E Aʻoaʻo e le Lotu Moni le Alofa i Isi

UA FAAPEA mai le Tusi Paia, “O sē e lē alofa ua lē iloa e ia le Atua; auā o le Atua, o le alofa lava ia.” (1 Ioane 4:8, New Catholic Edition of the Holy Bible ) O lea la, e ao i le lotu moni ona aʻoaʻoina le alofa faaleuso.

Ua faia e le tele o lotu galuega lelei i le tausiaina o ē mamaʻi, o ē e matutua, ma ē e matitiva. E latou te faalaeiau o latou tagata lotu ia faatino le fautuaga a le aposetolo o Ioane o lē na tusi e faapea: “Afai ua iai se tasi ua lava ana mea e ola ai ae ua vaai atu i se uso po o se tuafafine o loo manaʻomia se fesoasoani, ae e lē alofa i ai. E lē o iai le alofa o le  Atua i lea tagata. Laʻu fanau e, e ao ona tatou alolofa e lē na o upu ma tala, a o gaoioiga ma le alofa moni.”—1 Ioane 3:17, 18, New Century Version.

Ae o le ā le mea e tupu pe a fetauaʻi atunuu? Pe e na o taimi o le filemu e faatatauina ai le poloaʻiga a le Atua, ia “alofa i lou tuaoi e pei o oe lava,” ae e lē faatatauina pe a filifili se taʻitaʻi faapolotiki po o se tupu e tau ma se atunuu tuaoi?—Mataio 22:39, King James Version.

Na fetalai Iesu e faapea: “O le mea lea e iloa ai e tagata uma o oʻu soo outou, pe afai e alofa le tasi i le isi.” (Ioane 13:35, New International Version) A o e taliina fesili o loo mulimuli mai, ia fesili ifo iā te oe lava, ‘Po o faaalia i taimi uma e tagata o lenei lotu le alofa i tagata uma, e lē gata i upu ae faapea foʻi gaoioiga?’

MATAUPU: Taua.

LE AʻOAʻOGA A LE TUSI PAIA: Na poloaʻi Iesu i ona soo: “Ou te fai atu iā te outou, ia alolofa i o outou fili ma faia le mea lelei i ē e ʻinoʻino mai iā te outou.”—Mataio 5:44, NCE.

Ina ua ō mai fitafita e puʻe Iesu, na seʻi aʻe e le aposetolo o Peteru se auupega e puipuia ai Iesu. Peitaʻi, na fetalai atu o ia e faapea: “Ia toe sulu lau pelu i lona faamoega, auā o i latou uma e tago i le pelu, e oti i le pelu.”—Mataio 26:52, NCV.

Na tusi le aposetolo o Ioane e faapea: “E iloa le fanau a le Atua mai i le fanau a le Tiapolo, auā o ē e ʻau ma le Tiapolo e lē fia faia le mea tonu pe alofa le tasi i le isi. Mai lava i le amataga na taʻu atu ai iā te outou ia alofa le tasi i le isi. Aua neʻi pei o Kaino, o lē na ʻau ma le Tiapolo ma fasiotia lona lava uso.”—1 Ioane 3:10-12, Contemporary English Version.

FESILI: Po o uunaʻia e lenei lotu ona tagata ia auai i taua?

MATAUPU: Faiga Faapolotiki.

LE AʻOAʻOGA A LE TUSI PAIA: Ina ua uma ona molimauina vavega na faia e Iesu, sa mananaʻo nisi ina ia auai o ia i faiga faapolotiki. O le ā lana tali atu? “Ua silafia e Iesu o le a ō mai i latou e ave faamalosi o ia e fai ma tupu, ona toe maliu ese ai lea na o ia i le mauga.”—Ioane 6:15, NIV.

Ina ua puʻeina Iesu ma tuuaʻia sesē e faapea e tetee i le malo, sa ia tali atu: “E lē mai i lenei lalolagi loʻu malo. Pe ana mai i le lalolagi nei loʻu malo, semanū ua tau aʻu auauna, ina neʻi tuuina atu aʻu i tagata Iutaia. Peitaʻi e lē mai i le lalolagi loʻu malo.”—Ioane 18:36, English Standard Version.

Sa tatalo atu Iesu i le Atua e faatatau i ona soo e faapea: “Ua ou tuuina atu iā i latou au afioga, ma ua ʻinoʻino le lalolagi iā i latou  ona e lē o ni tagata o le lalolagi i latou, e pei foʻi o aʻu, e lē o so le lalolagi aʻu.”—Ioane 17:14, New Revised Standard Version.

FESILI: Po o mulimuli lenei lotu i le faaaʻoaʻoga a Iesu ma ʻalofia faiga faapolotiki, e tusa lava pe inosia ai ona tagata e nisi o le ʻaufaipolotiki?

MATAUPU: Faailoga tagata.

LE AʻOAʻOGA A LE TUSI PAIA: Ina ua avea uluaʻi tagata o Nuu Ese lē peritomeina ma Kerisiano, na faapea mai le aposetolo o Peteru: “E lē faailoga tagata le Atua, a o lē e mataʻu iā te Ia i nuu uma lava ma fai le amiotonu, e talia e Ia.”—Galuega 10:34, 35, Holman Christian Standard Bible.

Na tusi atu Iakopo i Kerisiano i le uluaʻi senituri e faapea: “Aʻu uō e, afai e tou te faatuatua i lo tatou Alii mamalu o Iesu Keriso, e tou te lē faasili isi i lo isi. Afai e ulu atu se tagata e ofu lelei i a outou faatasiga ma se mama auro i lona lima. Ae ulu atu foʻi se tagata mativa e ofu i se matuā ofu. Aua tou te avatu le nofoa sili i lē e ofu lelei, ae fai atu i lē e mativa e tū ai pea i inā pe saofaʻi i le fola. Ua tutusa lenā ma le fai atu e sili isi tagata i lo isi, ma ua avea ai outou e pei o faamasino piʻopiʻo.”—Iakopo 2:1-4, CEV.

FESILI: Po o aʻoaʻo e lenei lotu, e tutusa tagata uma i le silafaga a le Atua, ma e lē tatau i tagata lotu uma ona faailogaina se tasi ona o lona lanu po o lona tulaga tau tamaoaiga?

[Faamatalaga faaopoopo i le itulau 7]

O lē fea lotu o loo aʻoaʻoina ona tagata ia faatoʻilalo faiga faapolotiki, le faailoga lanu, ma le lē tutusa o tulaga tau tamaoaiga o loo fevaevaeaʻi ai tagata?