Po o le Mativa o se Faailoga o le Lē Fiafia o le Atua?

NA TAʻU atu e le Atua i tagata Isaraelu anamua: “Ia leai se tagata iā te oe e mativa.” Talu ai, i le tulafono na ia tuuina atu iā i latou, sa iai sauniuniga e tausia ai ē matitiva e oo lava i le faamagaloina o aitalafu. (Teuteronome 15:1-4, 7-10) O le mea lea, e lē tatau ona iai ni tagata matitiva iā Isaraelu, auā na folafola atu e Ieova e na te faamanuia i latou. Ae peitaʻi, o lenā faamanuiaga sa faalagolago i le usiusitaʻi i le tulafono, lea na lē taulau ona faia e tagata Isaraelu.

Ae peitaʻi, e lē o le uiga o lenei mea e faapea, e lē fiafia le Atua iā i latou e itiiti a latou mea, ae faamanuia i ē e tele a latou mea. O le toʻatele o auauna faamaoni a le Atua sa matitiva i le itu faaletino. O le perofeta o Amosa, o se tagata fagamanu e mativa ma o se faifaatoʻaga. (Amosa 1:1; 7:14) I aso o le perofeta o Elia, ina ua iai se oge i Isaraelu, sa faalagolago atu Elia i le agalelei o se fafine mativa ua oti lana tane, lea sa faatumauina faavavega si ana falaoa itiiti ma si suāuu i le taimi o le oge. E leʻi mauʻoa Elia po o le fafine mativa; ae na saunia e Ieova mea na la manaʻomia.—1 Tupu 17:8-16.

O mea e tutupu faafuaseʻi, e ono vave ai ona matitiva tagata. O faalavelave faafuaseʻi ma maʻi, e mafai ona lē faigaluega ai mo sina taimi se tasi, pe e lē toe faigaluega ai lava. O le oti foʻi, e mafai ona tuua ai fanau ua mātuaoti ma fafine ua oti a latou tane. E ui i na tulaga leaga, ae e lē o ni faamaoniga na o le lē fiafia o le Atua. O le tala iā Naomi ma Ruta, o se faaaʻoaʻoga faamāfanafanaloto lea o le tausiga alofa a Ieova iā i latou e matitiva. E ui lava na matuā matitiva Naomi ma Ruta ina ua feoti a la tane, ae na faamanuia Ieova iā i laʻua ma tausia o la manaʻoga faaletino.—Ruta 1:1-6; 2:2-12; 4:13-17.

E manino mai, o le mativa e lē o se faailoga o le lē fiafia o le Atua. O i latou e faamaoni iā Ieova le Atua, e mafai ona mautinoa i upu a le tupu o Tavita e faapea: “Ua ou toeaina aʻu nei, sa aʻu tauleʻaleʻa; a ou te leʻi iloa se tagata amiotonu na lafoaʻiina, po o ana fanau ua ʻaiisi i latou.”—Salamo 37:25.

[Ata i le itulau 8]

E ui lava ina matuā matitiva Naomi ma Ruta, ae na faamanuia ma tausia ma le alofa i laʻua e le Atua