o le fasi,” le mea o le a taatitia ai “tino ua oti o lenei nuu” ae lē tanuina. (Ieremia 7:30-34) O lea la, sa valoia e Ieova o le a avea le Vanu o  Hinoma ma nofoaga, e lē faapuapuagatia ai tagata ola, ae lafoaʻi i ai le anoanoaʻi o tino o tagata oti.

I aso o Iesu, na faaaogā ai e tagata o Ierusalema le Vanu o Hinoma e lafoaʻi i ai otaota. Sa lafoaʻi foʻi i ai tino o tagata solitulafono i lenei nofoaga, ma faaauau pea ona faaolaola le afi ia mū uma ai otaota ma tino oti.

Ina ua fetalai Iesu e faatatau i ilo ia e lē mamate ma le afi e lē mafai ona tineia, e foliga mai o loo ia faasino atu i le Isaia 66:24. E tusa ai ma “tino o tagata oti ē sa fouvale [i le Atua],” ua faapea mai Isaia, “e lē mamate o latou ilo, e lē tineia foʻi lo latou afi.” Sa silafia e Iesu ma lana ʻaufaalogologo o faaupuga o loo i le Isaia, na faasino atu i le mea o le a tupu i tino o tagata oti, o ē lē tatau i ai se falelauasiga.

O lea la, sa faaaogā e Iesu le Vanu o Hinoma,  po o Kena, o se faatusaga talafeagai o le oti e aunoa ma se faamoemoe o le toetu. Sa malamalama tagata i lenei manatu ina ua ia lapataʻi mai, e mafai e le Atua ona “faaumatia le agaga atoa ma le tino i Kena.” (Mataio 10:28, NAB) O Kena o se faailoga o le oti e faavavau, ae lē o le faapuapuagatia e faavavau.

Pe moni, pe faafaatusa le “afi e faavavau” lea na lapataʻi mai ai Iesu? Seʻi mātau, o le “afi e faavavau” lea na taʻua e Iesu ma o loo tusia i le Mataio 25:41, sa saunia “mo le tiapolo ma ana agelu.” O le ā sou taofi, pe mafai ona susunuina i se afi moni se foafoaga agaga? Pe na faaaogā faafaatusa e Iesu le upu “afi”? O le mea moni, e lē o ni “mamoe” po o ni “oti” moni lea na taʻua i lana lauga; ae o se faatusatusaga e faaata ai ituaiga tagata e toʻalua. (Mataio 25:32, 33) O lea la, o le afi e faavavau lea na taʻua e Iesu, o le a susunu uma ai tagata amioleaga i se auala faafaatusa.

O le ā le uiga o le ō atu o tagata amioleaga i le “faasalaga e faavavau”? E ui e tele faaliliuga o loo faaaogāina le upu “faasalaga” i le Mataio 25:46, ae o le uiga o le upu Eleni koʹla·sin, o le “faagata lea o le tupu o se laau,” po o le tipi, pe sala ese lālā o loo falala solo. O lea la, o le a maua e i latou e pei ni mamoe le ola e faavavau, a o ē e pei o ni oti e lē salamō, o le a oo iā i latou le “faasalaga e faavavau,” po o le aveesea e faavavau.

O le ā Sou Taofi?

E leʻi aʻoaʻoina e Iesu faapea e iai se agaga e lē mafai ona oti o le tagata. Peitaʻi, sa masani ona ia aʻoaʻo e faatatau i le toetutū mai o i latou ua maliliu. (Luka 14:13, 14; Ioane 5:25-29; 11:25) Aiseā na fetalai mai ai Iesu o le a faatutūina ē ua  maliliu, pe afai na ia talitonu e leʻi oti o latou agaga po o tino?

E leʻi aʻoaʻoina e Iesu o le a faapuapuagatia e faavavau e le Atua tagata amioleaga. Nai lo lea, na fetalai Iesu: “Ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia le fano se tasi e faatuatua iā te ia, a ia maua e ia le ola e faavavau.” (Ioane 3:16) O lea la, e foliga mai i upu a Iesu o ē e lē faatuatua iā te ia, e maliliu i latou. Pe ana fai o le uiga moni o ana fetalaiga, o le a latou ola e faavavau ae e faapuapuagatiaina i le afi i seoli, e mautinoa lava e na te taʻu saʻo mai.

O le aʻoaʻoga lenei o seoli o se nofoaga e faapuapuagatia ai, e lē faavae mai le Tusi Paia. Nai lo lea, o se talitonuga faanuupō ma ua avea ma aʻoaʻoga faa-Kerisiano. (Tagaʻi i le pusa “O Se Otootoga Puupuu o le Talaaga o Seoli,” i le itulau e 6.) E leai, e lē faapuapuagatia e faavavau e le Atua tagata i le afi. E faapefea ona aafia ou manatu e uiga i le Atua ona o le mea moni lea ua e aʻoaʻoina e faatatau i seoli?

[Pusa/Ata i le itulau 6]

O SE OTOOTOGA PUUPUU O LE TALAAGA O SEOLI

TUPUGA MAI TALITONUGA FAAPAUPAU: Sa talitonu tagata Aikupito i le afi i seoli. O le tusi Ȧm-Ṭuat, lea na tusia i le 1375 T.L.M., o loo taʻua ai i latou o ē “o le a lafoina i le lua e iai le afi; ma . . . e lē mafai ona sao mai ai; ma . . . e lē mafai ona sola ese mai lona mumū.” Na tusia e le faifilosofia Eleni o Pulukata (e tusa o le 46-120 T.A.) le manatu lenei e faatatau i ē o loo i seoli: “Na latou tau fai tagiauē a o faapuapuagatia i latou i se auala ogaoga ma le mataʻutia.”

AAFIA AI FOʻI TALITONUGA FAA-IUTAIA: Sa lipotia mai e le tusitala o talafaasolopito o Iosefasa (37 T.A.-e tusa o le 100 T.A.) e faatatau i tagata Esene, o se vaega o le lotu Iutaia, sa latou talitonu “e ola pea le agaga pe a mavae le oti ma ola pea e faavavau.” Na ia toe faapea mai: “O le manatu foʻi lea o tagata Eleni . . . E latou te manatu o ē amioleaga e tuuina i se nofoaga e mataʻutia ma pogisa, e lē muta ona faasalaga.”

AAFIA AI LOTU UA TAʻUA O “KERISIANO”: I le senituri lona lua T.A., na faapea mai ai le tusi apokerifa o Apocalypse of Peter e faatatau i ē amioleaga: “Ua faatalitalia mai i latou e le afi e lē mafai ona tineia.” O loo toe faapea mai: “O Eseraelu, le agelu o le toʻasā, o loo ia lafoina tane ma fafine ua mū se vaega o latou tino i se nofoaga pogisa, o le seoli lea o tagata, ma e faasalaina i latou e lenei agelu o le toʻasā.” A o faagasolo lenā vaitaimi, na faapea mai le tusitala o Teofilo mai Anetioka e faatatau i le perofeta fafine Eleni o Sibyl (Sapila), o loo ia valoia faasalaga o ē amioleaga: “E oo mai iā te outou le afi mumū, ma e mū pea outou i aso uma e faavavau.” O nisi o na upu na taʻua e Teofilo e faapea e “moni, e aogā, e tonu, ma e lelei mo tagata uma.”

SA FAAAOGĀ LE AFI I SEOLI E FAAMAONIA AI LE TONU O FAIGA SAUĀ I ASO ANAMUA: O le tupu tamaʻitaʻi o Egelani o Maria 1 (1553-1558), sa taʻu foʻi o ia o “Maria le Faamasaa Toto,” ona o lona susunuina o le pe ā ma le 300 tagata Porotesano i laau faaoosala, ae sa ia faapea mai: “Ona o lea e susunuina e faavavau i seoli tagata e tetee i le lotu, e tatau la iā te aʻu ona faaaʻoaʻo i le taui ma sui a le Atua, e ala i le susunu o i latou i le lalolagi.”

SE MALAMALAMAGA FOU: I tausaga e leʻi leva talu ai nei, ua toe iloilo ai e nisi lotu la latou aʻoaʻoga e faatatau i seoli. O se faaaʻoaʻoga, na faapea mai le Komiti e Gafa ma Talitonuga o le Lotu Egelani i le 1995: “O seoli, e lē o se faapuapuagatia e faavavau, ae o se filifiliga faaiʻu ma le lē masuia o le matuā tetee i le Atua, ma e tasi lava le iʻuga o le lē toe iai lea e faavavau.”

[Pusa i le itulau 7]

O LE Ā LE “LEPA AFI”?

I le Faaaliga 20:10, o loo faapea mai ai o le a lafo le Tiapolo i le “lepa afi” ma e “faapuapuagatia ai i latou i le ao ma le pō e faavavau, faavavau lava.” Pe ana fai e faapuapuagatia e faavavau le Tiapolo, e tatau la ona faaola pea o ia e le Atua, ae o loo faapea mai le Tusi Paia o le a “faaumatia” o ia e Iesu. (Eperu 2:14) O le lepa afi faafaatusa, o loo faaata mai ai le “oti faalua.” (Faaaliga 21:8) E lē o le oti muamua lea na taʻua i le Tusi Paia, le oti ona o le agasala a Atamu, lea e mafai ona toe tuusaunoa mai ai se tasi e ala i le toetū. (1 Korinito 15:21, 22) E lē o faapea mai le Tusi Paia o le a faasaʻolotoina i latou o loo i le “lepa afi,” o lona uiga la, e faasino atu le “oti faalua” i se isi ituaiga oti, lea e lē mafai ona faasaʻolotoina mai ai.

E faapefea la ona faapuapuagatia e faavavau i latou o loo i le “lepa afi”? I nisi taimi, o le “faapuapuagatia” e mafai ona uiga faapea o loo “taofiofia” se tasi. Na iai se taimi na feagai ai Iesu ma ni temoni, ma na latou taufaitagi auē ma faapea mai: “Po ua e sau ea e faapuapuagatia i matou [taofiofia i matou i le tō] a o leʻi oo i le taimi na atofaina?” (Mataio 8:29; Luka 8:30, 31) O lea la, o i latou uma o loo i le “lepa afi” o le a “faapuapuagatia” e ala i le taofiofia e faavavau, po o le “oti faalua.”